ભારતીય સંસદના બજેટ સત્રના બીજા તબક્કાની શરૂઆત આજે એક ભાવુક અને ગૌરવશાળી રજૂઆત સાથે થઈ હતી. ગુજરાતના રાજ્યસભા સાંસદ અને જાણીતા હીરા ઉદ્યોગપતિ ગોવિંદભાઈ ધોળકિયાએ દેશના દિગ્ગજ ઉદ્યોગપતિ સ્વ. રતન ટાટાને મરણોત્તર 'ભારત રત્ન' એનાયત કરવાની માંગ કરી છે.
ગૃહમાં રતન ટાટાના પ્રદાનને યાદ કરતા ધોળકિયાએ જણાવ્યું હતું કે, રતન ટાટા માત્ર ઉદ્યોગપતિ નહોતા, પરંતુ કરોડો ભારતીયો માટે એક માર્ગદર્શક અને સાચા દેશભક્ત હતા.
રતન ટાટાનો દેશપ્રેમ સર્વોપરી: ધોળકિયા
રાજ્યસભામાં મુદ્દો ઉઠાવતા ગોવિંદ ધોળકિયાએ કહ્યું હતું કે, રતન ટાટાએ હંમેશા દેશહિતને નફા કરતા ઉપર રાખ્યું છે. તેમણે પોતાની સંપત્તિનો મોટો હિસ્સો કેન્સરના દર્દીઓની સારવાર અને હોસ્પિટલો પાછળ ખર્ચ્યો છે.
મધ્યમ વર્ગના લોકોનું કારનું સપનું પૂરું કરવા માટે 'નેનો' લાવવાની વાત હોય કે નવા યુગના સ્ટાર્ટઅપ્સને આર્થિક ટેકો આપવાની, રતન ટાટા દરેક ક્ષણે યુવા પેઢીના પ્રેરણાસ્ત્રોત રહ્યા છે.
કોણ છે ગોવિંદ ધોળકિયા?
78 વર્ષીય ગોવિંદ ધોળકિયા (જેઓ પ્રેમથી ગોવિંદકાકા તરીકે ઓળખાય છે) સુરતના હીરા ઉદ્યોગના ભીષ્મ પિતામહ ગણાય છે. રામકૃષ્ણ ડાયમંડ્સ (SRK) ના ચેરમેન ગોવિંદભાઈએ માત્ર સાત ચોપડી ભણીને આજે 6000 થી વધુ લોકોને રોજગારી આપતું સામ્રાજ્ય ઊભું કર્યું છે.
મૂળ અમરેલી જિલ્લાના લાઠીના વતની એવા ધોળકિયાએ જળસંચય અને આરોગ્ય ક્ષેત્રે પાયાનું કામ કર્યું છે. વડાપ્રધાન નરેન્દ્ર મોદીના અંગત મિત્ર ગણાતા ધોળકિયાને તેમની સામાજિક સેવાઓ બદલ માનદ પીએચ.ડી.ની પદવી પણ એનાયત થયેલી છે.
સમગ્ર દેશે કરી છે પ્રશંસા
ગોવિંદ ધોળકિયાએ ગૃહમાં ટાટા જૂથના નૈતિક મૂલ્યોનો ઉલ્લેખ કરતા કહ્યું કે, રતન ટાટાએ જે નમ્રતા અને સાદગી સાથે જીવન જીવ્યું તે સમગ્ર વિશ્વ માટે ઉદાહરણ છે. ભારત સરકારે અનેક મહાનુભાવોને સન્માનિત કર્યા છે, ત્યારે રતન ટાટા જેવા રત્નને સર્વોચ્ચ નાગરિક સન્માન 'ભારત રત્ન' આપીને દેશનું ગૌરવ વધારવું જોઈએ.
નોંધનીય છે કે 2024માં ગોવિંદ ધોળકિયા સહિત જે.પી. નડ્ડા, મયંક નાયક અને જશવંતસિંહ પરમારને ગુજરાતમાંથી રાજ્યસભા મોકલવામાં આવ્યા હતા. ગોવિંદકાકાની આ માંગણીને સોશિયલ મીડિયા પર અને દેશભરના ઉદ્યોગ જગતમાં વ્યાપક સમર્થન મળી રહ્યું છે.

રતન ટાટાને 'ભારત રત્ન' આપો

રાજ્યસભામાં ગોવિંદ ધોળકિયાએ રતન ટાટાના દેશપ્રેમ અને સેવાને બિરદાવ્યા

March 9, 2026 | 15:39 IST