પંજાબ-હરિયાણા હાઈકોર્ટને બોમ્બથી ઉડાવાની ધમકી, ચંડીગઢ પોલીસ એલર્ટ

ઈ-મેલ દ્વારા પંજાબ અને હરિયાણા હાઈકોર્ટને બોમ્બથી ઉડાવી દેવાની ધમકી મળ્યા બાદ કેમ્પસમાં હોબાળો મચી ગયો છે. પોલીસે તાત્કાલિક હાઈકોર્ટ પરિસર ખાલી કરાવ્યું. પરિસર ખાલી કરાવ્યા પછી, સુરક્ષા અધિકારીઓ બોમ્બ સ્ક્વોડ ટીમ અને સ્નાઈપર ડોગ્સની મદદથી સંપૂર્ણ સર્ચ ઓપરેશન ચલાવી રહ્યા છે.

મુખ્ય ન્યાયાધીશ અને વકીલોને પણ હાઇકોર્ટ પરિસરની બહાર મોકલી દેવામાં આવી રહ્યા છે અને કોઈને પણ પ્રવેશવાની મંજૂરી નથી.

ચંડીગઢ પોલીસના તમામ વરિષ્ઠ અધિકારીઓ હાઈકોર્ટ પરિસરમાં પહોંચી ગયા છે અને સુરક્ષા વ્યવસ્થાનું નિરીક્ષણ કરી રહ્યા છે. પંજાબ વિધાનસભા અને સચિવાલય જેવા આસપાસના વિસ્તારોમાં પણ સુરક્ષા વધારી દેવામાં આવી છે.

પંજાબ હરિયાણા હાઈકોર્ટ બાર એસોસિએશનના પ્રમુખ સરતેજ નરુલાએ જણાવ્યું હતું કે, હાઈકોર્ટને ઈ-મેલ દ્વારા બોમ્બથી ઉડાવી દેવાની ધમકી મળી છે. ધમકી બાદ, પોલીસે સુરક્ષાના દૃષ્ટિકોણથી સમગ્ર પરિસર ખાલી કરાવી દીધું છે. ઘટનાસ્થળે તમામ વરિષ્ઠ પોલીસ અધિકારીઓ અને બોમ્બ સ્ક્વોડ હાજર છે. દરરોજ 6થી 7 હજાર વકીલો અને લગભગ 5 હજાર લોકો અહીં આવે છે.

નરુલાએ વધુમાં જણાવ્યું કે, અમે મુખ્ય ન્યાયાધીશ પાસે માંગણી કરી હતી કે, જો કોઈ વકીલ વીસી દ્વારા હાજર થવા માંગે છે તો તે કરી શકાય છે. આ ઉપરાંત, જો કોઈ વકીલ હાજર ન થાય તો તેની સામે કોઈ આદેશ જારી ન કરવો જોઈએ.

પાકિસ્તાન અને ભારત વચ્ચે તણાવનું વાતાવરણ છે. પંજાબ એક સરહદી રાજ્ય છે, આવા સમયે પંજાબ અને હરિયાણાની કોર્ટોને બોમ્બથી ઉડાવી દેવાની ધમકીઓ મળવી એ કેન્દ્ર અને રાજ્ય સરકારો માટે ચિંતાનો વિષય છે.