આગ્રા-લખનઉ એક્સપ્રેસ વે પર ડબલ-ડેકર બસમાં ભીષણ આગ

લખનઉ-આગ્રા એક્સપ્રેસ વે પર રેવાડી ટોલ પ્લાઝા નજીક દિલ્હીથી આવતી એક ડબલ-ડેકર બસમાં આગ લાગવાની ગંભીર ઘટના બની હતી. બસના પાછળના પૈડામાં અચાનક આગ ભભૂકી ઊઠતાં જોતજોતામાં આગે આખી બસને પોતાની લપેટમાં લઈ લીધી હતી. જોકે, સદનસીબે બસમાં સવાર 39 મુસાફરોનો આબાદ બચાવ થયો હતો અને કોઈ જાનહાનિ થઈ ન હતી.

સતર્કતાથી ટળી મોટી દુર્ઘટના

આ ઘટના ટોલ પ્લાઝાથી લગભગ 500 મીટર પહેલા બની હતી. નજીકમાં રહેલા ચાના વિક્રેતાઓએ બસના પાછળના ભાગમાં આગની જ્વાળાઓ જોઈને તરત જ ડ્રાઇવરને ચેતવ્યો હતો. ઇન્સ્પેક્ટર સતીશ રાઠોડના જણાવ્યા અનુસાર, ડ્રાઇવરે તાત્કાલિક બસ રોકી અને તમામ મુસાફરોને સુરક્ષિત રીતે બહાર કાઢ્યા. જોકે, ટોલ પ્લાઝા પાસે આગ ઓલવવાની પૂરતી વ્યવસ્થા ન હોવાથી બસ સળગી ઊઠી હતી.

40 કલાકમાં બે બસ દુર્ઘટના 

પોલીસે ઘટનાસ્થળે પહોંચીને ફાયર બ્રિગેડને જાણ કરી હતી, જેણે ત્રણ વાહનો મોકલીને આશરે 30 મિનિટની જહેમત બાદ આગ પર કાબૂ મેળવ્યો હતો. અધિકારીઓએ આગ લાગવાનું ચોક્કસ કારણ જાણવા માટે તપાસ શરૂ કરી છે અને તમામ મુસાફરોને વૈકલ્પિક વ્યવસ્થા કરી અન્ય બસ દ્વારા મોકલી દેવાયા હતા. ઉલ્લેખનીય છે કે, છેલ્લા એક મહિનામાં ભારતમાં બે મોટી બસ દુર્ઘટનાઓ થઈ છે, જેમાં 45થી વધુ લોકોએ જીવ ગુમાવ્યા છે. આ સતત બની રહેલી ઘટનાઓ લાંબા અંતરની ખાનગી બસોમાં સુરક્ષાના ધારાધોરણો અને ઇમરજન્સી પ્રતિભાવ પ્રણાલી પર ગંભીર સવાલો ઊભા કરે છે.