અતુલે પોતાના પુત્રને સંબોધીને અંતિમ પત્રમાં લખ્યું..બેટા, 2038માં આ ગિફ્ટ ખોલજે..

 

બેંગલુરુમાં એઆઈ એન્જિનિયર અતુલ સુભાષની આત્મહત્યાને લઈને સોશિયલ મીડિયા પર લોકોમાં ભારે ગુસ્સો જોવા મળી રહ્યો  છે. મીડિયા રિપોર્ટ્સમાં એક પછી એક ખુલાસા થઈ રહ્યા છે. દરમિયાન, સમાચાર અનુસાર, અતુલ સુભાષે તેમના 4 વર્ષના પુત્ર માટે ભેટ છોડી છે. જો કે ગિફ્ટની સાથે શરત એ છે કે તેમનો પુત્ર આ ગિફ્ટ 2038માં જ ખોલી શકશે. એટલે કે તે આજની તારીખથી 14 વર્ષ પછી જ આ ગિફ્ટ ખોલી શકશે. તમને જણાવી દઈએ કે અતુલ સુભાષનો પુત્ર હાલમાં 4 વર્ષનો છે અને તે 2038માં 18 વર્ષનો થઈ જશે.

અતુલ સુભાષે સુસાઈડ નોટમાં પોતાના બાળક માટે એક મેસેજ પણ લખ્યો છે. જેમાં તેણે લખ્યું હતું કે, જ્યારે મેં તને પહેલીવાર જોયો હતો ત્યારે મને લાગ્યું હતું કે હું કોઈ પણ દિવસ તારા માટે મારો જીવ આપી શકું છું, પરંતુ કમનસીબે તારા કારણે હું મારો જીવ આપી રહ્યો છું. હું ફક્ત તારા વિશે કેટલીકવાર પીડા સિવાય બીજું કંઈ અનુભવતો નથી. હવે તું મને બ્લેકમેલના પદાર્થ જેવો લાગે છો, જેના દ્વારા મારી પાસેથી વધુ ને વધુ પૈસા પડાવવામાં આવશે. 

ઉલ્લેખનિય છે કે 34 વર્ષીય અતુલ સુભાષ બેંગલુરુ શહેરની એક પ્રાઈવેટ ફર્મમાં આર્ટિફિશિયલ ઈન્ટેલિજન્સમાં ડીજીએમ તરીકે કામ કરી રહ્યા હતા, અતુલે પોતાના સંદેશમાં કહ્યું, "મને લાગે છે કે મારા માટે મરી જવું વધુ સારું રહેશે, કારણ કે હું જે પૈસા કમાઈ રહ્યો છું. તેમાં હું મારા પોતાના દુશ્મનને જ શક્તિશાળી કરી રહ્યો છું.  મારા જ ટેક્સના પૈસાથી આ કોર્ટ, આ પોલીસ અને આખી સિસ્ટમ મને અને મારા પરિવારને પરેશાન કરશે.  જો હું ત્યાં ન હોઉં તો મારા માતા-પિતા અને ભાઈને પરેશાન કરવાનું કોઈ કારણ રહેશે નહીં

અતુલના ભાઈ વિકાસ સુભાષે જણાવ્યું કે અતુલના લગ્ન 2019માં થયા હતા. તેની પત્ની અને તેના સમગ્ર પરિવારે તેને ઘણા ગંભીર ખોટા કેસોમાં ફસાવી દીધો હતો. આ કારણે અતુલ ખૂબ જ ચિંતિત થવા લાગ્યો. ડિપ્રેશનના કારણે તેણે જીવનનો અંત આણ્યો હતો. પોલીસે અતુલના પરિવારની ફરિયાદ પર કેસ નોંધ્યો છે. તપાસ ચાલુ છે.