PM Modi : આદમપુર એરબેઝ પર મોદીની ગર્જના, 'ભારત માતા કી જય'થી દુશ્મનોમાં ફફડાટ

PM નરેન્દ્ર મોદી (PM Modi) મંગળવારે પંજાબના આદમપુર એરબેઝ પહોંચ્યા અને ભારતીય વાયુસેનાના જવાનો સાથે મુલાકાત કરી. PM મોદી (PM Modi)એ એ જવાનો સાથે પણ વાતચીત કરી, જેઓ પાકિસ્તાન સાથેના લશ્કરી સંઘર્ષમાં સામેલ હતા. તેમણે પાકિસ્તાનને એ સંદેશ આપ્યો કે આદમપુર એરબેઝ સંપૂર્ણપણે સુરક્ષિત છે. PM મોદી (PM Modi)એ કહ્યું કે, દુશ્મનને ભારત માતા કી જય સંભળાય છે.

PM નરેન્દ્ર મોદી (PM Modi)એ કહ્યું કે, "ભારત માતા કી જય, ભારત માતા કી જય... આ જયઘોષની તાકાત હમણાં જ દુનિયાએ જોઈ છે. ભારત માતા કી જય, આ માત્ર ઉદ્ઘોષ નથી. આ દેશના દરેક સૈનિકની શપથ છે, જે મા ભારતીની માન-મર્યાદા માટે જીવની બાજી લગાવી દે છે. આ દેશના દરેક એ નાગરિકનો અવાજ છે, જે દેશ માટે જીવવા માંગે છે, કંઈક કરી છૂટવા માંગે છે. ભારત માતા કી જય, મેદાનમાં પણ ગુંજે છે અને મિશનમાં પણ."

તેમણે કહ્યું કે, "જ્યારે ભારતના સૈનિકો મા ભારતીની જય બોલે છે, તો દુશ્મનના કાળજાં ધ્રૂજી જાય છે. જ્યારે આપણા ડ્રોન દુશ્મનના કિલ્લાની દીવાલોને તોડી નાખે છે, જ્યારે આપણી મિસાઇલો સનસનાટી સાથે નિશાન પર પહોંચે છે, તો દુશ્મનને સંભળાય છે - ભારત માતા કી જય. જ્યારે આપણી ફોજ ન્યુક્લિયર બ્લેકમેલની ધમકીની હવા કાઢી નાખે છે, તો આકાશથી પાતાળ સુધી એક જ વાત ગુંજે છે - ભારત માતા કી જય."

PM એ કહ્યું કે, "આપે સૌએ ખરેખર કરોડો ભારતીયોની છાતી પહોળી કરી દીધી છે. દરેક ભારતીયનું માથું ગર્વથી ઊંચું કરી દીધું છે. આપે ઇતિહાસ રચી દીધો છે. જ્યારે વીરોના પગ ધરતી પર પડે છે, તો ધરતી ધન્ય થઈ જાય છે. જ્યારે વીરોના દર્શનનો અવસર મળે છે, તો જીવન ધન્ય થઈ જાય છે. તેથી જ હું આજે સવારે સવારે જ આપના દર્શન કરવા માટે અહીં આવ્યો છું."  PM નરેન્દ્ર મોદી (PM Modi)એ કહ્યું કે, "આજથી અનેક દાયકાઓ પછી પણ જ્યારે ભારતના આ પરાક્રમની ચર્ચા થશે, તો તેના સૌથી મુખ્ય અધ્યાય આપ અને આપના સાથીઓ હશો. આપ સૌ વર્તમાન સાથે જ દેશની આવનારી પેઢીઓ માટે પણ નવી પ્રેરણા બની ગયા છો. પાકિસ્તાનને ખબર જ ન પડી કે ક્યારે તેની છાતી વીંધાઈ ગઈ."

તેમણે કહ્યું કે, "આપના પરાક્રમના કારણે આજે ઓપરેશન સિંદૂરની ગુંજ દરેક ખૂણે સંભળાઈ રહી છે. આ સમગ્ર ઓપરેશન દરમિયાન દરેક ભારતીય આપની સાથે ઊભો રહ્યો. દરેક ભારતીયની પ્રાર્થના આપ સૌની સાથે રહી. આજે દરેક દેશવાસી પોતાના સૈનિકો, તેમના પરિવારો પ્રત્યે કૃતજ્ઞ છે, તેમનો ઋણી છે. ઓપરેશન સિંદૂર કોઈ સામાન્ય સૈન્ય અભિયાન નથી. આ ભારતની નીતિ, નિયત અને નિર્ણાયક ક્ષમતાનો ત્રિવેણી સંગમ છે."

