PTSના 6 કોન્સ્ટેબલને રીલ બનાવી ભારે પડી

મધ્ય પ્રદેશ પોલીસમાં નવનિયુક્ત થયેલા છ કોન્સ્ટેબલોને સોશિયલ મીડિયા પર વાયરલ થવાનો શોખ ભારે પડ્યો છે. રીવા સ્થિત પોલીસ ટ્રેનિંગ સ્કૂલ (PTS)માં તાલીમ લઈ રહેલા આ શ્રમિકોએ પોલીસ યુનિફોર્મમાં એક વીડિયો શૂટ કરીને તેને 'માતિયામેટ ગ્રુપ' નામના સોશિયલ મીડિયા હેન્ડલ પર શેર કર્યો હતો, જે વાયરલ થતા જ વિભાગીય તપાસના આદેશ અપાયા છે.

વીડિયોમાં શું હતું?

વાયરલ વીડિયોમાં છ કોન્સ્ટેબલો પોલીસ યુનિફોર્મમાં સજ્જ થઈને એક ડાયલોગ હિન્દીમાં બોલતા જોવા મળે છે:

"ભલે હું સારો ન દેખાતો હોઉં, પણ મારી પાસે સરકારી નોકરી છે. ભલે મારી પાસે પૈસા ન હોય, પણ મને પગાર મળે છે. ભલે કપડાં ન હોય, પણ મારી પાસે યુનિફોર્મ છે." હાસ્યના ઈરાદે બનાવેલો આ વીડિયો પોલીસ વિભાગની ગરિમા માટે અપમાનજનક સાબિત થયો છે.

ચેતવણી છતાં ભૂલ કરી:

પોલીસ મુખ્યાલય (PHQ), ભોપાલ દ્વારા અગાઉ જ કડક સૂચના આપવામાં આવી છે કે કોઈ પણ પોલીસકર્મી યુનિફોર્મમાં ખાનગી વીડિયો કે રીલ્સ બનાવી શકશે નહીં.

તાલીમ દરમિયાન પણ વારંવાર સૂચનાઓ આપવા છતાં દેવાસ, ઇન્દોર, ઉજ્જૈન અને વિદિશાના આ છ તાલીમાર્થીઓએ શિસ્તનો ભંગ કર્યો હતો.

SP એ ફટકારી નોટિસ:

રીવા PTS ના સુપરિન્ટેન્ડેન્ટ ઓફ પોલીસ સુરેન્દ્ર કુમાર જૈને આ મામલે કડક વલણ અપનાવતા તમામ છ તાલીમાર્થીઓને 'શો-કોઝ' (કારણદર્શક) નોટિસ ફટકારી છે.

નોટિસમાં પૂછવામાં આવ્યું છે કે, "તમારા આ કૃત્યથી પોલીસ વિભાગની ગરિમા ખરડાઈ છે, તો તમારી સામે કેમ કડક કાર્યવાહી ન કરવી?"

આ અગાઉ પણ રીવા કોર્ટ પરિસરમાં મહિલા પોલીસકર્મીઓના ડાન્સ વીડિયો વાયરલ થયા હતા, જેના કારણે વિભાગની છબી ખરડાઈ હતી. હવે આ નવી ઘટનાએ શિસ્તના પાઠ ભણાવતા ટ્રેનિંગ સેન્ટરમાં ચકચાર મચાવી દીધી છે.