રક્ષામંત્રી રાજનાથ સિંહની ગર્જના, પહેલગામ આતંકવાદી હુમલાનો જડબાતોડ જવાબ અપાશે...

જમ્મુ-કાશ્મીરના પહેલગામમાં થયેલા આતંકવાદી હુમલાને લઈને સમગ્ર દેશમાં આક્રોશની લાગણી ફેલાઈ છે. આતંકવાદીઓ અને તેમના આકા પાકિસ્તાન સામે કડક કાર્યવાહીની માંગણીઓ સતત વધી રહી છે. આ ભયાનક આતંકવાદી હુમલામાં 26 નિર્દોષ લોકોએ જીવ ગુમાવ્યા છે, જેમાં મોટાભાગના પ્રવાસીઓ હતા.

હવે, આ આતંકવાદી હુમલા અંગે રક્ષામંત્રી રાજનાથ સિંહનું પહેલું નિવેદન સામે આવ્યું છે. રાજનાથ સિંહે સ્પષ્ટ શબ્દોમાં કહ્યું છે કે આ આતંકવાદી હુમલાનો જડબાતોડ જવાબ આપવામાં આવશે.

સરકાર તમામ જરૂરી પગલાં લેશે : રાજનાથ સિંહ

દિલ્હીમાં એક કાર્યક્રમને સંબોધિત કરતા રક્ષામંત્રી રાજનાથ સિંહે કહ્યું, "આપણે અનેક નિર્દોષ લોકોનો જીવ ગુમાવ્યો છે. હું મૃતકોના પરિવારો પ્રત્યે સંવેદના વ્યક્ત કરું છું. આતંકવાદને લઈને ભારતની ઝીરો ટોલરન્સની નીતિ છે. હું દેશવાસીઓને ખાતરી આપવા માંગુ છું કે સરકાર તમામ જરૂરી પગલાં લેશે. આ આતંકવાદી હુમલાના દોષિતોની સાથે સાથે તેના પડદા પાછળ છુપાયેલા લોકો સુધી પણ પહોંચવામાં આવશે. હું દેશને ખાતરી આપવા માંગુ છું કે જડબાતોડ અને સ્પષ્ટ જવાબ આપવામાં આવશે." રાજનાથ સિંહે વધુમાં જણાવ્યું કે ટૂંક સમયમાં જ તેના પરિણામો પણ જોવા મળશે.

વિશેષ ધર્મને નિશાન બનાવવામાં આવ્યો : રાજનાથ સિંહ

રક્ષામંત્રી રાજનાથ સિંહે સ્પષ્ટપણે કહ્યું છે કે, પહેલગામમાં આતંકવાદીઓ દ્વારા કાયરતાપૂર્ણ રીતે હુમલો કરીને એક વિશેષ ધર્મને નિશાન બનાવવામાં આવ્યો છે. રાજનાથ સિંહે કહ્યું, "હુમલામાં, આપણા દેશે અનેક નિર્દોષ નાગરિકોને ગુમાવ્યા છે. આ ઘોર અમાનવીય કૃત્યે આપણને સૌને ઊંડા શોક અને પીડામાં ડૂબાડી દીધા છે. સૌ પ્રથમ, હું એ તમામ પરિવારો પ્રત્યે મારી ઊંડી સંવેદના વ્યક્ત કરું છું જેમણે પોતાના પ્રિયજનોને ગુમાવ્યા છે. આ દુઃખદ સમયમાં, દિવંગત આત્માઓની શાંતિ માટે, હું ઈશ્વરને પ્રાર્થના કરું છું."