PM નરેન્દ્ર મોદી (PM Modi)એ કહ્યું કે, "તેઓ કાયરોની જેમ છુપાઈને આવ્યા હતા, પરંતુ તેઓ ભૂલી ગયા કે તેમણે જેને લલકાર્યો છે તે હિંદની સેના છે. આપે તેમને સામેથી હુમલો કરીને માર્યા છે. આપે આતંકના તમામ મોટા અડ્ડાઓને માટીમાં ભેળવી દીધા. 9 આતંકી ઠેકાણાઓ બરબાદ કરી દીધા, 100થી વધુ આતંકવાદીઓના મોત થયા. આતંકના આકાઓને હવે સમજાઈ ગયું છે કે ભારત તરફ નજર ઉઠાવવાનું હવે એક જ પરિણામ હશે - તબાહી. ભારતમાં નિર્દોષ લોકોનું લોહી વહેવડાવવાનું એક જ પરિણામ હશે - વિનાશ અને મહાવિનાશ."

તેમણે આગળ કહ્યું કે, "ભારત બુદ્ધની પણ ધરતી છે અને ગુરુ ગોવિંદ સિંહ જીની પણ ધરતી છે. ગુરુ ગોવિંદ સિંહ જીએ કહ્યું હતું - સવા લાખ સે એક લડાઉં, ચિડીયન તે મેં બાજ તુડાઉં, તબૈ ગુરુ ગોવિંદ સિંહ નામ કહાઉં. અધર્મના નાશ અને ધર્મના સ્થાપના માટે શસ્ત્ર ઉઠાવવું આપણી પરંપરા છે. તેથી જ જ્યારે આપણી બહેન-દીકરીઓનો સિંદૂર છીનવાયો, તો આપણે આતંકવાદીઓના ફનને તેમના ઘરમાં ઘૂસીને કચડી નાખ્યા."

PM મોદી (PM Modi)એ આગળ કહ્યું કે, "જે પાકિસ્તાની સેનાના ભરોસે આ આતંકવાદીઓ બેઠા હતા, ભારતની સેના, વાયુસેના અને નૌકાસેનાએ તે પાકિસ્તાની સેનાને પણ ધૂળ ચટાડી દીધી. આપે પાકિસ્તાની ફોજને પણ જણાવી દીધું છે કે પાકિસ્તાનમાં એવું કોઈ ઠેકાણું નથી, જ્યાં બેસીને આતંકવાદીઓ શાંતિનો શ્વાસ લઈ શકે. અમે ઘરમાં ઘૂસીને મારીશું અને બચવાનો એક મોકો પણ નહીં આપીએ. આપણા ડ્રોન, આપણી મિસાઈલો વિશે વિચારીને તો પાકિસ્તાનને ઘણા દિવસો સુધી ઊંઘ નહીં આવે."

PM મોદીએ કહ્યું કે, "કૌશલ દેખાડ્યા ચાલમાં, ઊડી ગયો ભયાનક ભાલાઓમાં. નિર્ભીક ગયો તે ઢાલોમાં, સરપટ દોડ્યો તલવારોમાં." આ પંક્તિઓ મહારાણા પ્રતાપના પ્રસિદ્ધ ઘોડા ચેતક પર લખવામાં આવી હતી, પરંતુ આ પંક્તિઓ આજના આધુનિક ભારતીય હથિયારો પર પણ બંધબેસે છે. ઓપરેશન સિંદૂરથી આપે દેશનો આત્મવિશ્વાસ વધાર્યો છે, દેશને એકતાના સૂત્રમાં બાંધ્યો છે અને આપે ભારતની સરહદોની રક્ષા કરી છે. આપે ભારતની ગરિમાને નવી ઊંચાઈ આપી છે. આપે એ કર્યું છે, જે અભૂતપૂર્વ છે, અકલ્પનીય છે, અદ્ભુત છે."