પાકિસ્તાનનું નાપાક કૃત્ય, જમ્મુથી ગુજરાત સુધી સરહદી વિસ્તારોમાં કાળો કેર, ભારતે આપ્યો જડબાતોડ જવાબ

પાકિસ્તાને જમ્મુ-કાશ્મીર સહિત ભારતના અનેક રાજ્યોમાં અચાનક મિસાઇલ અને ડ્રોનથી હુમલો કરીને નાપાક હરકત કરી છે, જેના પગલે સમગ્ર સરહદી વિસ્તારોમાં તંગદિલી વ્યાપી ગઈ છે. 

જમ્મુમાં બ્લેક આઉટ, એરપોર્ટ પર હુમલો : જમ્મુમાં સંપૂર્ણપણે બ્લેક આઉટ કરવામાં આવ્યું છે અને જમ્મુ એરપોર્ટ પાસે ધડાકા સંભળાયા હોવાના અહેવાલ છે. કેટલાક ડ્રોન પણ ઉડાવી દેવામાં આવ્યા હોવાનું જાણવા મળ્યું છે. સૂત્રોના જણાવ્યા અનુસાર, જમ્મુ એરપોર્ટ પર રોકેટથી હુમલો થયો હતો.

રાજસ્થાન બોર્ડર પર પણ બ્લેક આઉટ : રાજસ્થાન બોર્ડર પરના તમામ જિલ્લાઓમાં પણ વીજળી ગુલ કરી દેવામાં આવી છે.

ભારતે તોડી પાડી પાકિસ્તાનની મિસાઇલો : ભારતીય વાયુ સંરક્ષણ પ્રણાલીએ જમ્મુ, જેસલમેર અને અમૃતસર પર હુમલો કરવાના પાકિસ્તાનના પ્રયાસોને સફળતાપૂર્વક નિષ્ફળ બનાવ્યા છે. જમ્મુમાં પાકિસ્તાનની આઠ મિસાઇલોને ભારતે આકાશમાં જ તોડી પાડી હતી. એટલું જ નહીં, હવાઈ સંરક્ષણ પ્રણાલીની સાથે સાથે એર ડિફેન્સ ગનોએ જમ્મુમાં નીચા ઊડતા ડ્રોનને પણ નષ્ટ કરી દીધા હતા.

પઠાણકોટ એરબેઝ પર હુમલો નિષ્ફળ : પાકિસ્તાનનો પઠાણકોટ એરબેઝ પર હુમલો કરવાનો પ્રયાસ પણ ભારતીય સેનાએ નિષ્ફળ બનાવ્યો હતો.

જમ્મુમાં એલર્ટ, મોબાઈલ નેટવર્ક બંધ : જમ્મુમાં હાઈ એલર્ટ જાહેર કરવામાં આવ્યું છે અને એર ડિફેન્સ સિસ્ટમને સક્રિય કરી દેવામાં આવી છે. સુરક્ષાના કારણોસર જમ્મુમાં મોબાઈલ નેટવર્ક પણ બંધ કરી દેવામાં આવ્યું છે અને લોકોને ઘરમાં જ રહેવાની અપીલ કરવામાં આવી છે, તેમ પૂર્વ ડીજીપી (જમ્મુ અને કાશ્મીર) એસપી વૈદે જણાવ્યું હતું.

અન્ય વિસ્તારોમાં હુમલાના પ્રયાસ : જેસલમેર, બાડમેર, બિકાનેર અને પોખરણમાં પણ મિસાઇલ હુમલાના અહેવાલ છે, જ્યારે તનોટ બોર્ડર પર જોરદાર ગોળીબાર ચાલુ છે.

IPL મેચ પણ રોકવી પડી : ધર્મશાલામાં ચાલી રહેલી પંજાબ અને દિલ્હી વચ્ચેની IPL મેચને પણ સ્થગિત કરી દેવામાં આવી હતી.

ભારતનું શક્તિશાળી એર ડિફેન્સ : ભારતની સુદર્શન-400 એર ડિફેન્સ સિસ્ટમે આકાશમાં હાહાકાર મચાવી દીધો હતો અને પાકિસ્તાનના બે ફાઈટર જેટ અને રાજસ્થાનમાં 70 મિસાઇલોને તોડી પાડી હતી. અમૃતસર, જલંધર અને ખાસામાં પણ મિસાઇલ હુમલા નિષ્ફળ બનાવવામાં આવ્યા હતા.

ગુજરાતમાં પણ ડ્રોન તોડી પડાયું : ગુજરાતમાં સરક્રીક પાસે પાકિસ્તાનના એક ડ્રોનને ભારતીય સુરક્ષા દળોએ ઈન્ટરસેપ્ટ કરીને તોડી પાડ્યું હતું. કચ્છના બોર્ડર પાસેના લખપત તાલુકાના કુરિયાની ગામ પાસે પણ એક શંકાસ્પદ ડ્રોન કબજે કરવામાં આવ્યું હતું, જે પાકિસ્તાનના નાપાક મનસૂબાને ઉજાગર કરે છે. ભારતે પાકિસ્તાનના ત્રણ વિમાનોને તોડી પાડ્યા હતા, જેમાં એક JF-17 અને ચાઈનીઝ બનાવટનું વિમાન પણ સામેલ છે. પાકિસ્તાને પંજાબ પર ફરી હુમલો કરવાનો પ્રયાસ કર્યો હતો, જેમાં પઠાણકોટ એરબેઝ પર ડ્રોનથી હુમલો કરાયો હતો, પરંતુ ભારતે પાકિસ્તાની ડ્રોનને આકાશમાં જ તોડી પાડ્યો હતો અને મોહાલીને નો ફ્લાઈંગ ઝોન જાહેર કરવામાં આવ્યો હતો.

ભારતનો વળતો પ્રહાર શરૂ : પાકિસ્તાનના આ નાપાક કૃત્ય બાદ ભારતે તાત્કાલિક જવાબી કાર્યવાહી શરૂ કરી દીધી છે.

PM મોદીની ઉચ્ચ સ્તરીય બેઠક : દિલ્હી ખાતે રક્ષામંત્રીએ ત્રણેય સેનાના પ્રમુખો સાથે ઈમર્જન્સી મીટિંગ શરૂ કરી છે, જ્યારે PM મોદી અને NSA વચ્ચે પણ ખાસ બેઠક યોજાઈ હતી અને CDS તથા ત્રણેય સેનાના વડાઓ વચ્ચે પણ વાતચીત થઈ છે. PM મોદી સમગ્ર ઘટના પર સતત નજર રાખી રહ્યા છે.

આમ, પાકિસ્તાનના આ નાપાક હુમલાનો ભારતે જડબાતોડ જવાબ આપવાનું શરૂ કરી દીધું છે અને સરહદી વિસ્તારોમાં સુરક્ષા વ્યવસ્થા સઘન બનાવી દેવામાં આવી છે.