કાળ બન્યું ઇયરફોન, ગીતો સાંભળતા સાંભળતા રેલ્વે ટ્રેક ક્રોસ કરવો મોંઘો પડ્યો   

મહારાષ્ટ્ર: મહારાષ્ટ્રના પાલઘરથી એક મોટા સમાચાર આવી રહ્યા છે. જ્યાં 16 વર્ષની એક છોકરીએ ઈયરફોન પહેરીને રેલ્વે ટ્રેક ક્રોસ કરવાની ભારે કિંમત ચૂકવવી પડી. જ્યાં ટ્રેનની અડફેટે આવી જતાં તેનું મોત નીપજ્યું હતું. અધિકારીએ જણાવ્યું હતું કે આ ઘટના ગુરુવારે બપોરે ૧.૧૦ વાગ્યે સફાલે અને કેલ્વે રોડ રેલ્વે સ્ટેશનો વચ્ચે બની હતી. મૃતક યુવતી વૈષ્ણવી રાવલ જિલ્લાના મકને ગામની રહેવાસી હતી.

અધિકારીઓએ આ કેસમાં જણાવ્યું હતું કે વૈષ્ણવી ટ્રેક ક્રોસ કરી રહી હતી ત્યારે કોચુવેલી-અમૃતસર સુપરફાસ્ટ એક્સપ્રેસ ટ્રેને તેને ટક્કર મારી હતી. સરકારી રેલ્વે પોલીસના એક અધિકારીએ જણાવ્યું હતું કે છોકરીએ ઇયરફોન પહેર્યા હોવાથી તેને નજીક આવતી ટ્રેનનો અવાજ સંભળાયો નહીં હોય.

જીઆરપી અધિકારીએ વધુમાં જણાવ્યું હતું કે ટ્રેનની ટક્કરથી છોકરીને ગંભીર ઈજાઓ થઈ હતી અને તેને તાત્કાલિક હોસ્પિટલમાં લઈ જવામાં આવી હતી, જ્યાં તેને મૃત જાહેર કરવામાં આવી હતી. અધિકારીએ જણાવ્યું કે, તેમના મૃતદેહને પોસ્ટમોર્ટમ માટે સરકારી હોસ્પિટલમાં મોકલવામાં આવ્યો છે અને આકસ્મિક મૃત્યુનો કેસ નોંધવામાં આવ્યો છે.

તેમણે એમ પણ કહ્યું કે આ મામલાની તપાસ કરવામાં આવી રહી છે. ઉત્તર મહારાષ્ટ્રના જલગાંવ જિલ્લામાં 12 મુસાફરોના મોત થયાના એક દિવસ પછી આ ઘટના બની હતી, જ્યારે તેઓ 12533 લખનૌ-મુંબઈ પુષ્પક એક્સપ્રેસમાંથી આગ લાગવાના ભયથી ઉતાવળમાં કૂદી પડ્યા હતા અને બાજુના પાટા પર બેંગલુરુ-દિલ્હી કર્ણાટક એક્સપ્રેસ સાથે અથડાઈ ગયા હતા. તેમને કચડી નાખવામાં આવ્યા હતા.