રાજ્યના સરહદી ગામોમાં  એલર્ટ

ઓપરેશન સિંદુર બાદ દેશના ઉત્તર અને પશ્ચિમ સરહદી વિસ્તારોમાં વધતી તંગદિલી અને પાકિસ્તાન દ્વારા મિસાઈલ તેમજ ડ્રોન હુમલાના નિષ્ફળ પ્રયાસોના પગલે કચ્છ, બનાસકાંઠા અને પાટણ જિલ્લાના 357 સરહદી ગામોને એલર્ટ પર મૂકવામાં આવ્યા છે.

રાજ્યના ગૃહ વિભાગે પોલીસ અને ગુપ્તચર એજન્સીઓને સતત સક્રિય રહેવા આદેશ આપ્યો છે. આ ઉપરાંત સરહદી વિસ્તારોના નાગરિકોને સંભવિત યુદ્ધ જેવી પરિસ્થિતિ માટે તૈયાર રહેવા માટે ચોક્કસ માર્ગદર્શિકા જાહેર કરવામાં આવી છે.

પાટણ, કચ્છ અને બનાસકાંઠા જિલ્લો  પાકિસ્તાન સરહદ સાથે જોડાયેલો છે. જેમાંથી સરહદથી 25 થી 30 કિ.મી.ની અંદર આવતા 78 જેટલા ગામો ઉચ્ચ સુરક્ષા વર્ગમાં આવે છે. આ ગામો માટે બોર્ડર સિક્યોરિટી ફોર્સ (BSF), ભારતીય સેના અને કેન્દ્રીય ગુપ્તચર એજન્સીઓ સતત કાર્યરત છે. તાજેતરમાં કચ્છના ખાવડા વિસ્તારમાં પાકિસ્તાની ડ્રોન દ્વારા વિસ્ફોટ કરાયો હતો. જેને પગલે સુરક્ષા એજન્સીઓ વધુ સજાગ બની છે.

રાજ્યના ગૃહ વિભાગે જાહેર કરેલી માર્ગદર્શિકા મુજબ, સરહદી વિસ્તારોના નાગરિકોએ જરૂરી દવાઓ, પાણી, ખાદ્ય સામગ્રી, ટોર્ચ, બેટરી અને રોકડ નાણાં તૈયાર રાખવા જણાવાયું છે. આ ઉપરાંત પરિવારમાં એક સુરક્ષિત સ્થળ નક્કી કરવા અને ઈવેક્યુએશન શેલ્ટરો વિશે જાણકારી રાખવી જરૂરી ગણવામાં આવી છે. સરકારના જણાવ્યા અનુસાર, આપત્તિ સમયે સાયકલ, મોટરસાયકલ કે ગાડીથી ગામ છોડવાની જરૂર પડે તો પણ પરિવારમાં સમન્વય રહે એ માટે તૈયારી રાખવા તાકીદ કરી  છે. 

નાગરિકોને ચેતવણી આપવામાં આવી છે કે તેઓ કોઈપણ પ્રકારની સેનાની ગતિવિધિ, પોલીસની તૈનાતી કે સરહદની સ્થિતિની તસવીરો કે વીડિયો સોશિયલ મીડિયામાં ન શેર કરે. આ રીતે ગુપ્તચર માહિતી લીક થવાની શક્યતા રહે છે. રાજ્યમાં આ માટે કડક સાયબર મોનિટરીંગ શરૂ કરાયુ છે.

સૂત્રોના કહેવા મુજબ, હાલની પરિસ્થિતિ નિયંત્રણમાં છે. પરંતુ તણાવના માહોલમાં કોઈ પણ અણધારી પરિસ્થિતિને પહોંચી વળવા તમામ તંત્ર તૈયાર છે. બનાસકાંઠાના વાવ અને સુઈગામ તાલુકાના ગામો ઉપરાંત કચ્છના 200થી વધુ ગામોમાં ખાસ એલર્ટ જાહેર કરાયું છે. ગ્રામ્ય પોલીસ સ્ટેશનો, તાલુકા કક્ષાના અધિકારીઓ અને સરપંચો સાથે સતત સમન્વય સાધવામાં આવી રહ્યો છે.