EV કાર ચાર્જ દરમિયાન શોર્ટ સર્કિટથી આગમાં 7ના મોત

મધ્યપ્રદેશના ઈન્દોરમાં બુધવારે વહેલી સવારે એક ભયાનક દુર્ઘટના ઘટી છે. શહેરના બંગાળી ચોરાહા પાસે આવેલી ગ્રેટર બ્રિજેશ્વરી કોલોનીમાં એક ત્રણ માળના મકાનમાં ઈલેક્ટ્રિક કાર ચાર્જિંગ દરમિયાન થયેલા શોર્ટ સર્કિટને કારણે લાગેલી આગમાં 7 લોકોના કરૂણ મોત નીપજ્યા છે. આ અકસ્માતમાં 4 લોકો ગંભીર રીતે દાઝી ગયા છે, જેમને સારવાર માટે હોસ્પિટલ ખસેડવામાં આવ્યા છે.

ચાર્જિંગ પોઈન્ટમાં બ્લાસ્ટ

પોલીસના જણાવ્યા અનુસાર, દુર્ઘટના વહેલી સવારે 4 વાગ્યે બની હતી જ્યારે ઘરની બહાર ઈલેક્ટ્રિક કાર ચાર્જ થઈ રહી હતી. ચાર્જિંગ પોઈન્ટમાં અચાનક વિસ્ફોટ થયો અને આગ ઝડપથી આખા ઘરમાં ફેલાઈ ગઈ. ઘરમાં અંદાજે 10થી વધુ ગેસ સિલિન્ડર રાખેલા હતા, જે આગની ઝપેટમાં આવતા એક પછી એક ફાટવા લાગ્યા હતા.

આ ધડાકા એટલા પ્રચંડ હતા કે ત્રણ માળના મકાનનો એક હિસ્સો ધરાશાયી થઈ ગયો હતો. મૃતકોમાં જાણીતા રબર વેપારી મનોજ પુગલિયા, તેમની પુત્રવધૂ અને બિહારથી આવેલા 6 સંબંધીઓનો સમાવેશ થાય છે.

આ અકસ્માતમાં સૌથી ચોંકાવનારી બાબત 'ડિજિટલ લોક'ની રહી. આગ લાગ્યા બાદ તરત જ ઘરનો વીજ પુરવઠો (પાવર સપ્લાય) ખોરવાઈ ગયો હતો. વીજળી જતી રહેતા ઘરમાં લગાવેલા અત્યાધુનિક ડિજિટલ લોક જામ થઈ ગયા હતા અને ખુલ્યા નહોતા.

ઊંઘમાં રહેલા લોકોને બહાર નીકળવાની તક જ ન મળી અને તેઓ અંદર જ ટ્રેપ થઈ ગયા હતા. ધુમાડો અને આગની લપેટો વચ્ચે લોકો બચવા માટે બૂમરાણ મચાવતા રહ્યા, પરંતુ લોખંડી દરવાજા અને ડિજિટલ લોક સામે લાચાર બની ગયા.

રેસ્ક્યુ ઓપરેશન અને તપાસ

ફાયર બ્રિગેડની 5થી વધુ ગાડીઓ અને SDERFની ટીમોએ ઘટનાસ્થળે પહોંચી ભારે જહેમત બાદ આગ પર કાબૂ મેળવ્યો હતો. પોલીસ કમિશનર સંતોષ કુમાર સિંહ અને કલેક્ટર સહિતના ઉચ્ચ અધિકારીઓ સ્થળ પર હાજર રહ્યા હતા.

પ્રાથમિક તપાસમાં જાણવા મળ્યું છે કે વેપારીનો પોલિમરનો બિઝનેસ હોવાથી ઘરમાં કેટલાક જ્વલનશીલ કેમિકલ્સ પણ રાખેલા હતા, જેને કારણે આગ વધુ ભભૂકી હતી.

આ ઘટનાએ ઈલેક્ટ્રિક વ્હીકલ ચાર્જિંગની સુરક્ષા અને ઘરોમાં લગાવવામાં આવતી ડિજિટલ સિક્યુરિટી સિસ્ટમ સામે ગંભીર સવાલો ઉભા કર્યા છે.