Delhi : આતંકવાદના મૂળ ઉખેડવા મોદી સરકારનો માસ્ટર પ્લાન, પાકિસ્તાનને મળશે જડબાતોડ જવાબ...!

પહલગામમાં થયેલા આતંકવાદી હુમલા બાદ સમગ્ર દેશમાં ભારે આક્રોશ ફેલાયો છે. આ વચ્ચે મંગળવારે ગૃહ મંત્રાલયની ઉચ્ચ સ્તરીય બેઠક બાદ રક્ષામંત્રી રાજનાથ સિંહ, ચીફ ઓફ ડિફેન્સ સ્ટાફ (CDS) જનરલ અનિલ ચૌહાણ અને NSA અજીત ડોવાલ, PM નરેન્દ્ર મોદીને મળવા તેમના નિવાસસ્થાને પહોંચ્યા હતા. આ પહેલાં ગૃહ મંત્રાલયની બેઠકમાં કેન્દ્રીય ગૃહ સચિવ ગોવિંદ મોહન, BSF, આસામ રાઇફલ્સ અને રાષ્ટ્રીય સુરક્ષા ગાર્ડના મહાનિદેશક પણ સામેલ થયા હતા.

આવતીકાલે CCS ની અગત્યની બેઠક...

વધુમાં, ગૃહ મંત્રાલયની મહત્વપૂર્ણ બેઠકમાં CRPF, SSB અને CISF ના વરિષ્ઠ અધિકારીઓ પણ પહોંચ્યા હતા. ગૃહ મંત્રાલયની આ બેઠક બાદ PM નરેન્દ્ર મોદી બુધવારે CCS ની બેઠક લેશે. નોંધનીય છે કે, પહલગામ આતંકવાદી હુમલા બાદ આ બીજી વખત CCS (કેબિનેટ કમિટી ઓન સિક્યુરિટી)ની બેઠક યોજાશે. CCS બેઠક બાદ બુધવારે જ PM મોદીની અધ્યક્ષતામાં CCPA (કેબિનેટ કમિટી ઓન પોલિટિકલ અફેર્સ)ની પણ બેઠક થવાની છે.

PM મોદી સાથે રક્ષામંત્રીની મુલાકાત...

સોમવારે PM નિવાસસ્થાને PM મોદી અને રક્ષામંત્રી રાજનાથ સિંહ વચ્ચે લગભગ 40 મિનિટ સુધી અગત્યની બેઠક ચાલી હતી. PM સાથે રક્ષામંત્રીની આ મુલાકાત એવા સમયે થઈ, જ્યારે તેના થોડા સમય બાદ જ ભારત અને ફ્રાન્સ વચ્ચે નૌકાદળ માટે 26 રાફેલ મરીન વિમાનોનો સોદો થયો.

આર્મી ચીફ અને ડિફેન્સ મિનિસ્ટરની બેઠક...

PM મોદી પાસે જવા પહેલાં સોમવારે જ આર્મી ચીફ જનરલ ઉપેન્દ્ર દ્વિવેદી અને રક્ષામંત્રી રાજનાથ સિંહની મંત્રાલયમાં મુલાકાત થઈ હતી. માનવામાં આવે છે કે આ મુલાકાત દરમિયાન રાજનાથ સિંહે સેના પ્રમુખ પાસેથી સેનાની તૈયારી, પહલગામ આતંકવાદી હુમલા બાદ લેવાયેલા પગલાં અને સરહદોની સ્થિતિ વિશે માહિતી લીધી હતી.

Delhi માં બેઠકોનો દોર...

ગૃહ મંત્રાલયની ઉચ્ચ સ્તરીય બેઠક, રક્ષામંત્રીની PM મોદી સાથે મુલાકાત, આર્મી ચીફ અને રક્ષામંત્રી વચ્ચે બેઠક, ચીફ ઓફ ડિફેન્સ સ્ટાફ અને રક્ષામંત્રીની અગત્યની બેઠક. ધ્યાન આપવા જેવી વાત એ છે કે પહલગામ આતંકવાદી હુમલા બાદ પાકિસ્તાનની સેના છેલ્લા ચાર દિવસથી LOC પારથી ગોળીબાર કરી રહી છે. ભારતીય સેનાએ પણ પાકિસ્તાનના ગોળીબારનો મૂંહતોડ જવાબ આપ્યો છે.

રક્ષામંત્રીને મળ્યા CDS ચૌહાણ...

રવિવારે ચીફ ઓફ ડિફેન્સ સ્ટાફ (CDS) જનરલ અનિલ ચૌહાણ અને રક્ષામંત્રી રાજનાથ સિંહ વચ્ચે એક મહત્વપૂર્ણ બેઠક થઈ હતી. રક્ષામંત્રી અને જનરલ અનિલ ચૌહાણની આ મુલાકાત પણ લગભગ 40 મિનિટ સુધી ચાલી હતી. માનવામાં આવે છે કે, આ દરમિયાન આતંકવાદના ખાત્માને લઈને જનરલ અનિલ ચૌહાણે રક્ષામંત્રીને સૈન્ય રણનીતિ અને તૈયારીઓથી માહિતગાર કર્યા હતા. રક્ષામંત્રી રાજનાથ સિંહ અને ચીફ ઓફ ડિફેન્સ સ્ટાફ જનરલ અનિલ ચૌહાણની આ મુલાકાત દિલ્હી (Delhi)માં રક્ષામંત્રીના નિવાસસ્થાને થઈ હતી. રક્ષા તૈયારીઓને લઈને રવિવારે દિલ્હી (Delhi)માં BSF ના અધિકારીઓ પણ હાજર રહ્યા હતા. રવિવારે સીમા સુરક્ષા બળ (BSF)ના ડાયરેક્ટર જનરલ દલજીત સિંહ ચૌધરી ગૃહ મંત્રાલય ગયા હતા.