શું કઈ નવા જૂની થવાની તૈયારી? ગૃહમંત્રી અમિત શાહે રાષ્ટ્રપતિ દ્રૌપદી મુર્મૂ સાથે કરી બેઠક...

જમ્મુ-કાશ્મીરના પહેલગામમાં થયેલા આતંકી હુમલાને પગલે ભારત સરકારે કડક પગલાં લેવાનું શરૂ કરી દીધું છે. બુધવારે પાકિસ્તાન વિરુદ્ધ પાંચ આકરા નિર્ણયો લીધા બાદ, આજે ગુરુવારે વિદેશ મંત્રી એસ. જયશંકર અને ગૃહમંત્રી અમિત શાહે રાષ્ટ્રપતિ દ્રૌપદી મુર્મૂ સાથે મુલાકાત કરી. આ ઉચ્ચ સ્તરીય બેઠક સુરક્ષાની ગંભીર સ્થિતિ અને આગામી રણનીતિઓ પર ચર્ચા કરવાના સંદર્ભમાં અત્યંત મહત્વની માનવામાં આવી રહી છે.

આ સાથે જ વિદેશ મંત્રાલય (MEA) માં પણ એક મહત્વપૂર્ણ બેઠક યોજાઈ હતી, જેમાં અનેક દેશોના રાજદૂતોને બોલાવવામાં આવ્યા હતા. આ સંદર્ભે જર્મની, જાપાન, પોલેન્ડ, બ્રિટન અને રશિયા સહિત અનેક દેશોના રાજદૂતો સાઉથ બ્લોકમાં આવેલા વિદેશ મંત્રાલયના કાર્યાલયે પહોંચ્યા હતા. આ રાજદ્વારીઓને પહેલગામ આતંકી હુમલાની વિસ્તૃત માહિતી આપવામાં આવી રહી છે અને ભારતની સુરક્ષા સંબંધિત ચિંતાઓથી અવગત કરાવવામાં આવી રહ્યા છે. વિદેશ સચિવ વિક્રમ મિસ્રીએ તમામ દેશોના રાજદૂતોને લગભગ 30 મિનિટ સુધી બ્રીફિંગ આપી હતી. ચીનના રાજદૂત ઝૂ ફેઇહોંગને પણ વિદેશ મંત્રાલયના મુખ્યાલયમાં બોલાવવામાં આવ્યા હતા.

મળતી માહિતી અનુસાર, MEA ના વરિષ્ઠ અધિકારીઓએ તેમને હુમલા પાછળ સંભવિત આતંકવાદી સંગઠનો, પાકિસ્તાનની ભૂમિકા અને સુરક્ષા એજન્સીઓ દ્વારા કરવામાં આવેલી કાર્યવાહી વિશે માહિતી આપી હતી.

સેના પ્રમુખ જનરલ ઉપેન્દ્ર દ્વિવેદી પોતે શુક્રવારે પરિસ્થિતિની સમીક્ષા કરશે અને બૈસરનમાં હુમલા સ્થળની મુલાકાત લેશે. તેઓ ત્યાં લશ્કરી કમાન્ડરો અને સ્થાનિક અધિકારીઓ સાથે સુરક્ષા વ્યવસ્થાની સમીક્ષા કરશે અને આગળની રણનીતિ નક્કી કરશે. સેનાનું આ પગલું આતંકવાદ સામે નિર્ણાયક કાર્યવાહીની દિશામાં એક મજબૂત સંકેત માનવામાં આવી રહ્યું છે.

બીજી તરફ, સુરક્ષા એજન્સીઓએ પહેલગામ અને આસપાસના વિસ્તારોમાં તલાશી અભિયાન વધુ તેજ કરી દીધું છે. પ્રાથમિક તપાસમાં સરહદ પારથી આતંકવાદીઓની ઘૂસણખોરી અને તેમના સ્થાનિક નેટવર્કની આશંકા વ્યક્ત કરવામાં આવી છે. NIA, IB અને લશ્કરી ગુપ્તચર એજન્સીઓ હુમલા સાથે જોડાયેલા દરેક પાસાની ઊંડાણપૂર્વક તપાસ કરી રહી છે. ઘટના સ્થળેથી મળી આવેલા હથિયારો અને સાધનોની તપાસ દ્વારા આતંકવાદીઓના સ્ત્રોત અને સહાયક તંત્રનો પતો લગાવવામાં આવી રહ્યો છે.