PoK પર દાવો નહીં ચાલે, પાકિસ્તાનના સેના પ્રમુખના નિવેદન પર ભારતનો જડબાતોડ જવાબ

ભારતે પાકિસ્તાની સેના પ્રમુખ જનરલ અસીમ મુનીરની તાજેતરની ટિપ્પણીઓને સખત રીતે નકારી કાઢી છે, જેમાં તેમણે દાવો કર્યો હતો કે, કાશ્મીર ઇસ્લામાબાદની 'ગળાની નસ' છે. ભારતીય વિદેશ મંત્રાલયે પાડોશી દેશને સ્પષ્ટ અને આકરો જવાબ આપતા કહ્યું કે, પાકિસ્તાનનો 'કાશ્મીર સાથેનો એકમાત્ર સંબંધ' એ છે કે તે ગેરકાયદેસર રીતે કબજે કરેલા વિસ્તારને ખાલી કરે.

'PoK ભારતનું અભિન્ન અંગ'

વિદેશ મંત્રાલયના પ્રવક્તા રણધીર જાયસવાલે સ્પષ્ટ શબ્દોમાં કહ્યું કે, કોઈ વિદેશી વસ્તુ આપણા ગળામાં કેવી રીતે ફસાઈ શકે? કાશ્મીર ભારતનો કેન્દ્રશાસિત પ્રદેશ છે. તેનો પાકિસ્તાન સાથે એકમાત્ર સંબંધ એ છે કે તે ગેરકાયદેસર રીતે કબજે કરેલા વિસ્તારોને તાત્કાલિક ખાલી કરે. ભારતે ફરી એકવાર સ્પષ્ટ કર્યું કે પાકિસ્તાન અધિકૃત કાશ્મીર (PoK) ભારતનો અભિન્ન ભાગ છે અને રહેશે.

પાકિસ્તાનને આસામના CM નો આકરો જવાબ...

આ પહેલાં આસામના CM  હિમંત બિસ્વા સરમાએ પણ પાકિસ્તાની સેના પ્રમુખ જનરલ અસીમ મુનીરની તાજેતરની ટિપ્પણીઓ પર આકરી પ્રતિક્રિયા વ્યક્ત કરી હતી. તેમણે કહ્યું હતું કે, હવે સમય આવી ગયો છે કે ભારત સત્યને સ્વીકારે અને પાકિસ્તાન સાથે ગાઢ સંબંધો બનાવવાની આશા છોડી દે. તેમણે વધુમાં જણાવ્યું હતું કે, મુનીરનું આ નિવેદન દ્વિ-રાષ્ટ્ર સિદ્ધાંતને પુષ્ટ કરે છે, જેણે 1947 માં પાકિસ્તાનના નિર્માણનો પાયો નાખ્યો હતો. સરમાએ પાકિસ્તાનને તેની હકીકત સ્વીકારવાની સલાહ આપી હતી.

મેહુલ ચોક્સી પર શું બોલ્યા જાયસવાલ...

ભાગેડુ હીરા વેપારી મેહુલ ચોક્સીના મુદ્દે પણ ભારતીય વિદેશ મંત્રાલયનું નિવેદન સામે આવ્યું છે. વિદેશ મંત્રાલયના પ્રવક્તા રણધીર જાયસવાલે સાપ્તાહિક પ્રેસ વાર્તામાં જણાવ્યું હતું કે અમારા પ્રત્યાર્પણ વિનંતીના આધારે મેહુલ ચોક્સીની ધરપકડ કરવામાં આવી છે. અમે તેના પ્રત્યાર્પણ માટે બેલ્જિયમ પક્ષ સાથે મળીને કામ કરી રહ્યા છીએ. ભારત મેહુલ ચોક્સીને પરત લાવવા માટે તમામ પ્રયાસો કરી રહ્યું છે.

ભારતનું આ સખત વલણ પાકિસ્તાનને સ્પષ્ટ સંદેશ આપે છે કે કાશ્મીર પર કોઈપણ પ્રકારનો દાવો ભારત સ્વીકારશે નહીં. આ સાથે જ આસામના CM નું નિવેદન પણ પાકિસ્તાન સાથેના સંબંધોને લઈને ભારતના બદલાયેલા વલણને દર્શાવે છે. મેહુલ ચોક્સીના મુદ્દે પણ ભારત આંતરરાષ્ટ્રીય સ્તરે તેની કાયદેસરની કાર્યવાહી ચાલુ રાખવા માટે મક્કમ છે.