Pahalgam attack બાદ જડબાતોડ કાર્યવાહી, 1450 લોકોની ધરપકડ, સરકાર એલર્ટ મોડ પર

જમ્મુ-કાશ્મીરના પહેલગામમાં થયેલા આતંકવાદી હુમલા (Pahalgam attack) બાદ સુરક્ષા દળોએ જબરદસ્ત કાર્યવાહી હાથ ધરી છે. આ હુમલા પછી, સુરક્ષા દળોએ સમગ્ર દક્ષિણ કાશ્મીરમાં 250 થી વધુ ઓવર ગ્રાઉન્ડ વર્કર્સ (OGW)ની ધરપકડ કરી છે. જમ્મુ-કાશ્મીર પોલીસે અન્ય સુરક્ષા એજન્સીઓ સાથે મળીને શરૂ કરેલી સઘન તપાસ અને પૂછપરછ અભિયાન હેઠળ આ લોકોની અટકાયત કરવામાં આવી છે. આ ઉપરાંત, કાશ્મીરમાં આતંકવાદ સંબંધિત કેસોમાં આરોપી એવા લગભગ 1200 લોકોની પણ ધરપકડ કરવામાં આવી છે. આમ, કુલ મળીને 1450 લોકોની ધરપકડ કરીને તેમની પૂછપરછ ચાલી રહી છે.

આ કાર્યવાહીનો હેતુ શું છે?

અધિકારીઓના જણાવ્યા અનુસાર, આ પગલાંનો મુખ્ય ઉદ્દેશ્ય એ નેટવર્કને ઓળખવાનો છે જેણે આ હુમલા (Pahalgam attack)ને શક્ય બનાવ્યો હોય. માનવામાં આવે છે કે, ઓવર ગ્રાઉન્ડ વર્કર્સ દ્વારા હુમલાખોરોને લોજિસ્ટિક અથવા ગુપ્તચર સહાય પૂરી પાડવામાં આવી હતી, જો કે તેમની ચોક્કસ ભૂમિકા હજી સુધી જાણી શકાઈ નથી.

સરકાર એલર્ટ મોડમાં, લઈ શકે છે મોટો નિર્ણય...

 એવી માહિતી સામે આવી છે કે, PM નિવાસસ્થાને PM મોદીની અધ્યક્ષતામાં સીસીએસ (CCS)ની બેઠક ચાલી રહી છે. આ બેઠકમાં ગૃહમંત્રી અમિત શાહ, રક્ષામંત્રી રાજનાથ સિંહ અને NSA અજીત ડોવાલ હાજર છે. આ બેઠકમાં આતંકવાદ વિરુદ્ધ કોઈ મોટો નિર્ણય લેવામાં આવી શકે છે.

પહેલગામ આતંકવાદી હુમલો ક્યારે થયો?

પહેલગામમાં આતંકવાદીઓએ મંગળવારે બપોરે પ્રવાસીઓ પર આડેધડ ગોળીબાર કર્યો હતો. આ ગોળીબારમાં 26 લોકોના મોત થયા હતા. આતંકવાદીઓએ પુરુષોને મારતા પહેલા તેમનો ધર્મ અને નામ પૂછ્યા હતા. એટલું જ નહીં, આતંકવાદીઓએ પુરુષોના પેન્ટ પણ ઉતાર્યા અને તેમના ગુપ્તાંગો તપાસ્યા હતા. આતંકવાદીઓનો આ કૃત્ય કરવાનો હેતુ એ સુનિશ્ચિત કરવાનો હતો કે મરનાર વ્યક્તિ હિન્દુ જ હોય. આતંકવાદીઓની આ હરકતથી સમગ્ર દેશમાં ભારે આક્રોશ ફેલાયો છે અને લોકો સરકારને આતંકવાદીઓ સામે કડક કાર્યવાહી કરવાની અપીલ કરી રહ્યા છે.