'મા'નો પુકાર: દિકરા સમાન ઝાડને કાપતા કર્યો આક્રંદ

છત્તીસગઢમાં એક એવી હૃદયદ્રાવક ઘટના સામે આવી છે, જેણે સંવેદનહીન સમાજ પર પ્રશ્નાર્થ મૂક્યો છે. અહીં એક 85 વર્ષીય વૃદ્ધ મહિલા પોતાના પરિવારના સભ્યની જેમ ઉછેરેલા એક ઘટાદાર પીપળાના વૃક્ષના થડ પાસે ચોધાર આંસુએ રડતી જોવા મળી હતી. આ દ્રશ્ય એટલું કરુણ હતું કે જોનાર દરેક વ્યક્તિની આંખો ભીની થઈ ગઈ હતી.

મહિલાએ આજથી 20 વર્ષ પહેલાં આ પીપળાના વૃક્ષને પોતાના દીકરાની જેમ વાવ્યું હતું અને નાનકડા બાળકની જેમ તેને ઉછેરીને મોટું કર્યું હતું. માતા માટે આ માત્ર એક ઝાડ નહોતું, પણ તેના પરિવારનો સભ્ય હતો. જ્યારે કેટલાક અસામાજિક તત્વોએ આ ઘટાટોપ વૃક્ષને નિર્દયતાથી કાપી નાખ્યું, ત્યારે માતાનું હૃદય દ્રવી ઊઠ્યું.

હૃદયદ્રાવક દ્રશ્ય: 85 વર્ષની માતાનું આક્રંદ જોઈ સૌની આંખો ભીની, પીપળાનું વૃક્ષ નહીં પણ 'દીકરો' કપાયો

વૃદ્ધ માતાનું આક્રંદ જાણે કોઈ માતાએ પોતાના જવાનજોધ દીકરાને ગુમાવ્યો હોય તેવું હતું. તેમનો વિલાપ અને તેમની મમતા જોઈને આસપાસના લોકો પણ લાગણીભોર બની ગયા હતા. આ ઘટનાએ બંગાળમાં થયેલા ઐતિહાસિક 'ચિપકો આંદોલન'ની ઘટનાને તાજી કરી દીધી છે, જ્યાં લોકોએ વૃક્ષોને બચાવવા માટે પોતાના જીવની પણ પરવા કરી નહોતી.

આ તરફ, સરકાર 'એક પેડ માં કે નામ' જેવા અભિયાનો ચલાવીને વૃક્ષો વાવવાની વાત કરે છે. ત્યારે, સવાલ એ થાય છે કે જે માતાએ પોતાના હાથે વૃક્ષને મોટું કર્યું, તેને ન્યાય મળશે ખરો? વૃક્ષને કાપનારા અસામાજિક તત્વોને પ્રશાસન ક્યારે પકડીને કડક કાર્યવાહી કરશે?

હાલમાં, આ વૃદ્ધ માતાનું આક્રંદ કરતો વીડિયો સોશિયલ મીડિયામાં ખૂબ જ વાયરલ થઈ રહ્યો છે. આ ઘટના માત્ર એક વૃક્ષ કપાવાની નથી, પરંતુ સંસ્કાર, સંવેદના અને પર્યાવરણ પ્રત્યેની આપણી જવાબદારીના મૃત્યુની છે. સમાજે અને તંત્રએ આ નિંદનીય કૃત્ય કરનારા સામે સખતમાં સખત પગલાં લેવા જોઈએ અને આ માતાના 'પુત્ર'ના હત્યારાઓને સજા થવી જ જોઈએ.