ગુજરાત-રાજસ્થાન સહિત અનેક રાજ્યોમાં મની લોન્ડરિંગ કેસમાં EDના દરોડા, રિટર્નની લાલચ આપી છેતરપિંડી

એન્ફોર્સમેન્ટ ડિરેક્ટોરેટ (ED) દ્વારા ગુરુવારથી ગુજરાત, રાજસ્થાન અને દિલ્હીમાં મોટાપાયે દરોડા પાડવામાં આવ્યા છે. આ દરોડા લગભગ રૂપિયા 2700 કરોડના મની લોન્ડરિંગના કેસ સંબંધિત છે. સૂત્રોના જણાવ્યા મુજબ, EDના દરોડા રાજસ્થાનના સિકર, જયપુર, જોધપુર, ઝુનઝુનુ, ગુજરાતના અમદાવાદ અને દિલ્હીમાં કુલ 24થી વધુ સ્થળોએ પાડવામાં આવ્યા છે.

આ દરોડાની કાર્યવાહી ‘NEXA Evergreen’ નામના પ્રોજેક્ટ સાથે જોડાયેલી છે. આ પ્રોજેક્ટ હેઠળ રોકાણકારોને એવું વચન આપવામાં આવતું હતું કે, તેમને ચોક્કસ સમયગાળા પછી ફ્લેટ, પ્લોટ કે ઊંચા વ્યાજ સાથે પૈસા પરત મળશે. રાજસ્થાન પોલીસ દ્વારા આ મામલે પહેલાંથી જ અનેક લોકો વિરુદ્ધ FIR નોંધાઈ હતી અને હવે મની લોન્ડરિંગ એક્ટ હેઠળ પણ કાર્યવાહી હાથ ધરાઈ છે.

NEXA Evergreen પ્રોજેક્ટ શું છે?

NEXA Evergreen કંપની 17 એપ્રિલ 2021ના રોજ અમદાવાદમાં નોંધાઈ હતી. કંપનીનું કામ રિયલ એસ્ટેટ સંબંધિત હોવાનું જણાયું છે. આ કંપનીના માલિક સુભાષ બિજારનિયા અને રણવીર બિજારનિયા છે, જે સિકરના પનલાવાના રહેવાસી છે. તેમણે ધોલેરા સ્માર્ટ સિટીના નામે મોટી રકમ એકઠી કરી.

તપાસમાં જાણવા મળ્યું કે, રણવીર અને સુભાષે માત્ર NEXA Evergreen નહીં પણ NEXA Evergreen Developers, Evergreen Dholera, Dholera Developers સહિત 15થી વધુ કંપનીઓ બનાવેલી હતી. અલગ-અલગ બેંકોમાં અનેક ખાતા પણ ખોલવામાં આવ્યાં હતા. જેમાં ICICI, IDFC, HDFC, AU Small Bank સહિતની બેંકોનો સમાવેશ થાય છે. આ તમામ કંપનીઓમાં અલગ-અલગ ડિરેક્ટરો રાખીને લોકોમાં વિશ્વાસ ઊભો કરવાનો પ્રયાસ થયો હતો.

કેવી રીતે થઈ છેતરપિંડી?

આ કંપનીઓએ લોકોને ડબલ વ્યાજ, દર અઠવાડિયે વ્યાજ ટ્રાન્સફર, નવા ગ્રાહક લાવવા પર કમિશન જેવી લાલચ આપીને રોકાણ માટે પ્રેર્યા હતા. રોકાણ 50 હજાર રૂપિયાથી શરૂ થતું અને તેને 60 મહિના માટે જમા કરાવવાથી દર અઠવાડિયે 1352 રૂપિયા મળવાનો દાવો હતો. એટલું જ નહીં, 1 લાખ જમા કરાવનારને 2704 રૂપિયા દર અઠવાડિયે આપવામાં આવતાં.

કંપની દ્વારા દાવો કરવામાં આવતો કે, 14 મહિનામાં ગ્રાહકને રૂપિયા 50,000 પર રૂપિયા 81,120 મળે, જે વ્યાજસહિત પૂરું થયેલું દેખાતું હતું. લોકોના ખાતામાં દર મંગળવારે રાત્રે ટ્રાન્સફર થતી રકમ જોઈ લોકો વધારે રોકાણ કરવા લાગ્યા. ઘણા લોકોએ જમીન વેચીને પણ રોકાણ કર્યું.

EDની કાર્યવાહી અને પગલાં

આ છેતરપિંડી પ્રકરણમાં EDએ અત્યારસુધી ઘણા લોકોની પૂછપરછ શરૂ કરી છે અને મોટી સંખ્યામાં દસ્તાવેજી પુરાવાઓ એકઠા કર્યા છે. આ સમગ્ર સ્કેમમાં બ્લેક મનીના ચક્રવ્યુહ અને પૉન્ઝી સ્કીમની ભાનભણાતા EDએ મની લોન્ડરિંગ હેઠળ કાર્યવાહી શરૂ કરી છે.