જયપુરમાં LPG ટેન્કરે કેમિકલ ભરેલા ટેન્કરને ટક્કર મારી, 5ના મોત

રાજસ્થાનના જયપુરમાં આજે સવારે લગભગ 5 વાગ્યે એક ભયાનક અકસ્માત સર્જાયો હતો. કેમિકલ ભરેલા ટેન્કરને LPG ભરેલી ટ્રકે ટક્કર મારી હતી. અથડામણ થતાં જ બંને વાહનોમાં વિસ્ફોટ થયો અને આગ લાગી ગઈ. આસપાસના વાહનો પણ આગની લપેટમાં આવી ગયા હતા, જેના કારણે 5 લોકોના મોત થયા હતા અને 15થી વધુ લોકો ખરાબ રીતે દાઝી ગયા હતા. આ અકસ્માતમાં 20થી વધુ વાહનોનો સમાવેશ થાય છે.

જેમાં એક બસનો પણ સમાવેશ થાય છે, જેના મુસાફરોએ સમયસર ઉતરીને પોતાનો જીવ બચાવ્યો હતો. એક ફેક્ટરીમાં પણ આગ લાગી હતી અને તે બળીને્ રાખ થઈ ગઈ હતી. અકસ્માતને કારણે અજમેર હાઈવે પર વાહનવ્યવહાર બંધ થઈ ગયો છે. ફાયર બ્રિગેડના જવાનોએ સિવિલ ડિફેન્સ પોલીસ અને સ્થાનિક લોકોની મદદથી અકસ્માતગ્રસ્ત વાહનોમાંથી લોકોને બહાર કાઢી હોસ્પિટલમાં ખસેડ્યા હતા. મુખ્યમંત્રી ભજન લાલ અકસ્માતમાં પીડિતોને મળવા હોસ્પિટલ પહોંચ્યા.

મીડિયા રિપોર્ટ્સ અનુસાર આ અકસ્માત દિલ્હી પબ્લિક સ્કૂલની સામે પેટ્રોલ પંપની બહાર થયો હતો. ટેન્કરમાં વિસ્ફોટ થવાને કારણે તેમાં ભરેલું કેમિકલ રસ્તા પર વેરવિખેર થઈ ગયું હતું, જેના કારણે વાહનોમાં આગ લાગી હતી. ટેન્કરની પાછળ આવતી સ્લીપર બસ પણ બળી ગઈ છે. હાઈવેની બાજુમાં બનેલી ફેક્ટરીના પાઈપમાં પણ આગ લાગી હતી, જેના કારણે ફેક્ટરી બળીને ખાખ થઈ ગઈ હતી. ઘાયલોને જયપુરની સવાઈ માનસિંહ હોસ્પિટલમાં સારવાર આપવામાં આવી રહી છે.

રાજ્યભરમાંથી 30થી વધુ એમ્બ્યુલન્સ, ફાયર બ્રિગેડના વાહનો અને પોલીસની ટીમો ઘટનાસ્થળે હાજર છે. પોલીસ વિભાગના ઉચ્ચ અધિકારીઓ પણ ઘટના સ્થળે પહોંચી ગયા હતા. અકસ્માત સ્થળે કેમિકલ અને સીએનજીની દુર્ગંધના કારણે બચાવમાં મુશ્કેલી પડી હતી. આગના કારણે આકાશમાં કાળા ધુમાડાના ગોટેગોટા છવાઈ ગયા છે, જેના કારણે સામાન્ય લોકોને શ્વાસ લેવામાં પણ તકલીફ અને આંખોમાં બળતરાનો સામનો કરવો પડ્યો હતો. સદ્નસીબે પેટ્રોલ પંપ આગની ઝપેટમાં આવ્યો ન હતો.