એક રેકોર્ડ એસા ભી! હવે આવા રેકોર્ડ પણ નોંધાશે?

આ તો સાંભળીને તો ચોક્કસથી જ આશ્ચર્ય થશે. મધ્યપ્રદેશના ખંડવા જિલ્લામાં ભ્રષ્ટાચારનું જીવતું-જાગતું ઉદાહરણ પૂરું પાડતી નર્મદા જળ સપ્લાયની પાઈપલાઈનનો અનોખો અને ચોંકાવનારો રેકોર્ડ બનવા જઈ રહ્યો છે. એક અહેવાલ મુજબ, 106 કરોડ રૂપિયાના ખર્ચે નાખવામાં આવેલી આ પાઈપલાઈન 450થી પણ વધુ વખત ફાટી ચૂકી છે.

આ વારંવાર ફાટતી પાઈપલાઈનથી પરેશાન થઈને નગર નિગમના વિપક્ષ નેતા અને કોંગ્રેસના કોર્પોરેટર દીપક મુલ્લુ રાઠોડે ગિનિસ બુક ઓફ વર્લ્ડ રેકોર્ડમાં તેનું નામ નોંધાવવાનો એક અનોખો વિરોધનો રસ્તો અપનાવ્યો છે. તેઓ કહે છે કે, ‘એશિયા કે દુનિયામાં ક્યાંય પણ આટલી મોટી પરિયોજના આટલી ખરાબ રીતે નિષ્ફળ નથી ગઈ.’

ગિનિસ બુકે તેમની આ અરજી સ્વીકારી લીધી છે અને આ રેકોર્ડ ખંડવાના નામે નોંધવા માટે પાઈપલાઈન કેટલી વાર ફાટી છે, તેની પ્રમાણિત નકલો માંગી છે. આ દસ્તાવેજો લેવા માટે વિપક્ષ નેતાએ કલેક્ટર ઓફિસનો સંપર્ક કર્યો છે.

વારંવાર આ પાઈપલાઈન ફાટવાના કારણે ખંડવાની 2.5 લાખની વસ્તીને 48 કલાક સુધી પાણી વગર રહેવું પડે છે, જેનાથી લોકોને ભારે હાલાકીનો સામનો કરવો પડે છે. જોકે, અધિકારીઓના મતે, આ સમસ્યાને ઉકેલવા માટે હવે નવી પાઈપલાઈન નાખવાનું કામ લગભગ પૂરું થઈ ગયું છે, જેનાથી ભવિષ્યમાં લોકોને મુશ્કેલી નહીં પડે.