કેન્દ્રીય કેબિનેટનો મહત્ત્વનો નિર્ણય, કાચા શણના MSP માં 6% વધારો, ખેડૂતોને થશે નફો

કેન્દ્રીય મંત્રી પીયૂષ ગોયલે કેબિનેટ બ્રીફિંગમાં જણાવ્યું હતું કે, ‘વર્ષ 2025-26 માટે કાચા શણના MSPમાં લગભગ 6 ટકાનો વધારો કરવામાં આવ્યો છે. ગયા વર્ષની કિંમતમાં 315 રૂપિયા વધુ છે. 2025 થી 2026 ના સત્ર માટે કાચા શણનો ભાવ પ્રતિ ક્વિન્ટલ 5650 રૂપિયા રહેશે. તેમણે કહ્યું કે, મોદી સરકારે શણના વપરાશ માટે આ મહત્વપૂર્ણ નિર્ણય લીધો છે. આનાથી ખેડૂતોને ફાયદો થશે.PM નરેન્દ્ર મોદીની અધ્યક્ષતામાં મળેલી કેન્દ્રીય કેબિનેટની બેઠકમાં આ નિર્ણય લેવામાં આવ્યો હતો. બેઠક બાદ વાણિજ્ય અને ઉદ્યોગ મંત્રી પીયૂષ ગોયલે માહિતી શેર કરી હતી.

ગોયલે જણાવ્યું હતું કે, નવી MSP ઓલ ઇન્ડિયા વેઇટેડ એવરેજ કોસ્ટ ઓફ પ્રોડક્શન પર 66.8 ટકા વળતરની ખાતરી આપે છે. જૂટ ઉત્પાદકોને તેનો ફાયદો થશે. તાજેતરના વધારા પછી, કાચા શણની MSP 2014-15 ના MSP કરતાં 2.35 ગણી વધુ છે, જે ક્વિન્ટલ દીઠ રૂ. 5,650 નક્કી કરવામાં આવી છે. 2014-15 માં MSP 2,400 રૂપિયા પ્રતિ ક્વિન્ટલ હતી. 

તાજેતરમાં FCI એ ચોખાના અનામત ભાવમાં ફેરફાર કર્યો હતો...

તાજેતરમાં, કેન્દ્ર સરકારે રાજ્યો અને ઇથેનોલ ઉત્પાદકો માટે FCI ચોખાની અનામત કિંમત 550 રૂપિયા પ્રતિ ક્વિન્ટલ ઘટાડીને 2,250 રૂપિયા પ્રતિ ક્વિન્ટલ કરી હતી. આ ઓપન માર્કેટ સેલ સ્કીમ (OMSS) હેઠળ કરવામાં આવ્યું હતું. ખાદ્ય મંત્રાલયના આદેશ અનુસાર, રાજ્ય સરકારો અને સરકારી નિગમો ઓછા દરે 12 લાખ ટન FCI ચોખા ખરીદી શકે છે, જ્યારે ઇથેનોલ ડિસ્ટિલરીઝને 24 લાખ ટન સુધીની ખરીદી કરવાની છૂટ છે.

FCI સાપ્તાહિક ઈ-ઓક્શન દ્વારા ચોખાના સંગ્રહનું સંચાલન કરે...

બંને શ્રેણીઓ માટે FCI ચોખાની અગાઉની અનામત કિંમત 2,800 રૂપિયા પ્રતિ ક્વિન્ટલ હતી. ફૂડ કોર્પોરેશન ઓફ ઈન્ડિયા (FCI), જે સાપ્તાહિક ઈ-ઓક્શન દ્વારા ચોખાના સંગ્રહનું સંચાલન કરે છે, તે 30 જૂન, 2025 સુધીમાં સુધારેલી નીતિનો અમલ કરશે. ખાનગી વેપારીઓ અને સહકારી મંડળીઓએ FCI ચોખા માટે પ્રતિ ક્વિન્ટલ માત્ર 2,800 રૂપિયા ચૂકવવા પડશે. NAFED, NCCF અને કેન્દ્રીય ભંડાર જેવી કેન્દ્રીય સહકારી મંડળીઓ 'ભારત' બ્રાન્ડ હેઠળ વેચાણ કરતી ક્વિન્ટલ દીઠ રૂ. 2,400 ચૂકવશે.