બાગપતમાં લાડુ મહોત્સવમાં મોટી દૂર્ઘટના, 7ના મોત, 80 ઘાયલ

ઉત્તર પ્રદેશના બાગપતમાં મોટી દૂર્ઘટના સર્જાઇ છે. ભગવાન આદિનાથના નિર્વાણ લાડુ ઉત્સવ નિમિત્તે, માનસ્તંભ સંકુલમાં બનેલ લાકડાનું સ્ટ્રક્ચર અચાનક તૂટી પડ્યું, જેના નીચે 50 થી વધુ ભક્તો દટાઈ ગયા હતા. ઘટનાના પગલે અકસ્માત સ્થળે નાસભાગ મચી ગઈ. બારૌત શહેર પોલીસ સ્ટેશન વિસ્તારના અધિકારક્ષેત્રમાં આવતા ગાંધી રોડ પર બનેલા મંડપમાં આ અકસ્માત થયો હતો. લોહીથી લથપથ લોકોને એમ્બ્યુલન્સમાં હોસ્પિટલ લઈ જવામાં આવ્યા છે. એક કલાક બાદ અપડેટ માહિતી મુજબ આ ઘટનામાં 3 મહિલા સહિત 7ના મોત થયા છે જ્યારે 80 લોકો ઘાયલ છે

ઘણા જૈન શ્રદ્ધાળુઓ ઘાયલ થયાના અહેવાલ છે. અકસ્માતની માહિતી મળતા જ બારોટ કોતવાલી ઇન્સ્પેક્ટર ફોર્સ સાથે ઘટનાસ્થળે પહોંચી ગયા અને બચાવ કામગીરી શરૂ કરી છે. સમયસર એમ્બ્યુલન્સ ન મળવાને કારણે, ઘાયલોને ઓટો રિક્ષામાં હોસ્પિટલ લઈ જવામાં આવી રહ્યા છે. પોલીસ અને શહેરી વહીવટીતંત્રના અધિકારીઓ અકસ્માત સ્થળે હાજર છે. અકસ્માતનું કારણ જાણવાના પ્રયાસો ચાલી રહ્યા છે. પોલીસ લોકોને બચાવવામાં સફળ રહી છે.