Maharashtra : બીડમાં મૃત્યુનો તાંડવ, હાઈવે પર 6 લોકોના કરૂણ મોત, કન્ટેનર ચાલક ફરાર...

મહારાષ્ટ્રના બીડ જિલ્લામાં એક ગમખ્વાર માર્ગ અકસ્માત સર્જાયો છે, જેમાં છ લોકોએ જીવ ગુમાવ્યા છે. આ દુર્ઘટના સોમવાર રાત્રે લગભગ 8.30 વાગ્યે ગેવરાઈ તાલુકા નજીક બની હતી. પોલીસે અકસ્માત સર્જીને ફરાર થયેલા કન્ટેનર ચાલકની શોધખોળ શરૂ કરી છે.

કેવી રીતે સર્જાયો અકસ્માત?

પ્રાથમિક માહિતી અનુસાર, ગેવરાઈ તાલુકા પાસે હાઈવે પર એક ફોર વ્હીલર ગાડીમાં ખરાબી સર્જાતાં તે બંધ પડી ગઈ હતી. આ દરમિયાન, પાછળથી પૂરઝડપે આવી રહેલા એક કન્ટેનરે આ ગાડીને જોરદાર ટક્કર મારી હતી. આ ભીષણ ટક્કરના કારણે ગાડીમાં સવાર છ લોકોના ઘટનાસ્થળે જ કમકમાટીભર્યા મોત થયા હતા. અકસ્માત બાદ કન્ટેનર ચાલક પોતાનું વાહન છોડીને ફરાર થઈ ગયો હતો, જેને પકડવા માટે પોલીસ સતત પ્રયાસ કરી રહી છે.

તાજેતરમાં સોલાપુરમાં પૂર્વ ધારાસભ્યનું નિધન...

ઉલ્લેખનીય છે કે, આ પહેલા મહારાષ્ટ્રના સોલાપુરમાં ભારે વરસાદના કારણે ભાજપના પૂર્વ ધારાસભ્ય આર.ટી. દેશમુખનું માર્ગ અકસ્માતમાં નિધન થયું હતું. આર.ટી. દેશમુખે 2014 થી 2019 દરમિયાન બીડ જિલ્લાના માજલગાંવ વિધાનસભા ક્ષેત્રનું પ્રતિનિધિત્વ કર્યું હતું. તેમનું નિધન સોમવાર, 26 મેના રોજ બપોરે લગભગ 4:15 વાગ્યે લાતુર-તુળજાપુર-સોલાપુર માર્ગ પર બેલકુંડ ગામ નજીક એક ફ્લાયઓવર પર થયું હતું.

પૂર્વ ધારાસભ્યના અકસ્માતની વિગતો...

માહિતી અનુસાર, દેશમુખ પોતાની એસયુવીમાં મુસાફરી કરી રહ્યા હતા ત્યારે ભારે વરસાદના કારણે રોડ પર પાણી ભરાઈ ગયું હતું. જેના કારણે તેમની ગાડી લપસી પડી અને નિયંત્રણ ગુમાવીને ફ્લાયઓઓવરની રેલિંગ સાથે અથડાઈ. ગાડી બે વાર પલટી ખાઈ ગઈ અને સંપૂર્ણપણે ક્ષતિગ્રસ્ત થઈ ગઈ. આ અકસ્માતમાં આર.ટી. દેશમુખને ગંભીર ઈજાઓ પહોંચી હતી અને તેમને તાત્કાલિક નજીકની ખાનગી હોસ્પિટલમાં લઈ જવામાં આવ્યા હતા, પરંતુ ડોકટરોએ તેમને મૃત ઘોષિત કર્યા હતા. ગાડીના ડ્રાઈવરને પણ આ અકસ્માતમાં ઈજા થઈ હતી અને તેની સારવાર ચાલી રહી છે. પ્રત્યક્ષદર્શીઓ અને પોલીસના મતે, વરસાદના કારણે રોડ પર થયેલી ચીકણી સપાટી અકસ્માતનું મુખ્ય કારણ હતી. સ્થાનિક લોકો અને નજીકના પોલીસ ચોકીના ચાર પોલીસકર્મીઓએ તાત્કાલિક બચાવ કાર્ય શરૂ કરીને ઘાયલોને હોસ્પિટલ પહોંચાડ્યા હતા.

આ ઘટનાઓ મહારાષ્ટ્રના માર્ગો પર વધતા અકસ્માતોની ગંભીરતા દર્શાવે છે. શું માર્ગ સુરક્ષાના નિયમોનું કડક પાલન કરાવવું અને માર્ગ સુધારણા પર વધુ ધ્યાન આપવું જરૂરી નથી?