ઈરાનની મદદ માટે ભારત આગળ; મોકલી મેડિકલ સહાય

પશ્ચિમ એશિયામાં ચાલી રહેલા ભયાનક સંઘર્ષ અને વધતા તણાવ વચ્ચે ભારતે ફરી એકવાર પોતાની 'વસુધૈવ કુટુંબકમ'ની ભાવનાને સાર્થક કરી છે.

ઈરાન, ઈઝરાયેલ અને અમેરિકા વચ્ચે ચાલી રહેલા યુદ્ધના 19મા દિવસે ભારતે માનવીય ધોરણે મેડિકલ સહાયનો પ્રથમ જથ્થો ઈરાન મોકલ્યો છે. બુધવારે તેહરાન પહોંચેલી આ સહાયને કારણે ઈરાનની હોસ્પિટલોમાં સારવાર લઈ રહેલા સેંકડો નાગરિકોને મોટી રાહત મળશે.

તેહરાન પહોંચી ભારતની મદદ

ભારત તરફથી મોકલવામાં આવેલી તબીબી સામગ્રી તેહરાનમાં 'ઈરાનિયન રેડ ક્રેસન્ટ સોસાયટી'ને સોંપવામાં આવી છે. આ ખેપમાં જીવનરક્ષક દવાઓ, ઈમરજન્સી મેડિકલ કિટ્સ અને અન્ય જરૂરી તબીબી સાધનોનો સમાવેશ થાય છે.

ઈરાની એમ્બેસીએ સોશિયલ મીડિયા પર આ સામગ્રીના ફોટો અને વીડિયો શેર કર્યા છે, જેમાં ભારતીય સહાયના બોક્સ રેસ્ક્યુ ટીમો દ્વારા સ્વીકારવામાં આવી રહ્યા છે.

ભારતની આ ત્વરિત મદદ બદલ ભારતમાં સ્થિત ઈરાની દૂતાવાસે નિવેદન જારી કરીને કહ્યું છે કે, "અમે ભારતના દયાળુ લોકોનો હૃદયપૂર્વક આભાર માનીએ છીએ." ઈરાને આ પગલાને સદ્ભાવના અને માનવીય સહયોગનું ઉત્તમ ઉદાહરણ ગણાવ્યું છે.

ખાસ કરીને જ્યારે પ્રદેશમાં હવાઈ હુમલા અને મિસાઈલ હુમલાઓને કારણે સામાન્ય નાગરિકો મોટી સંખ્યામાં ઈજાગ્રસ્ત થઈ રહ્યા છે, ત્યારે ભારતની આ મદદ ખૂબ જ કિંમતી સાબિત થશે.

ઉલ્લેખનીય છે કે ઈરાન અને ઈઝરાયેલ વચ્ચેનો સંઘર્ષ હવે 19મા દિવસમાં પ્રવેશ્યો છે. આંતરરાષ્ટ્રીય રાજનીતિ અને રણનીતિક તણાવ વચ્ચે પણ ભારતે નાગરિકોના જીવ બચાવવા પર ધ્યાન કેન્દ્રિત કર્યું છે. ઈરાનની હોસ્પિટલો હાલમાં ઈજાગ્રસ્તોથી ભરાઈ ગઈ છે અને તબીબી પુરવઠાની ભારે અછત વર્તાઈ રહી છે. આવી સ્થિતિમાં ભારતની મદદ આશાનું કિરણ બનીને આવી છે.

વૈશ્વિક રાહત કાર્યોમાં ભારતની ભૂમિકા

ભારત હંમેશા આંતરરાષ્ટ્રીય સંકટ સમયે અન્ય દેશોની મદદે આવતું રહ્યું છે. પછી તે ભૂકંપ હોય, કુદરતી આફત હોય કે યુદ્ધની સ્થિતિ, ભારતે પોતાની તબીબી ક્ષમતા અને સંસાધનો દ્વારા વિશ્વમાં રક્ષકની ભૂમિકા ભજવી છે. આ મેડિકલ એડ મોકલવાનો નિર્ણય પણ ભારતની સ્વતંત્ર વિદેશ નીતિ અને માનવતાવાદી અભિગમનું પ્રતીક છે.