હરિદ્વારની ગંગા નદીના ભારે પ્રવાહમાં ગુજરાતના 2 બાળકો તણાયા, બંનેના મોત

ઉતરાખંડના હરિદ્વારમાં યાત્રા કરવા ગયેલા ગુજરાતના તાપી જિલ્લાના એક પરિવારના 2 બાળકો ગંગા નદીમાં ડૂબી ગયા હોવાનો બનાવ બન્યો છે. ગંગામાં આ પરિવાર સ્નાનકી રહ્યો હતો ત્યારે પરિવારના 2 બાળકો ગંગા નદીના જોરદાર પ્રવાહમાં તણાઇ ગયા હોવાનું જાણવા મળે છે. બંનેના મૃતદેહ બહાર કાઢવામાં આવ્યા છે.

ગુજરાતના તાપી જિલ્લામાં બાજીપુરામાં રહેતા વિપુલભાઇ તેમના પરિવાર સાથે હરિદ્વાર દર્શન કરવા આવ્યા હતા. શુક્રવારે સવારે જ્યારે આ પરિવાર સપ્તર્ષી વિસ્તારમા સંતમતઘાટ પર  ગંગા નદીમા સ્નાન કરી રહ્યો હતો ત્યારે તેમની 13 વર્ષની પુત્રી અને 6 વર્ષનો પુત્ર અચાનક જ ગંગા નદીના ભારે પ્રવાહમાં વહેવા માંડ્યા હતા જેથી પરિવારે ચીસાચીસ કરી મુકી હતી. 

ઘટના બનતા ઘાટ પર હાજર લોકો તત્કાળ ભેગા થઇ ગયા હતા અને બંને બાળકોને બચાવાનો પ્રયાસ કરાયો હતો પણ નદીનો પ્રવાહ એટલો જોરદાર હતો કે બંને બાળકો પળવારમાં જ નદીમાં ગરકાવ થઇ ગયા હતા. 

બનાવની જાણ થતાં પોલીસ પણ ધસી ગઇ હતી અને સ્થાનિક તરવૈયાઓની મદદથી બંને બાળકોની શોધખોળ શરુ કરી હતી. ભારે જહેમત બાદ બંને બાળકોને શોધવામાં સફળતા મળી હતી પણ બંનેને હોશ પણ ન હતો. બંને બાળકોને તત્કાળ હોસ્પિટલમાં લઇ જવાતા ડોક્ટરે બંનેને મૃત જાહેર કર્યા હતા જેથી પરિવાર પર જાણે કે આભ તૂટી પડ્યું હતું. શુક્રવારે સવારે 10 વાગે આ બનાવ બન્યો હોવાનું જાણવા મળે છે.