અગત્યના બિલ સમયે જ લોકસભામાં ગેરહાજર રહેનારા BJPના સાંસદોને નોટિસ

મંગળવારે લોકસભામાં વન નેશન વન ઈલેક્શન બિલ રજૂ કરવામાં આવ્યું હતું જેમાં ભાજપે તમામ સાંસદોને ત્રણ લીટીનો વ્હીપ જાહેર કર્યો હતો અને તેમને ગૃહમાં હાજર રહેવા જણાવ્યું હતું. પરંતુ જ્યારે બિલ રજૂ કરવામાં આવ્યું ત્યારે ભાજપના 20થી વધુ સાંસદો ગૃહમાં હાજર ન હતા. પાર્ટીએ તમામ સાંસદોને નોટિસ મોકલી છે.

એક દેશ, એક ચૂંટણી માટે, કાયદા પ્રધાન અર્જુનરામ મેઘવાલે સંસદમાં બંધારણનો 129મો સુધારો બિલ રજૂ કર્યું. હિન્દુસ્તાન ટાઈમ્સને ટાંકીને પ્રકાશિત થયેલા સમાચાર અનુસાર, આ દરમિયાન ત્રણ કેન્દ્રીય મંત્રી ગિરિરાજ સિંહ, જ્યોતિરાદિત્ય સિંધિયા અને નીતિન ગડકરી પણ ગેરહાજર રહ્યા હતા.

ન્યૂઝ એજન્સી એએનઆઈએ પાર્ટીના સૂત્રોને ટાંકીને કહ્યું કે હજુ સુધી એ સ્પષ્ટ નથી થયું કે જેઓ હાજર ન હતા તેઓએ પાર્ટીને અગાઉથી જાણ કરી હતી કે નહીં. પાર્ટીએ જેમને નોટિસ પાઠવી છે તેવા કેટલાક સાંસદોના નામ પણ સામે આવ્યા છે. તેમાં જગદંબિકા પાલ, શાંતનુ ઠાકુર, બીએસ રાઘવેન્દ્ર, વિજય બઘેલ, ગિરિરાજ સિંહ, જ્યોતિરાદિત્ય સિંધિયા, વિજય બઘેલ, ભગીરથ ચૌધરી, ઉદયરાજ ભોસલે, જયંત કુમાર રોય અને જગન્નાથ સરકારનો સમાવેશ થાય છે.

લોકસભામાં બિલ રજૂ કર્યા બાદ ભારે હોબાળો વચ્ચે તેના પર મતદાન થયું હતું. બિલની તરફેણમાં 269 અને વિરોધમાં 198 વોટ પડ્યા હતા. તમને જણાવી દઈએ કે ગત વર્ષે સપ્ટેમ્બરમાં દેશભરમાં એકસાથે ચૂંટણી કરાવવા માટે પૂર્વ રાષ્ટ્રપતિ કોવિંદની અધ્યક્ષતામાં એક સમિતિની રચના કરવામાં આવી હતી. સમિતિએ માર્ચમાં પોતાનો રિપોર્ટ સોંપ્યો હતો. આ રિપોર્ટને આ વર્ષે સપ્ટેમ્બરમાં મોદી કેબિનેટે મંજૂરી આપી હતી. રિપોર્ટમાં લોકસભાની સાથે વિધાનસભાની ચૂંટણી યોજવા માટે સૂચનો આપવામાં આવ્યા હતા.