Pahalgam Attack : દેશભરમાં એલર્ટ, મુંબઈ-લખનૌ સહિત અનેક શહેરોમાં મોક ડ્રીલનું રિહર્સલ

પહેલગામમાં થયેલા આતંકવાદી હુમલા બાદ ભારત અને પાકિસ્તાન વચ્ચે વધતા તણાવને ધ્યાનમાં રાખીને, કેન્દ્ર સરકારે દેશભરમાં સુરક્ષા વ્યવસ્થાને વધુ મજબૂત બનાવવા માટે કમર કસી છે. તેના ભાગરૂપે, આવતીકાલે એટલે કે 7 મી મેના રોજ દેશભરના 259 સંવેદનશીલ સ્થળો પર એક મેગા મોક ડ્રિલનું આયોજન કરવામાં આવ્યું છે. આ મોક ડ્રિલની પૂર્વતૈયારી રૂપે આજે જમ્મુ અને શ્રીનગર સહિત અનેક શહેરોમાં તેનું રિહર્સલ કરવામાં આવ્યું હતું.

જમ્મુમાં આજે એક શાળામાં વિદ્યાર્થીઓને મોક ડ્રિલ કરાવવામાં આવી હતી. આ ડ્રિલનો હેતુ હુમલા જેવી કોઈપણ પરિસ્થિતિમાં વિદ્યાર્થીઓને પોતાનો બચાવ કરવા માટે તાલીમ આપવાનો હતો. સોશિયલ મીડિયા પર એક વીડિયો ઝડપથી વાયરલ થઈ રહ્યો છે, જેમાં એક શિક્ષક વિદ્યાર્થીઓને બેન્ચ નીચે છુપાવવાની અને હાથ-પગના બળે જમીન પરથી સરકવાની તાલીમ આપી રહ્યા છે.

ગૃહ સચિવ કરશે મોક ડ્રિલની સમીક્ષા...

પહેલગામ હુમલા બાદ પાકિસ્તાન સાથેના તણાવને જોતા, ગૃહ મંત્રાલયે તમામ રાજ્યોને બુધવારે મોક ડ્રિલ કરવાના આદેશ આપ્યા છે. ગૃહ સચિવ સ્વયં 244 જિલ્લાઓમાં ચાલી રહેલી નાગરિક સુરક્ષાની તૈયારીઓની સમીક્ષા કરશે. આ માટે તમામ રાજ્યોના મુખ્ય સચિવ અને નાગરિક સુરક્ષાના વડાઓ વિડિયો કોન્ફરન્સ દ્વારા એક બેઠકમાં ભાગ લેશે.

મોક ડ્રિલમાં શું શું કરવામાં આવશે?

ગૃહ મંત્રાલયના જણાવ્યા અનુસાર, મોક ડ્રિલ દરમિયાન હવાઈ હુમલાની ચેતવણી આપતા સાયરન વગાડવામાં આવશે. હુમલાની સ્થિતિમાં પોતાને કેવી રીતે બચાવવા તેની તાલીમ આપવામાં આવશે. આ ઉપરાંત, બંકરોની સફાઈ, બ્લેક આઉટના ઉપાયો, મહત્વપૂર્ણ પ્લાન્ટ્સ અને સંસ્થાઓનું રક્ષણ અને નાગરિકોને બચાવવાના ઉપાયો પણ મોક ડ્રિલનો ભાગ હશે. ‘મોક ડ્રિલ’માં વાયુસેના સાથે હોટલાઇન અને રેડિયો-સંચાર લિંકનું સંચાલન અને કંટ્રોલ રૂમ અને શેડો કંટ્રોલ રૂમની કાર્યક્ષમતાનું પરીક્ષણ પણ સામેલ છે.

PM મોદીએ આતંકવાદીઓને જડબાતોડ જવાબ આપવાનું એલાન કર્યું...

PM નરેન્દ્ર મોદીએ હુમલાને અંજામ આપનારાઓ અને તેની કાવતરું ઘડનારાઓને પૃથ્વીના છેલ્લા છેડા સુધી પીછો કરીને તેમની કલ્પનાથી પણ મોટી સજા આપવાનો સંકલ્પ વ્યક્ત કર્યો છે. પહેલગામમાં 22 એપ્રિલના રોજ થયેલા આતંકવાદી હુમલાના જવાબમાં ભારત દ્વારા પોતાના વિકલ્પો પર વિચાર કરવામાં આવી રહ્યો છે, ત્યારે PM મોદી અનેક ઉચ્ચ સ્તરીય બેઠકો કરી રહ્યા છે. આ હુમલામાં 26 નાગરિકો માર્યા ગયા હતા, જેમાં મોટાભાગના પ્રવાસીઓ હતા.

ગુજરાતમાં મોક ડ્રિલની તૈયારી...

પહેલગામ હુમલા બાદ પાકિસ્તાન સાથેના તણાવ વચ્ચે આવતીકાલે ગુજરાત સહિત દેશભરના 259 સ્થળોમાં મોક ડ્રિલ યોજાશે. જેના ભાગરૂપે આજે શ્રીનગર, લખનૌ, મુંબઈની જેમ ગુજરાતમાં પણ પોલીસ અને સ્થાનિક સત્તાધીશોએ સાથે મળીને આ મોક ડ્રિલનું રિહર્સલ કર્યું હતું. ગુજરાતમાં સંવેદનશીલતાના આધારે ત્રણ કેટેગરીમાં મોક ડ્રિલ યોજાશે. જેમાં કેટેગરી-1 માં સુરત, વડોદરા, કાકરાપાર, કેટેગરી-2 માં અમદાવાદ, ભુજ, જામનગર, ગાંધીનગર, ભાવનગર, કંડલા, નલિયા, અંકલેશ્વર, ઓખા, વાડીનાર અને કેટેગરી-3 માં ભરૂચ, ડાંગ, કચ્છ, મહેસાણા, નર્મદા અને નવસારી જિલ્લામાં મોક ડ્રિલ યોજાશે.

સિવિલ ડિફેન્સના ચીફ વોર્ડન અમરનાથ મિશ્રાએ જણાવ્યું હતું કે તેમની પાસે શિસ્તબદ્ધ ટીમ છે અને તેઓ પ્રજાને હુમલા દરમિયાન સ્વબચાવ માટે તાલીમ તેમજ જાગૃતિ આપવા માંગે છે. બ્લેકઆઉટની જાહેરાતમાં કેવું સાયરન વાગે છે અને કેવી રીતે બચાવ કરવો જોઈએ તેની તાલીમ તેઓ આપશે. સિવિલ ડિફેન્સે મોક ડ્રિલ રિહર્સલના ભાગરૂપે પોતાના કર્મચારીઓને શહેરમાં હવાઈ હુમલા દરમિયાન નાગરિકોને બચાવવાની રીત શીખવી હતી અને સંરક્ષણ માટે માર્ગદર્શિકાઓ પણ આપી હતી. અચાનક થતા હુમલા દરમિયાન લેવામાં આવતા સાવચેતીના પગલાંઓ વિશે પણ માહિતી આપવામાં આવી હતી.

આમ, પહેલગામ હુમલા બાદ દેશભરમાં સુરક્ષાને લઈને તંત્ર એલર્ટ છે અને આવતીકાલની મેગા મોક ડ્રિલ તેની જ એક કવાયત છે.