India Pakistan Tensions ના તણાવની અસર, કેદારનાથ હેલિકોપ્ટર સેવાઓ બંધ...

ચારધામ યાત્રા અંતર્ગત બાબા કેદારનાથ જવા માટેની તમામ હેલિકોપ્ટર સેવાઓ બંધ કરી દેવામાં આવી છે. તમામ હેલિકોપ્ટર સેવાઓ આગામી આદેશ સુધી બંધ રહેશે. ઉત્તરાખંડ સરકારે આ અંગે આદેશ પણ જારી કર્યો છે. ઉત્તરાખંડ સરકારના આદેશ અનુસાર, કેદારનાથ, બદ્રીનાથ, ગંગોત્રી, યમુનોત્રીની તમામ હેલિકોપ્ટર સેવાઓ બંધ છે. આ સેવાઓ આગામી આદેશ સુધી બંધ રહેશે.

ચારધામ યાત્રા દરમિયાન હેલિકોપ્ટર સેવાઓ બંધ કરવાનું પગલું એવા સમયે લેવામાં આવ્યું છે જ્યારે સરહદ પર ભારત અને પાકિસ્તાન વચ્ચે તણાવ સતત વધી રહ્યો છે.પાકિસ્તાન તરફથી ભારતીય વિસ્તારો પર સતત હુમલાઓ કરવામાં આવી રહ્યા છે, જેનો ભારતીય સેના યોગ્ય જવાબ આપી રહી છે.આ પહેલાં ઉત્તરાખંડના CM પુષ્કર સિંહ ધામીએ અધિકારીઓ સાથે ઉચ્ચ સ્તરીય બેઠક કરી હતી.

CM પુષ્કર ધામીએ એક્સ પર ફોટો શેર કરતાં લખ્યું હતું કે, "ભારત દ્વારા આતંકવાદ વિરુદ્ધ કરવામાં આવી રહેલી સખત કાર્યવાહીને ધ્યાનમાં રાખીને સચિવાલયમાં ઉચ્ચ સ્તરીય બેઠક કરીને સંબંધિત અધિકારીઓને દરેક પરિસ્થિતિ માટે સંપૂર્ણપણે તૈયાર રહેવા અને સરહદી વિસ્તારોમાં વિશેષ તકેદારી રાખવાની સાથે ત્યાં તૈનાત વહીવટી એકમોને સતર્ક રહેવાના નિર્દેશ આપવામાં આવ્યા છે. રાજ્યની તમામ હોસ્પિટલોમાં પૂરતી માત્રામાં જીવન રક્ષક દવાઓ, સર્જિકલ સાધનો અને અન્ય જરૂરી તબીબી સંસાધનોની ઉપલબ્ધતા સુનિશ્ચિત કરવાના નિર્દેશ આપવામાં આવ્યા છે."

તેમણે કહ્યું, "ખાદ્ય અને નાગરિક પુરવઠા વિભાગને રાજ્યમાં જરૂરી ખાદ્ય સામગ્રી, રાશન અને પીવાના પાણીનો પુરવઠો સુનિશ્ચિત કરવા માટે નિર્દેશિત કરવામાં આવ્યા છે. જ્યારે રાહત અને બચાવ ટુકડીઓને પણ તૈયાર રાખવામાં આવી છે, જેથી જરૂર પડ્યે તાત્કાલિક કાર્યવાહી કરી શકાય. બેઠક દરમિયાન અફવાઓથી બચવા અને જનતાને યોગ્ય સમયે માહિતી આપવા માટે માહિતી વિભાગને સક્રિય ભૂમિકા ભજવવાના નિર્દેશ આપવામાં આવ્યા છે. અમારી સરકાર માટે દેવતુલ્ય જનતાની સુરક્ષા સર્વોપરી છે અને અમે કોઈપણ પ્રકારની કટોકટીનો સામનો કરવા માટે તૈયાર છીએ."