ગુજરાતથી જમ્મુ-કાશ્મીર, પાકિસ્તાન સરહદે ભારતની 'પાવર પ્લે' ડ્રિલ, પાકિસ્તાન હવે ચેતી જાય!

ભારત હવે આતંકવાદ સામે 'સર્જિકલ સ્ટ્રાઈક'થી આગળ વધીને 'આક્રમક પ્રહાર'ની નીતિ અપનાવી રહ્યું છે. ગુરુવારે ગુજરાત, પંજાબ, રાજસ્થાન અને જમ્મુ-કાશ્મીર એમ પાકિસ્તાન સાથે 3,300 કિલોમીટરથી વધુ લાંબી સરહદ ધરાવતા ચાર રાજ્યોમાં યોજાનારી મોક ડ્રિલ કોઈ સામાન્ય કવાયત નથી, પરંતુ પાકિસ્તાનને સીધી અને સ્પષ્ટ ચેતવણી છે કે ભારતીય સેના કોઈ પણ પરિસ્થિતિનો સામનો કરવા સંપૂર્ણપણે સજ્જ છે. આ મોક ડ્રિલ એવા સમયે યોજાઈ રહી છે જ્યારે ભારતે પાકિસ્તાનમાં છુપાયેલા આતંકીઓને જડમૂળથી ખતમ કરવા માટે કમર કસી છે.

"ઓપરેશન સિંદૂર"નો પ્રતાપ...

ગુરુવારની મોક ડ્રિલ માત્ર એક કવાયત નથી, પરંતુ ભારતના 'ઓપરેશન સિંદૂર'નો જ એક ભાગ છે. યાદ રહે કે, 7 મેના રોજ 244 જિલ્લામાં મોક ડ્રિલની જાહેરાત બાદ, 6 અને 7 મેની રાત્રિએ ભારતે પાકિસ્તાનના 9 આતંકી ઠેકાણાં પર વીજળીવેગે હુમલો કર્યો હતો. આ હુમલો 22 એપ્રિલના પહેલગામ હુમલાનો કડક બદલો હતો, જેમાં પાકિસ્તાન અને PoK (પાકિસ્તાન અધિકૃત કશ્મીર) માં 9 આતંકી ઠેકાણાં તબાહ થયા હતા અને 100 થી વધુ આતંકીઓનો સફાયો થયો હતો. હવે ખુલાસો થયો છે કે પાકિસ્તાનમાં 12 વધુ આતંકી ઠેકાણાં ભારતની નજરમાં છે, અને આ મોક ડ્રિલ આતંકીઓને સંકેત આપી રહી છે કે તેમનો પણ નંબર લાગી શકે છે.

સરહદી વિસ્તારો એલર્ટ પર...

આ મોક ડ્રિલ સ્પષ્ટપણે દર્શાવે છે કે ભારત આતંકવાદ સામે કોઈ સમાધાન કરવા તૈયાર નથી. સરહદી વિસ્તારોમાં એર ડિફેન્સ સિસ્ટમ સંપૂર્ણ એલર્ટ પર છે, જે દર્શાવે છે કે ભારત કોઈ પણ પાકિસ્તાની નાપાક હરકતનો જવાબ આપવા પળવારનો પણ વિલંબ નહીં કરે. 7 થી 10 મે દરમિયાન પાકિસ્તાને ભારતીય લશ્કરી અને નાગરિક ઠેકાણાં પર ડ્રોન હુમલાનો કાયરતાપૂર્ણ પ્રયાસ કર્યો હતો, પરંતુ ભારતીય સેનાની સજ્જતાને કારણે તે નિષ્ફળ રહ્યો હતો. 10 મેના રોજ પાકિસ્તાનના કહેવાથી યુદ્ધવિરામ થયો, જે દર્શાવે છે કે ભારતના આક્રમક વલણથી પાકિસ્તાન ગભરાઈ ગયું છે.

આ મોક ડ્રિલ માત્ર એક કવાયત નથી, પરંતુ પાકિસ્તાનને ભારતના દ્રઢ નિશ્ચયનો સ્પષ્ટ સંદેશ છે કે આતંકવાદને પોષવાનું બંધ કરો, અન્યથા ભારત ઘરમાં ઘૂસીને મારવામાં સહેજ પણ ખચકાશે નહીં. શું પાકિસ્તાન આ ચેતવણીને ગંભીરતાથી લેશે અને આતંકવાદને નાથવા માટે નક્કર પગલાં ભરશે, કે પછી વધુ એકવાર ભારતની સૈન્ય તાકાતનો પરચો જોવા માટે મજબૂર થશે?