Ahmedabad Plane Crash: તપાસમાં પારદર્શિતાનો અભાવ, પાયલટ એસોસિયેશનનો આક્ષેપ

અમદાવાદ એરપોર્ટ પર બનેલી વિમાન દુર્ઘટનાએ સમગ્ર દેશને હચમચાવી દીધું છે. આ ઘટનાની તપાસ કરી રહેલા એરક્રાફ્ટ એક્સિડન્ટ ઇન્વેસ્ટિગેશન બ્યુરો (AAIB)ના પ્રાથમિક રિપોર્ટમાં વિમાનના ફ્યુલ સ્વિચના કટઓફને દુર્ઘટનાનું મુખ્ય કારણ ગણાવવામાં આવ્યું છે. જોકે, આ રિપોર્ટ પર એરલાઇન પાયલટ એસોસિયેશન ઓફ ઈન્ડિયાએ ગંભીર આક્ષેપો ઉઠાવ્યા છે. એસોસિયેશનનું કહેવું છે કે આ રિપોર્ટમાં પાયલટ પર દોષ નાંખવાનો પ્રયાસ કરવામાં આવ્યો છે, જેને તેઓ સંપૂર્ણપણે નકારી કાઢે છે.   એસોસિયેશનના જણાવ્યા અનુસાર, તપાસની દિશા અને વલણ એવું સૂચવે છે કે પાયલટની ભૂલને દુર્ઘટનાનું કારણ ગણાવવાનો પ્રયાસ થઈ રહ્યો છે. તેઓએ માંગ કરી છે કે આ દુર્ઘટનાની તપાસ નિષ્પક્ષ અને તથ્ય આધારિત હોવી જોઈએ. આ ઉપરાંત, AAIBનો પ્રાથમિક રિપોર્ટ મીડિયામાં લીક થયો હોવાનો આરોપ લગાવતા એસોસિયેશને જણાવ્યું કે, આ રિપોર્ટ કોઈ જવાબદાર અધિકારીની સહી કે અધિકૃત માહિતી વિના મીડિયા સાથે શેર કરવામાં આવ્યો, જે ગંભીર ચિંતાનો વિષય છે.   પારદર્શિતાનો અભાવ, વિશ્વસનીયતા પર સવાલ એરલાઇન પાયલટ એસોસિયેશન ઓફ ઈન્ડિયાએ તપાસમાં પારદર્શિતાના અભાવ અંગે પણ ચિંતા વ્યક્ત કરી છે. તેમનું કહેવું છે કે તપાસ સંપૂર્ણપણે ગુપ્ત રાખવામાં આવી, જેના કારણે તેની વિશ્વસનીયતા પર અસર પડી છે. જનતા પણ આ રિપોર્ટથી સંપૂર્ણપણે સહમત નથી. એસોસિયેશનનો આરોપ છે કે તપાસ ટીમમાં યોગ્ય અને અનુભવી કર્મચારીઓ, ખાસ કરીને લાઈન પાયલટ, હજુ પણ સામેલ નથી, જેનાથી તપાસની નિષ્પક્ષતા પર સવાલ ઉભા થાય છે.   મીડિયામાં લીક થતી માહિતી પર સવાલ એસોસિયેશને વધુમાં જણાવ્યું કે, 10 જુલાઈના રોજ એક લેખમાં ફ્યુલ કંટ્રોલ સ્વિચમાં ખામીનો ઉલ્લેખ કરવામાં આવ્યો હતો. આવી સંવેદનશીલ માહિતી આંતરરાષ્ટ્રીય મીડિયામાં કેવી રીતે લીક થઈ, તે એક મોટો સવાલ છે. આવા લીકથી તપાસની ગંભીરતા અને વિશ્વસનીયતા બંને પર અસર પડે છે.   અમદાવાદ એરપોર્ટ પર બનેલી આ દુર્ઘટનાએ ફરી એકવાર વિમાનની સલામતી અને તપાસની પ્રક્રિયા પર સવાલો ઉભા કર્યા છે. એરલાઇન પાયલટ એસોસિયેશન ઓફ ઈન્ડિયાના આક્ષેપો દર્શાવે છે કે તપાસમાં પારદર્શિતા અને નિષ્પક્ષતાની જરૂર છે. જનતા અને ઉડ્ડયન ક્ષેત્રના હિતધારકો આગામી રિપોર્ટ અને તપાસના પરિણામો પર નજર રાખી રહ્યા છે, જેથી આ દુર્ઘટનાનું સાચું કારણ સામે આવે અને ભવિષ્યમાં આવી ઘટનાઓને રોકી શકાય.