હરિયાણાના ગુરુગ્રામમાં એક 23 વર્ષીય નવપરિણીતાના મોતે અનેક સવાલો ઉભા કર્યા છે. ગઢી હરસારુ ગામમાં રહેતી કાજલનું શંકાસ્પદ સંજોગોમાં મોત નીપજ્યું છે.
કાજલના માતા-પિતાએ તેના પતિ અરુણ શર્મા પર ગંભીર આરોપ લગાવતા કહ્યું છે કે અરુણે તેને કોઈ ઝેરી પદાર્થનું ઇન્જેક્શન આપ્યું હતું, જેના કારણે તેનું મોત થયું છે. પોલીસે આ મામલે સેક્ટર 10 પોલીસ સ્ટેશનમાં દહેજ હત્યાનો ગુનો નોંધી તપાસ શરૂ કરી છે.
પ્રેમલગ્ન બાદ વિવાદોની શરૂઆત
પોલીસના જણાવ્યા અનુસાર, કાજલ એક ખાનગી હોસ્પિટલમાં નર્સ તરીકે ફરજ બજાવતી હતી, જ્યારે તેનો પતિ અરુણ એક્સ-રે ટેકનિશિયન હતો. બંનેએ પ્રેમ સંબંધ બાદ ચાર મહિના પહેલા જ લગ્ન કર્યા હતા.
જોકે, લગ્ન બાદ અરુણે નોકરી છોડી દીધી હતી અને થોડા સમય પહેલા જ બંને વચ્ચે મોટો ઝઘડો થયો હતો. આ ઝઘડા બાદ કાજલ તેના પિયર રહેવા આવી ગઈ હતી અને અરુણ પણ ત્યાં જ આવીને રહેવા લાગ્યો હતો.
બુધવારની સાંજે જ્યારે કાજલ તેના પરિવારના સભ્યો સાથે હતી, ત્યારે અરુણે તેને નીચે બોલાવી હતી. થોડીવાર બાદ જ્યારે પરિવારના સભ્યો ત્યાં પહોંચ્યા તો જોયું કે કાજલના નાકમાંથી લોહી નીકળી રહ્યું હતું અને તેની હાલત અત્યંત નાજુક હતી.
તેને તાત્કાલિક હોસ્પિટલ ખસેડવામાં આવી, જ્યાં ડોક્ટરોએ તેને મૃત જાહેર કરી હતી. પરિવારનો દાવો છે કે તેમને ઘરના વોશરૂમમાંથી એક સિરીંજ મળી આવી છે, જેનો ઉપયોગ અરુણે કાજલને ઝેર આપવા માટે કર્યો હોઈ શકે છે.
પોલીસ તપાસ
પોલીસે મૃતદેહનું પોસ્ટમોર્ટમ કરાવીને પરિવારને સોંપ્યો છે. જોકે, મોતનું ચોક્કસ કારણ હજુ સ્પષ્ટ થયું નથી. તપાસ અધિકારી એએસઆઈ જગદીશ ચંદે જણાવ્યું હતું કે, "અમે એફઆઈઆર નોંધી છે. વિસેરા (શરીરના અંગોના નમૂના) લેબમાં તપાસ માટે મોકલવામાં આવશે. લેબ રિપોર્ટ આવ્યા બાદ જ મોતનું સાચું કારણ જાણી શકાશે."
પોલીસ હાલ તે સિરીંજની પણ ફોરેન્સિક તપાસ કરાવી રહી છે. શું આ ખરેખર દહેજ માટેની હત્યા છે કે અંગત અદાવત, તે દિશામાં પોલીસે તપાસના ચક્રો ગતિમાન કર્યા છે.
&nbsp;

નવપરિણીતાનું 4 મહિનામાં જ મોત

નાકમાંથી લોહી નીકળ્યું અને કાજલ ઢળી પડી; પરિવારે પતિ પર લગાવ્યો ગંભીર આરોપ

March 20, 2026 | 14:41 IST