તેલંગાણામાં ગોદાવરી નદીમાં એક જ પરિવારના 5 યુવકો ડૂબ્યા, સમગ્ર વિસ્તારમાં શોકનો માહોલ

તેલંગાણા રાજ્યના નિર્મલ જિલ્લાના બસર શહેરમાં એક ગંભીર દુર્ઘટના સર્જાઈ છે, જ્યાં ધાર્મિક કાર્યક્રમ દરમિયાન ગોદાવરી નદીમાં પવિત્ર સ્નાન માટે ગયેલા એક જ પરિવારના 5 યુવકો ડૂબી જતા મૃત્યુ પામ્યા છે. મૃતક યુવકો હૈદરાબાદના ચિંતલ વિસ્તારના રહેવાસી હતા.

પ્રાપ્ત માહિતી મુજબ, હૈદરાબાદમાંથી 3 પરિવારો કુલ 18 સભ્યો સાથે બસર ખાતે આવેલા હતા. અહીં ગોદાવરી નદી કિનારે આવેલા પ્રાચીન સરસ્વતી માતાના મંદિરમાં બાળકો માટે "અક્ષરાભિષેક" વિધિ યોજવામાં આવી હતી. માન્યતા અનુસાર, બાળકોના શૈક્ષણિક જીવનની સફળતાને અભીમુખ કરવા માટે આ મંદિરમાં અક્ષર લખાવવાનું મહત્વ છે.

વિશિષ્ટ ધાર્મિક વિધિ શરૂ કરતા પહેલાં, તમામ સભ્યો નદીમાં પવિત્ર સ્નાન માટે ઊતરી ગયા હતા. પરંતુ નદીના ઊંડા ભાગમાં જતા એક જ પરિવારના 5 યુવકો નદીના તીવ્ર પ્રવાહમાં ફસાઈ ગયા અને ડૂબી ગયા. દૂર્ઘટનામાં મૃત્યુ પામેલા યુવકોના નામ રાકેશ, વિનોદ, મદન, રુતિક અને ભરત તરીકે ઓળખવામાં આવ્યા છે. તેઓ તમામ 20 વર્ષથી ઓછી ઉંમરના હતા.

પ્રત્યક્ષદર્શીઓએ જણાવ્યું કે, દૂર્ઘટનાની ક્ષણે સ્થાનિક લોકો અને પોલીસ તત્કાલ ઘટના સ્થળે પહોંચ્યા હતા. તરવૈયાઓની મદદથી મૃતદેહોને બહાર લાવવામાં આવ્યા હતા અને પીએમ (પોસ્ટમોર્ટમ) માટે ભૈંસા સરકારી હોસ્પિટલ ખાતે ખસેડવામાં આવ્યા હતા.

ઉપરવાસમાં તાજેતરમાં થયેલા ભારે વરસાદને કારણે નદીમાં પાણીનું સ્તર અને પ્રવાહ બમણી ઝડપથી વધી ગયો હતો, જેના કારણે આ દૂર્ઘટના સર્જાઈ હતી.

રાજ્યના પરિવહન અને બીસી કલ્યાણ મંત્રી પોન્નમ પ્રભાકરે દુર્ઘટનાને લઇ દુઃખ વ્યક્ત કર્યું છે. તેમણે મૃતક પરિવારજનો માટે સંવેદના વ્યક્ત કરીને નદીઓ અને જળાશયો પાસે સાવચેત રહેવાની અપીલ કરી છે. આ સાથે જ તેમણે અધિકારીઓને તમામ જળપ્રકલ્પો અને નદીઓ પર ચેતવણી સૂચક બોર્ડ લગાવવાના નિર્દેશ આપ્યા છે.