દાહોદમાં PM મોદીના કાર્યક્રમમાં મંત્રી બચુભાઈ ખાબડની બાદબાકી, પુત્રોની ધરપકડ બાદ રાજકીય ગરમાવો

દાહોદ ખાતે યોજાયેલા વડાપ્રધાન નરેન્દ્ર મોદીના વિશાળ કાર્યક્રમમાં ગુજરાત સરકારના કેબિનેટ મંત્રી બચુભાઈ ખાબડને મંચ પર સ્થાન આપવામાં આવ્યું ન હતું. રાજકીય વર્તુળોમાં આ ઘટનાને અત્યંત મહત્વપૂર્ણ ગણવામાં આવી રહી છે, કારણ કે બચુભાઈના બંને પુત્રો તાજેતરમાં ભ્રષ્ટાચારના ગંભીર આરોપો હેઠળ જેલમાં છે.

મનરેગા કૌભાંડ

દાહોદ અને આસપાસના વિસ્તારોમાં ચાલી રહેલી મનરેગા યોજનામાં રૂપિયા 71 કરોડના ભ્રષ્ટાચારના કથિત કૌભાંડમાં બચુભાઈના પુત્રો બળવંત ખાબડ અને કિરણ ખાબડના નામ આવ્યા છે. તેમની માલિકીની એજન્સીઓ સહિત કુલ 35 એજન્સીઓ વિરુદ્ધ ફરિયાદ દાખલ થઈ છે. કૌભાંડમાં નકલી દસ્તાવેજો અને નાણાંની હેરફેર થકી યોજનાની રકમના દુરૂપયોગના આક્ષેપ થયા છે.

પુત્રોની ધરપકડ

શનિવારે, બળવંત ખાબડની ધરપકડ પછી, કિરણ ખાબડને વડોદરા-હાલોલ હાઇવે પરથી પોલીસે ઝડપી પાડ્યો હતો. બન્નેની પુછપરછ ચાલી રહી છે. આ સાથે તત્કાલીન TDO દર્શન પટેલની પણ ધરપકડ કરવામાં આવી છે. પોલીસે 14 દિવસના રિમાન્ડની માંગણી કરી હતી, જોકે, દાહોદ કોર્ટે 5 દિવસના રિમાન્ડ મંજૂર કર્યા.

મંચ પરથી બાદબાકી પાછળનું કારણ

મોદી સમક્ષ યોજાયેલા કાર્યક્રમમાં બચુભાઈ ખાબડને મંચ પર સ્થાન ન મળવું પાર્ટી દ્વારા ભ્રષ્ટાચાર સામેની "ઝીરો ટોલરન્સ" નીતિના સંકેત તરીકે જોવામાં આવી રહ્યું છે. પાર્ટી નેતૃત્વ આવા આરોપોથી ઘેરાયેલા નેતાઓને તરફદારી આપવાનું ટાળી રહ્યું છે, ખાસ કરીને જ્યારે વડાપ્રધાન હાજર હોય.