ફુકેટ-દિલ્હી એર ઈન્ડિયા ફ્લાઇટમાં ટર્બ્યુલન્સ

Air India Phuket-Delhi Flight Hits Severe Turbulence: થાઇલેન્ડના ફુકેટથી દિલ્હી આવી રહેલી એર ઇન્ડિયાની ફ્લાઇટ AI-2379 માં મંગળવારે (4 ઓગસ્ટ) મધ્ય આકાશમાં અચાનક ભારે ટર્બ્યુલન્સ સર્જાતાં મુસાફરો અને ક્રૂ સભ્યોમાં ભારે અફરાતફરી મચી ગઈ હતી. પિચ-પરફેક્ટ દેખાતા વાતાવરણ વચ્ચે અચાનક વિમાન ખૂબ જ ઝડપથી નીચે તરફ ઉતરવા લાગ્યું હતું. આ આંચકો એટલો પ્રચંડ હતો કે સીટ બેલ્ટ ન બાંધેલા કેટલાક મુસાફરોના માથા સીધા વિમાનની છત સાથે અથડાયા હતા. આ દુર્ઘટનામાં 12 જેટલા મુસાફરો અને ક્રૂ મેમ્બર્સ ઘાયલ થયા હોવાના અહેવાલ છે. જોકે, પાઇલટે અત્યંત ચતુરતાપૂર્વક પરિસ્થિતિ પર કાબૂ મેળવીને વિમાનને દિલ્હી એરપોર્ટ પર સુરક્ષિત રીતે લેન્ડ કરાવ્યું હતું.

'ક્લિયર એર ટર્બ્યુલન્સ'નો શિકાર બની ફ્લાઇટ
એરલાઇન અને એવિએશન ક્ષેત્રના સૂત્રોના જણાવ્યા અનુસાર, ફુકેટથી 134 મુસાફરોને લઈને દિલ્હી આવી રહેલી એર ઈન્ડિયાની ફ્લાઇટ AI-2379 જ્યારે દિલ્હી એરપોર્ટ પર લેન્ડિંગની તૈયારી કરી રહી હતી, ત્યારે જ અચાનક તે 'ક્લિયર એર ટર્બ્યુલન્સ' નો શિકાર બની હતી. આ એક એવા પ્રકારનો ટર્બ્યુલન્સ છે જે એકદમ સાફ અને સ્વચ્છ આકાશમાં સર્જાય છે. તેમાં કોઈ વાદળો, વરસાદ કે તોફાન હોતા નથી, જેના કારણે વિમાનના રડારમાં પણ તે અગાઉથી ડિટેક્ટ થઈ શકતું નથી. હવામાં સ્થિર સ્તરો વચ્ચે અચાનક પવનની દિશા અને ગતિમાં તીવ્ર ફેરફાર થવાને કારણે વિમાનમાં આંચકા અનુભવાયા હતા અને વિમાનની ઊંચાઈમાં અચાનક મોટો ફેરફાર થયો હતો.

મુસાફરોના કાનના પડદા ફાટ્યા, છત સાથે અથડાયા માથા
લેન્ડિંગના થોડા સમય પહેલા જ અચાનક ફ્લાઇટ ફ્રી-ફોલ થવા લાગતાં વિમાનની અંદર ભયાનક ગભરાટનો માહોલ છવાઈ ગયો હતો. ફ્લાઇટ ભરેલી હતી અને અચાનક વિમાન નીચે તરફ ધસી જતાં હવાના દબાણમાં ઝડપી ફેરફાર થયો હતો. એક મુસાફરના સગાએ જણાવ્યું કે તેમના ભાઈના કાનમાં હવાના તીવ્ર દબાણના કારણે ઈજા થઈ હતી અને કાનનો પડદો ફાટી ગયો હતો. આ સિવાય ઘણા મુસાફરો સીધા છત સાથે અથડાતાં તેમના માથામાં સોજો આવ્યો હતો, જ્યારે કેટલાકના કાન, ગરદન અને ખભાના ભાગે ઈજાઓ થઈ હતી. મુસાફરો અનુસાર, આ આંચકો એટલો ભયાનક હતો કે થોડી ક્ષણો માટે સહુના શ્વાસ અધ્ધર થઈ ગયા હતા.

દિલ્હીમાં ઈમરજન્સી મેડિકલ રિસ્પોન્સ
ઘટનાની ગંભીરતાને ધ્યાનમાં રાખીને દિલ્હી એરપોર્ટ પર તાત્કાલિક ધોરણે તબીબી સેવાઓ એલર્ટ કરી દેવામાં આવી હતી. વિમાનનું સુરક્ષિત લેન્ડિંગ થતાં જ તમામ મુસાફરો અને ક્રૂ સભ્યોને બહાર કાઢવામાં આવ્યા હતા. ઘટનાસ્થળે અનેક એમ્બ્યુલન્સ તૈનાત રાખવામાં આવી હતી. નાની-મોટી ઈજાઓ ધરાવતા મુસાફરો અને ક્રૂ મેમ્બર્સને તાત્કાલિક સાવચેતીના ભાગરૂપે એરપોર્ટના મેડિકલ સેન્ટરમાં લઈ જવામાં આવ્યા હતા, જ્યાં એર ઈન્ડિયાની મેડિકલ ટીમ અને એરપોર્ટ સ્ટાફે તેમની પ્રાથમિક સારવાર અને સંભાળ હાથ ધરી હતી. સદનસીબે, કોઈને પણ અતિ ગંભીર ઈજા પહોંચી નથી.

વિમાનને પણ સામાન્ય નુકસાન
આ અચાનક આવેલી ઉથલપાથલના કારણે વિમાનના આંતરિક માળખાને પણ થોડું નુકસાન પહોંચ્યું હોવાનું સૂત્રોએ જણાવ્યું છે. અચાનક વિમાન ધ્રૂજી ઊઠતાં અને પવનના જોરદાર આંચકાને કારણે વિમાનમાં ખલેલ પહોંચી હતી. આ સમગ્ર ઘટના બાદ એરલાઇન પ્રવક્તાએ નિવેદન જારી કરીને જણાવ્યું હતું કે, "અમારા માટે મુસાફરો અને ક્રૂ સભ્યોની સુરક્ષા અને સુવિધા સર્વોપરી છે. અસરગ્રસ્ત તમામ મુસાફરોને જરૂરી સહાય પૂરી પાડવામાં આવી રહી છે. આ ઘટના અંગે સંબંધિત નાગરિક ઉડ્ડયન અધિકારીઓને જાણ કરી દેવામાં આવી છે અને અમે તપાસમાં સંપૂર્ણ સહયોગ આપી રહ્યા છીએ."