સંરક્ષણ મંત્રી Rajnath Singh ની ઉચ્ચ સ્તરીય બેઠક, સેના પ્રમુખોની સાથે સ્થિતિનું આકલન કર્યું...

સંરક્ષણ મંત્રી રાજનાથ સિંહે (Rajnath Singh) શુક્રવારે સંરક્ષણ મંત્રાલયમાં એક અત્યંત મહત્વપૂર્ણ બેઠકની અધ્યક્ષતા કરી હતી. આ બેઠકમાં ચીફ ઓફ ડિફેન્સ સ્ટાફ જનરલ અનિલ ચૌહાણ, ત્રણેય સેનાઓના વડાઓ - વાયુસેના પ્રમુખ એર ચીફ માર્શલ એપી સિંહ, થલ સેના પ્રમુખ જનરલ ઉપેન્દ્ર દ્વિવેદી અને નૌસેના પ્રમુખ એડમિરલ દિનેશ કુમાર ત્રિપાઠી ઉપસ્થિત રહ્યા હતા. બેઠકમાં સંરક્ષણ સચિવ આરકે સિંહ પણ હાજર હતા.

આ બેઠકમાં આતંકવાદીઓ વિરુદ્ધ શરૂ કરાયેલા ઓપરેશન સિંદૂર અને ત્યારબાદની વર્તમાન પરિસ્થિતિની સમીક્ષા કરવામાં આવી હતી. બેઠકમાં પાકિસ્તાનના કારણે સરહદી વિસ્તારોમાં ઉભી થયેલી સમગ્ર પરિસ્થિતિની ચર્ચા કરવામાં આવી હતી. માનવામાં આવે છે કે, આ બેઠકમાં આગળની રણનીતિ અને સૈન્ય તૈયારીઓ પર પણ મંથન થયું હતું.

નોંધનીય છે કે, પાકિસ્તાને અત્યાર સુધી ભારતના અનેક સૈન્ય અને નાગરિક ઠેકાણાઓ પર હુમલો કર્યો છે, જેને ભારતીય સેનાઓએ સંપૂર્ણપણે નિષ્ફળ બનાવ્યો છે. આ સાથે જ ભારતે જબરદસ્ત જવાબી કાર્યવાહી પણ કરી છે. પાકિસ્તાન દ્વારા કરવામાં આવેલા ડ્રોન હુમલા પણ નિષ્ફળ કરવામાં આવ્યા છે અને પાકિસ્તાનને અહીં પણ મોટું નુકસાન થયું છે, તેના ઘણા ડ્રોન ભારતીય સેનાએ નષ્ટ કરી દીધા છે. આ ઉપરાંત પાકિસ્તાનના મિસાઇલ હુમલાઓને પણ અસરકારક રીતે નિષ્ફળ બનાવવામાં આવ્યા છે. સેનાએ આ અંગેની સંપૂર્ણ માહિતી સંરક્ષણ મંત્રીને આપી છે.

સેનાના જણાવ્યા અનુસાર, ભારતીય S-400 વાયુ સંરક્ષણ પ્રણાલીએ પાકિસ્તાનની આઠ મિસાઇલોને હવામાં જ નષ્ટ કરી દીધી હતી. આ તમામ મિસાઇલ હુમલા જમ્મુ કાશ્મીરમાં લક્ષ્યાંકિત હતા. ત્રણેય સેના પ્રમુખોએ જમ્મુ કાશ્મીરથી લઈને રાજસ્થાન સુધીના વિવિધ વિસ્તારોમાં પાકિસ્તાન દ્વારા કરવામાં આવેલા હુમલા અને તેની સામેની જવાબી કાર્યવાહીની માહિતી સંરક્ષણ મંત્રીને આપી છે. આ સાથે જ એ પણ જણાવવામાં આવ્યું છે કે કઈ રીતે ભારતના એર ડિફેન્સ સિસ્ટમે પાકિસ્તાનના હુમલાઓને નિષ્ફળ બનાવ્યા.

માનવામાં આવે છે કે, સેનાએ આ દરમિયાન જણાવ્યું હતું કે પાકિસ્તાને ક્યાં ક્યાં અને કયા કયા હથિયારોથી હુમલા કર્યા. ભારતીય પ્રતિક્રિયા શું રહી. ભારતના ત્રિસ્તરીય ડિફેન્સ સિસ્ટમે કઈ રીતે પાકિસ્તાની હુમલાઓને નિષ્ફળ બનાવ્યા. ભારતીય સેનાઓએ જવાબમાં કયા વિસ્તારોમાં અને શું શું કાર્યવાહી કરી. માહિતી અનુસાર, સંરક્ષણ મંત્રીને ભારતીય સેનાઓની તૈનાતી અને તૈયારીની પણ વિસ્તૃત માહિતી આપવામાં આવી છે.

પાકિસ્તાને ગત રાત્રે ભારતના ઘણા સૈન્ય ઠેકાણાઓને નિશાન બનાવવાનો નિષ્ફળ પ્રયાસ કર્યો હતો. પાકિસ્તાનના આ પ્રયાસોને ભારતના S-400 ડિફેન્સ સિસ્ટમે નિષ્ફળ કરી દીધા હતા. પાકિસ્તાને માત્ર લડાકુ વિમાનો જ નહીં પરંતુ ડ્રોન, રોકેટ અને મિસાઇલો દ્વારા પણ જમ્મુ કાશ્મીર, પઠાણકોટ, ફિરોઝપુર, કપૂરથલા, જલંધર, જેસલમેર અને પશ્ચિમી સરહદને અડીને આવેલા ઘણા વિસ્તારોમાં સૈન્ય ઠેકાણાઓ પર હુમલો કર્યો હતો.