Justice BR Gavai બનશે દેશના નવા ચીફ જસ્ટિસ, CJI સંજીવ ખન્નાએ કરી ભલામણ

બુધવાર, 16 એપ્રિલ, 2025 ના રોજ, ભારતના વર્તમાન ચીફ જસ્ટિસ સંજીવ ખન્નાએ કેન્દ્રીય કાયદા મંત્રાલયને જસ્ટિસ બી.આર. ગવઈને આગામી ચીફ જસ્ટિસ તરીકે નિયુક્ત કરવાની ભલામણ કરી છે. જસ્ટિસ ગવઈ (Justice BR Gavai) 14 મે, 2025 ના રોજ દેશના 52 માં ચીફ જસ્ટિસ તરીકે શપથ લેશે. વર્તમાન ચીફ જસ્ટિસ સંજીવ ખન્ના 13 મેના રોજ નિવૃત્ત થશે. જસ્ટિસ બી.આર. ગવઈ (Justice BR Gavai) અનુસૂચિત જાતિમાંથી આવનારા બીજા ચીફ જસ્ટિસ હશે. તેમના પહેલાં જસ્ટિસ કે.જી. બાલાકૃષ્ણન પણ અનુસૂચિત જાતિના ચીફ જસ્ટિસ રહી ચૂક્યા છે.

છ મહિનાનો કાર્યકાળ...

જસ્ટિસ બી.આર. ગવઈ (Justice BR Gavai) પદ સંભાળ્યાના છ મહિના બાદ એટલે કે નવેમ્બર 2025 માં નિવૃત્ત થશે. જસ્ટિસ ગવઈ (Justice BR Gavai) મહારાષ્ટ્રના અમરાવતીના વતની છે. તેમણે વર્ષ 1985 માં વકીલ તરીકે કામ શરૂ કર્યું હતું. તે સમયે તેઓ મહારાષ્ટ્રના પૂર્વ એડવોકેટ જનરલ અને બાદમાં મહારાષ્ટ્ર હાઈકોર્ટના જજ રહેલા બેરિસ્ટર રાજા ભોસલે સાથે કામ કરતા હતા. જસ્ટિસ ગવઈએ બોમ્બે હાઈકોર્ટમાં વર્ષ 1987 થી 1990 સુધી વકીલાત કરી હતી.

બુલડોઝર એક્શન પર ઉઠાવ્યા હતા સવાલ...

જસ્ટિસ બી.આર. ગવઈને વર્ષ 1992 માં બોમ્બે હાઈકોર્ટની નાગપુર બેન્ચમાં મહારાષ્ટ્ર સરકારના આસિસ્ટન્ટ પ્લીડર અને આસિસ્ટન્ટ પબ્લિક પ્રોસિક્યુટર તરીકે નિયુક્ત કરવામાં આવ્યા હતા. તેઓ વર્ષ 2003 માં હાઈકોર્ટના એડિશનલ જજ બન્યા. જસ્ટિસ બી.આર. ગવઈ વર્ષ 2019 માં સુપ્રીમ કોર્ટમાં આવ્યા અને હવે તેઓ દેશના સર્વોચ્ચ ન્યાયિક પદને શોભાવશે. ગત વર્ષે જસ્ટિસ ગવઈએ બુલડોઝર એક્શન પર સવાલ ઉઠાવ્યા હતા.

સોમવાર, 14 એપ્રિલ, 2025 ના રોજ ભીમરાવ આંબેડકરની જન્મજયંતિ પર જસ્ટિસ બી.આર. ગવઈએ કહ્યું હતું કે, બંધારણના નિર્માણ માટે રાષ્ટ્ર હંમેશા તેમનો આભારી રહેશે. સુપ્રીમ કોર્ટ પરિસરમાં જસ્ટિસ ગવઈએ કહ્યું, "રાષ્ટ્ર હંમેશા ડૉ. આંબેડકરનો આભારી રહેશે, કારણ કે તેમણે અને તેમના સહયોગીઓએ બંધારણ તૈયાર કર્યું. ભારત મજબૂત છે, પ્રગતિ કરી રહ્યું છે અને વિશ્વના સૌથી ઝડપથી વિકાસ પામતા દેશોમાંનો એક છે. આ તેમનું દર્શન, વિચારધારા અને દૂરંદેશી જ છે જે આપણને એક અને મજબૂત બનાવે છે."

જસ્ટિસ બી.આર. ગવઈની ચીફ જસ્ટિસ તરીકેની નિયુક્તિ માત્ર ન્યાયતંત્ર માટે જ નહીં, પરંતુ સમગ્ર દલિત સમુદાય માટે ગૌરવની ક્ષણ છે. તેમના અનુભવ, નિષ્પક્ષ અભિગમ અને બંધારણીય મૂલ્યો પ્રત્યેની નિષ્ઠાથી તેઓ ભારતીય ન્યાયતંત્રને નવી ઊંચાઈઓ પર લઈ જશે તેવી આશા છે.