ઓર્ડર..ઓર્ડર..તમારે 2 મહિના બેંકમાં કચરો વાળવાનો રહેશે...ઓડિશા હાઇકોર્ટનો ચૂકાદો

ઓડિશા હાઈકોર્ટે છેતરપીંડીના એક કેસમાં ચોંકાવનારો ચુકાદો આપ્યો છે, જેની ચર્ચા હવે દરેક જગ્યાએ થઈ રહી છે. આ સાથે, નિર્ણયમાં રાખવામાં આવેલી શરતો પર પણ ચર્ચા કરવામાં આવી રહી છે. છેતરપિંડીના કેસમાં જેલમાં બંધ એક મહિલાની જામીન અરજી પર સુનાવણી કરતી વખતે કોર્ટે આ નિર્ણય આપ્યો છે.

જામીન પર મુક્ત થયા પછી, અરજદાર મહિલાએ 2 મહિના સુધી કટક રિંગ રોડ સ્થિત ICICI બેંક શાખા પરિસરની સફાઈ કરવી પડશે. અરજદાર સવારે ૮ થી ૧૦ વાગ્યા દરમિયાન ICICI બેંક પરિસરની સફાઈ કરશે. આ માટે, અરજદારે પોતે ICICI બેંકને વિનંતી કરવાની રહેશે. જામીન પર રહેતી વખતે અરજદાર કોઈપણ ફોજદારી કેસમાં સંડોવાય નહીં. આ ઉપરાંત, સ્થાનિક પોલીસ મહિલા બેંકની સફાઈ અને સ્વચ્છતા સુનિશ્ચિત કરવાની જવાબદારી સંભાળશે.

મીડિયા રિપોર્ટ્સ અનુસાર, મહિલા અને તેના સાથીએ ICICI બેંકની કટક શાખામાંથી કુલ 1.05 કરોડ રૂપિયાની લોન લીધી હતી. આ લોન 3 અલગ અલગ વખત લેવામાં આવી હતી. મહિલા અને તેના જીવનસાથીએ બેંક પાસેથી લોન મેળવવા માટે ભુવનેશ્વરમાં ત્રણ રહેણાંક મિલકતો ગીરવે મૂકી હતી, પરંતુ ત્રણેય લોન જપ્ત થાય તે પહેલાં, મહિલાના સહ-ઋણધારકે ગીરવે મૂકેલી મિલકતોમાંથી એક મિલકત ત્રીજા વ્યક્તિને વેચી દીધી, જેણે તરત જ બેંકમાં ફરિયાદ નોંધાવી. મહિલા અને તેના જીવનસાથીએ આ લોન વર્ષ 2018 માં લીધી હતી. પોલીસ ઘણા સમયથી આ કેસમાં મહિલાને શોધી રહી હતી

ક્રાઇમ બ્રાન્ચની આર્થિક ગુના શાખા (EOW) એ 5 ફેબ્રુઆરીના રોજ ભારતીય દંડ સંહિતાની વિવિધ કલમો - 420 (છેતરપિંડી), 467 (બનાવટી), 468 (છેતરપિંડી કરવાના હેતુથી બનાવટી), 471 (બનાવટી દસ્તાવેજનો અસલી તરીકે ઉપયોગ કરવો) અને 120-B (ગુનાહિત કાવતરું) હેઠળ તેમની ધરપકડ કરી હતી. કોર્ટના આ નિર્ણયની ચર્ચા હવે સમગ્ર દેશમાં થઈ રહી છે. બીજી બાજુ, આવા ગુના કરનારાઓની ઊંઘ ઉડી ગઈ છે.