દારૂ પીવામાં બદલાઈ ગયો ટ્રેન્ડ! યુવાનો દૂર થયા, 50થી 64 વર્ષની ઉંમરે વધ્યું સેવન

Global Alcohol Consumption Trend Shifts: અમેરિકામાં દારૂ પીવાની આદતોમાં મોટો ફેરફાર જોવા મળી રહ્યો છે. 40 વર્ષથી ઓછી ઉંમરના લોકોમાં દારૂનું સેવન અને ભારે દારૂ પીવાનું પ્રમાણ ઘટી રહ્યું છે, જ્યારે 50થી 64 વર્ષની વયના લોકોમાં દારૂનું સેવન વધતું જોવા મળ્યું છે. ખાસ કરીને આ વય જૂથમાં ભારે દારૂ પીવાનું પ્રમાણ વધવાથી આરોગ્ય નિષ્ણાતોનું ધ્યાન આ તરફ ગયું છે. Annals of Internal Medicineમાં પ્રકાશિત નવા અભ્યાસ મુજબ, કોરોના મહામારી પછી અમેરિકામાં યુવા વય જૂથોમાં દારૂ પીવાનું પ્રમાણ ઘટવાની દિશામાં છે. બીજી તરફ, 50થી 64 વર્ષની વયના લોકોમાં દારૂનું સેવન વધ્યું છે. અભ્યાસમાં 2018થી 2024 દરમિયાન અમેરિકામાં દારૂ પીવાની આદતોમાં આવેલા ફેરફારનું વિશ્લેષણ કરવામાં આવ્યું છે.

40 વર્ષથી ઓછી ઉંમરના લોકોમાં દારૂનું સેવન ઘટ્યું
અભ્યાસના આંકડા મુજબ, 2018માં અમેરિકામાં પુખ્ત લોકોમાં આશરે 66 ટકા લોકો દારૂ પીતા હતા. 2020માં આ પ્રમાણ વધીને લગભગ 69 ટકા થયું હતું. જોકે 2024માં દારૂ પીનારા લોકોનું કુલ પ્રમાણ ઘટીને લગભગ 68 ટકા થયું. 40 વર્ષથી ઓછી ઉંમરના લોકોમાં દારૂનું સેવન ઘટવાની સાથે ભારે દારૂ પીવાનું પ્રમાણ પણ ઘટ્યું છે. સંશોધકોના મતે, યુવા પેઢીમાં દારૂ પ્રત્યે બદલાતો અભિગમ અને જીવનશૈલીમાં આવેલા ફેરફારો આ ટ્રેન્ડ સાથે જોડાયેલા હોઈ શકે છે.

50થી 64 વર્ષની ઉંમરે ભારે દારૂ પીવાનું પ્રમાણ વધ્યું
નવા અભ્યાસમાં સૌથી વધુ ધ્યાન 50થી 64 વર્ષની વયના લોકોના દારૂના સેવન પર ગયું છે. આ વય જૂથમાં ભારે દારૂ પીવાનું પ્રમાણ 2018માં 5.6 ટકા હતું, જે 2024માં વધીને 7.7 ટકા થયું છે. એટલે કે છ વર્ષના સમયગાળામાં આ પ્રમાણમાં નોંધપાત્ર વધારો થયો છે. અભ્યાસના મુખ્ય સંશોધક અને લીવર નિષ્ણાત ડૉ. બ્રાયન પી. લીના જણાવ્યા મુજબ, તણાવ સહિતના કેટલાક પરિબળો આ વય જૂથમાં દારૂના વધતા સેવન સાથે જોડાયેલા હોઈ શકે છે. જોકે અભ્યાસના આધારે દરેક વ્યક્તિમાં દારૂનું સેવન વધવાનું એક જ કારણ નક્કી કરી શકાય નહીં.

50 વર્ષની ઉંમર પછી દારૂનું સેવન કેમ ચિંતાજનક?
ઉંમર વધવાની સાથે હાઈ બ્લડ પ્રેશર, ડાયાબિટીસ, સ્થૂળતા, લીવર સંબંધિત બીમારીઓ અને હૃદયની સમસ્યાઓ જેવા સ્વાસ્થ્ય જોખમો મહત્વના બની શકે છે. વધુ પડતું દારૂનું સેવન આવા જોખમોને વધુ ગંભીર બનાવી શકે છે. સંશોધકો ખાસ કરીને 50 વર્ષથી વધુ ઉંમરના લોકોમાં વધતા ભારે દારૂના સેવનને લઈને આરોગ્યની દૃષ્ટિએ ચિંતા વ્યક્ત કરી રહ્યા છે.

તણાવ માટે દારૂ લેવાની આદત બની શકે છે
તણાવ ઘટાડવા માટે દારૂનો નિયમિત ઉપયોગ લાંબા ગાળે સમસ્યાનો ઉકેલ ન બની શકે. દારૂનું સેવન ધીમે ધીમે વધતું જાય તો વ્યક્તિ માટે તેને નિયંત્રિત કરવું મુશ્કેલ બની શકે છે. નવા અભ્યાસથી સ્પષ્ટ થાય છે કે અમેરિકામાં વિવિધ વય જૂથોમાં દારૂ પીવાની આદતો એકસરખી નથી. 40 વર્ષથી ઓછી ઉંમરના લોકોમાં દારૂનું સેવન ઘટતું જોવા મળે છે, જ્યારે 50થી 64 વર્ષની ઉંમરના લોકોમાં ખાસ કરીને ભારે દારૂ પીવાનું પ્રમાણ વધ્યું છે. આ કારણે મધ્યવયસ્ક લોકોમાં દારૂના સેવન અને તેના સંભવિત સ્વાસ્થ્ય જોખમો અંગે વધુ ધ્યાન આપવાની જરૂરિયાત સામે આવી છે.