ગુરુગ્રામ: સિવિલ હોસ્પિટલમાં પ્રેમીનો એસિડ અટેક

ગુરુગ્રામના સેક્ટર 10Aમાં આવેલી સિવિલ હોસ્પિટલના પરિસરમાં રવિવારે રાત્રે એક હૃદયદ્રાવક ઘટના બની છે. એક 30 વર્ષીય યુવતી, જે અગાઉ થયેલી મારપીટની સારવાર માટે હોસ્પિટલ આવી હતી, તેના પર તેના જ લિવ-ઈન પાર્ટનરે એસિડ ફેંકી દીધો હતો.

આ ઘટનાથી હોસ્પિટલ સ્ટાફ અને દર્દીઓમાં ભારે ગભરાટ ફેલાયો હતો. જોકે, ગનીમત રહી કે એસિડ યુવતીના કપડાં પર પડ્યો, જેના કારણે તેના કપડાં બળી ગયા હતા પણ તેને કોઈ શારીરિક ઈજા થઈ નથી.

મૂળ નૂહની રહેવાસી પીડિત યુવતી કામની શોધમાં 4 વર્ષ પહેલાં ગુરુગ્રામ આવી હતી. અહીં તેની ઓળખાણ રેવાડીના રહેવાસી પવન કુમાર સાથે થઈ હતી. ત્યારબાદ બંને સેક્ટર 72 ના એક ફ્લેટમાં લિવ-ઈન રિલેશનશિપમાં રહેતા હતા.

પ્રાથમિક તપાસ મુજબ, રવિવારે બંને વચ્ચે કોઈ વાતને લઈને ભારે વિવાદ થયો હતો, જેમાં પવને યુવતી સાથે મારપીટ કરી હતી.

હોસ્પિટલમાં એસિડ ફેંક્યો

મારપીટથી ઘાયલ યુવતી સારવાર માટે સિવિલ હોસ્પિટલ પહોંચી હતી. પરંતુ, કળિયુગી પ્રેમી પવન તેનો પીછો કરતો હોસ્પિટલ સુધી આવી પહોંચ્યો અને હોસ્પિટલ પરિસરમાં જ તેના પર એસિડ ફેંકી દીધો. એસિડ હુમલા બાદ યુવતીના કપડાં બળી ગયા હતા, પરંતુ તેને ડોક્ટરો દ્વારા તપાસ્યા બાદ સુરક્ષિત જાહેર કરી રાત્રે જ રજા આપી દેવામાં આવી હતી.

ઘટનાની જાણ થતાં જ સેક્ટર 10A પોલીસ સ્ટેશનની ટીમ હોસ્પિટલ પહોંચી હતી અને યુવતીનું નિવેદન નોંધ્યું હતું. મારપીટ અંગે બાદશાહપુર પોલીસ સ્ટેશનમાં ગુનો નોંધવામાં આવ્યો હતો.

સોમવારે સવારે, સેક્ટર 10 ક્રાઈમ બ્રાન્ચની ટીમે કાર્યવાહી કરી આરોપી પવન કુમારની ગુરુગ્રામમાંથી ધરપકડ કરી લીધી છે. પોલીસ હવે એસિડની આ ઘટના અંગે તેની પૂછપરછ કરી રહી છે અને એસિડ ક્યાંથી લાવ્યો તેની પણ તપાસ કરી રહી છે. આ મામલે અન્ય બે શંકાસ્પદોને પણ કસ્ટડીમાં લેવામાં આવ્યા છે.