મહાકુંભમાં ગુજરાતીઓનો દબદબો, દર ચોથો યાત્રિક ગુજરાતી 

કુંભમાં ત્રીસ લાખ જેટલા ગુજરાતી યાત્રિકોએ શાહી સ્નાનનો લાભ લીધો હતો. આ અંગે વાત કરતાં, સેક્ટર-20માં આવેલા નિરંજની અખાડાના સાધુ હર્ષવર્ધનગિરીએ જણાવ્યું હતું કે, "અહીં દર ચોથા યાત્રિકે એક ગુજરાતી જોવા મળે છે. ખાસ કરીને, ગુજરાતના સૌરાષ્ટ્ર અને કચ્છના લોકો અહીં વિશેષ પ્રમાણમાં આવ્યા છે. પ્રયાગ માટેની સીધી ફ્લાઈટ્સ અને સ્પેશ્યલ ટ્રેનોએ ગુજરાતના યાત્રિકોને વધુ સુગમતા પૂરી પાડી છે.

જ્યારે શાહી સ્નાન હતું, ત્યારે એક જ દિવસમાં ત્રણેક કરોડ લોકોએ મહાકુંભમાં સ્નાનનો લ્હાવો લીધો હતો. જો કે, નદીનો કિનારો 48 કિલોમીટર લંબાઈ ધરાવતો હોવાથી, કોઈ પણ યાત્રિક કુંભ સ્નાન માટે કોઈપણ સ્થળે જઈ શકે છે. વેરાવળથી શરૂ થયેલી પ્રયાગરાજ સ્પેશ્યલ ટ્રેનમાં હાલમાં અનેક યાત્રિકો કુંભની તરફ પ્રસ્થાન કરી રહ્યા છે. આ વખતે, ઉત્તર પ્રદેશ સરકાર વધુ સક્રિય બનીને મહાકુંભની વ્યવસ્થા ને સુગમ અને આરામદાયક બનાવવામાં સક્રિય રહી છે.

ઉત્તર પ્રદેશ સરકાર દ્વારા દરેક સેક્ટરમાં મેડિકલ વાન અને એમ્બ્યુલન્સની સુવિધાઓ ઉપલબ્ધ કરાવવામાં આવી છે, જેથી યાત્રિકોને સગવડતા મળે. તેમ છતાં, ક્યારેક-ક્યારેક કેટલાક યાત્રિકોને હાર્ટ એટેક આવવાના સમાચાર મળે છે. ખાસ કરીને મેડિકલ હિસ્ટરી ધરાવનારા યાત્રિકોએ વધુ સાવધાની રાખવી જોઈએ. પ્રયાગરાજની હોસ્પિટલોમાં પણ આ કારણસર ભારે ભીડ જોવા મળી છે. આ સમયે ભીડ થોડી ઘટી છે, પરંતુ આગામી 29મી જાન્યુઆરીએ ફરીથી શાહી સ્નાન હોવાથી લોકોની ભીડ ફરી વધશે. આ માટે દરેક યાત્રિકે પોતાની સગવડતા, સ્વાસ્થ્ય અને ક્ષમતાને ધ્યાનમાં રાખી કુંભમાં પહોંચવું જોઈએ.