ડૉ મનમોહન સિંહના રાજકીય સન્માન સાથે આજે થશે અંતિમ સંસ્કાર

પૂર્વ વડાપ્રધાન ડૉ.મનમોહન સિંહના પાર્થિવ દેહને તેમના ઘેર લઇ જવાયો છે. ઉલ્લેખનિય છે કે પૂર્વ વડાપ્રધાન મનમોહન સિંહનું ગુરુવારે રાત્રે AIIMSમાં નિધન થયું હતું. મનમોહન સિંહના અંતિમ સંસ્કાર શનિવારે કરવામાં આવશે. અમેરિકાથી તેમની દીકરી આવે તેની રાહ જોવાઈ રહી છે. મનમોહન સિંહના ઘરે શ્રદ્ધાંજલિ આપવા માટે નેતાઓ અને લોકોની કતાર લાગી છે.

કેન્દ્ર સરકારે ગુરુવારે પૂર્વ વડાપ્રધાન મનમોહન સિંહના નિધન પર સાત દિવસનો રાષ્ટ્રીય શોક જાહેર કર્યો છે. સત્તાવાર સૂત્રોએ આ માહિતી આપી છે. તેમના જણાવ્યા અનુસાર, ડૉ. મનમોહન સિંહના અંતિમ સંસ્કાર સંપૂર્ણ રાજ્ય સન્માન સાથે કરવામાં આવશે. સૂત્રોએ જણાવ્યું કે શુક્રવારના રોજ યોજાનાર તમામ સરકારી કાર્યક્રમો રદ કરવામાં આવ્યા છે. તેમણે કહ્યું કે શુક્રવારે કેન્દ્રીય કેબિનેટની બેઠક થશે, જેમાં પૂર્વ વડાપ્રધાનને શ્રદ્ધાંજલિ આપવામાં આવશે.

ડૉ.મનમોહન સિંહને ત્રણ દીકરીઓ છે, જેમાંથી એક અમૃત સિંહ અમેરિકામાં રહે છે. તેમના પરત આવવાની રાહ જોવાઈ રહી છે. તેમના નિધનની જાણકારી મળ્યા બાદ તે દિલ્હી જવા રવાના થઈ ગયા છે.

કોંગ્રેસે પૂર્વ વડાપ્રધાન મનમોહન સિંહના સન્માનમાં સાત દિવસ માટે તેના તમામ સત્તાવાર કાર્યક્રમો રદ કર્યા છે. મનમોહન સિંહનું ગુરુવારે નિધન થયું હતું. તેઓ 92 વર્ષના હતા. કોંગ્રેસ સંગઠનના મહાસચિવ કેસી વેણુગોપાલે સોશિયલ મીડિયા પ્લેટફોર્મ 'X' પર પોસ્ટ કર્યું છે કે દિવંગત પૂર્વ વડાપ્રધાન ડૉ. મનમોહન સિંહના સન્માનમાં, સ્થાપના દિવસની ઉજવણી સહિત ભારતીય રાષ્ટ્રીય કોંગ્રેસના તમામ સત્તાવાર કાર્યક્રમો આગામી સાત દિવસ માટે રદ કરવામાં આવ્યા છે. તેમણે કહ્યું કે આમાં તમામ આંદોલનાત્મક અને સંપર્ક કાર્યક્રમોનો સમાવેશ થાય છે. વેણુગોપાલે કહ્યું કે પાર્ટીના કાર્યક્રમો 3 જાન્યુઆરી, 2025થી ફરી શરૂ થશે. શોકના આ સમયગાળા દરમિયાન પક્ષનો ધ્વજ અડધી ઝુકાવશે.

પૂર્વ વડાપ્રધાન મનમોહન સિંહના સન્માનમાં ઓસ્ટ્રેલિયા સામેની ચોથી ટેસ્ટના બીજા દિવસે ભારતીય ક્રિકેટ ટીમના ખેલાડીઓ શુક્રવારે કાળી પટ્ટી પહેરીને મેદાનમાં ઉતર્યા હતા. ભારતના આર્થિક સુધારાના પિતા મનમોહન સિંહનું 92 વર્ષની વયે ગુરુવારે રાત્રે દિલ્હીમાં અવસાન થયું. તેઓ 2004-14 દરમિયાન ભારતના વડાપ્રધાન હતા. તેઓ 1991માં ભારતના આર્થિક ઉદારીકરણના આર્કિટેક્ટ તરીકે ઓળખાય છે. BCCIએ એક નિવેદનમાં જણાવ્યું હતું કે, "ભારતીય ટીમે પૂર્વ વડાપ્રધાન ડૉ. મનમોહન સિંહની સ્મૃતિના આદરના ચિહ્ન તરીકે કાળી પટ્ટી પહેરી છે."