અમદાવાદ વિમાન દુર્ઘટનામાં બધું જ ભસ્મીભૂત, પણ બાળ ગોપાલ અને શ્રીમદ્ ભગવદ્ ગીતા સહી સલામત!

અમદાવાદમાં બનેલી એર ઇન્ડિયા ડ્રીમલાઇનર વિમાન દુર્ઘટનાએ સેંકડો લોકોનો ભોગ લીધો છે, અને આ ભયાનક અકસ્માત ભારતના ઇતિહાસની સૌથી મોટી વિમાન દુર્ઘટનાઓમાંની એક તરીકે નોંધાઈ છે. જોકે, આ ભયાવહ ઘટના વચ્ચે એક ચોંકાવનારો ચમત્કાર પણ સામે આવ્યો છે, જ્યાં બાળ ગોપાલની મૂર્તિ અને શ્રીમદ્ ભગવદ્ ગીતાનું પુસ્તક અગ્નિની જ્વાળાઓમાંથી સંપૂર્ણપણે અખંડ રહ્યા છે.

એકમાત્ર બચેલો મુસાફર અને ચમત્કારિક ગીતા-કાન્હાજી

આ ભયાવહ પ્લેન ક્રેશમાં સવાર ૨૪૨ લોકોમાંથી માત્ર એક જ વ્યક્તિ જીવતો બચી શક્યો છે, જેણે સમયસૂચકતા વાપરીને પ્લેન ક્રેશ થતાંની સાથે જ છલાંગ લગાવી દીધી હતી અને આગ લાગે તે પહેલાં જ બહાર નીકળી ગયો હતો.

જોકે, આ દુર્ઘટનામાં સૌથી આશ્ચર્યજનક બાબત એ છે કે, એક મુસાફર પોતાની સાથે ભગવદ્ ગીતા અને કાન્હાજી (બાળ ગોપાલની મૂર્તિ) લઈને જઈ રહ્યા હતા. કદાચ તેમને લઈ જનાર વ્યક્તિનું આ ભયાવહ દુર્ઘટનામાં મોત થયું, પરંતુ તેમની સાથે રહેલા કાન્હાજી અને શ્રીમદ્ ભગવદ્ ગીતાને આટલી ભયાનક આગ અને વિનાશ છતાં કશું પણ નુકસાન થયું નહોતું. ભગવદ્ ગીતાનું પુસ્તક કાગળનું હોવા છતાં, જે સામાન્ય રીતે ખૂબ ઝડપથી આગ પકડે છે, તે સંપૂર્ણપણે અખંડ રહ્યું હતું. આ ઘટનાને લોકો ચમત્કારથી કમ નથી ગણી રહ્યા.

ડ્રીમલાઇનર પ્લેન દુર્ઘટનાની વિગતો

ગુજરાતના અમદાવાદથી લંડનના ગેટવિક જઈ રહેલું એર ઈન્ડિયાનું બોઈંગ 787 ડ્રીમલાઈનર વિમાન AI-171 ગુરુવારે ટેકઓફ કર્યા પછી તરત જ ક્રેશ થયું. ડેપ્યુટી કમિશનરે પુષ્ટિ કરી છે કે આ દુર્ઘટનામાં અત્યાર સુધીમાં ૨૬૫ લોકોના મોત થયા છે. આ ફ્લાઈટમાં કુલ ૨૪૨ લોકો સવાર હતા, જેમાં ૨૩૦ મુસાફરો અને ૧૨ ક્રૂ મેમ્બરનો સમાવેશ થતો હતો.

રડાર ડેટા અનુસાર, વિમાને સરદાર વલ્લભભાઈ પટેલ આંતરરાષ્ટ્રીય એરપોર્ટ પરથી બપોરે ૧:૩૯ વાગ્યે ઉડાન ભરી હતી. જોકે, સમુદ્ર સપાટીથી ૬૨૫ ફૂટની ઊંચાઈએ પહોંચ્યા પછી તરત જ તેમાં ટેકનિકલ ખામી સર્જાઈ અને એર ટ્રાફિક કંટ્રોલ સાથેનો તેનો સંપર્ક તૂટી ગયો. વિમાન ટેકઓફ થયાના માત્ર ૫૧ સેકન્ડમાં જ ક્રેશ થયું હતું. આ વિમાનમાં ગુજરાતના ભૂતપૂર્વ મુખ્યમંત્રી વિજય રૂપાણી પણ સવાર હતા.