લલિત મોદીને ભારત પાછા લાવવા મુશ્કેલ બનશે?

IPLના પૂર્વ ચેરમેન અને પ્રખ્યાત ઉદ્યોગપતિ લલિત મોદી વિશે મોટા સમાચાર આવી રહ્યા છે. મીડિયા રિપોર્ટ્સ અનુસાર, લલિત મોદીએ પ્રશાંત મહાસાગરમાં સ્થિત એક નાના ટાપુ દેશ વનુઆતુનું નાગરિકત્વ લીધું છે. એવું કહેવામાં આવી રહ્યું છે કે તેણે ભારતીય કાયદાથી બચવા માટે આ પગલું ભર્યું છે.૨૦૧૦માં ભારત છોડીને લંડન ગયેલા મોદી પર નાણાકીય છેતરપિંડીનો આરોપ છે. વનુઆતુને ટેક્સ હેવન માનવામાં આવે છે.

એક અઙેવાલ અનુસાર લલિત મોદીના નવા પાસપોર્ટની એક નકલ મળી છે, જેમાં સ્પષ્ટ છે કે મોદીએ વનુઆતુની નાગરિકતા મેળવવા માટે કરોડો રૂપિયા ખર્ચ્યા હતા. ભારતીય નાગરિકતાનો ત્યાગ કરીને વિદેશી પાસપોર્ટ મેળવ્યા પછી, મોદીનું પ્રત્યાર્પણ હવે ભારત સરકાર માટે વધુ મુશ્કેલ બની ગયું છે.

લલિત મોદી ક્યારે અને શા માટે ભારતમાંથી ભાગી ગયા?
લલિત મોદી 2010 માં ભારત છોડીને લંડન ગયો હતો. તેમની સામે નાણાકીય અનિયમિતતાઓ, મની લોન્ડરિંગ અને ભ્રષ્ટાચારના ગંભીર આરોપો છે. ભારતના એન્ફોર્સમેન્ટ ડિરેક્ટોરેટ (ED) એ તેમની સામે અનેક કેસોમાં તપાસ શરૂ કરી હતી અને ભારતીય અદાલતોએ પણ તેમને હાજર થવાનો આદેશ આપ્યો હતો. મોદી પર IPL મીડિયા રાઇટ્સ અને ફ્રેન્ચાઇઝી ડીલ દ્વારા કરોડો રૂપિયાના કૌભાંડનો આરોપ છે.

વનુઆતુ શા માટે પસંદ કર્યુ?
વનુઆતુ એક નાનો ટાપુ દેશ છે, જેને સામાન્ય રીતે "ટેક્સ હેવન" તરીકે ઓળખવામાં આવે છે. 'ગોલ્ડન વિઝા પ્રોગ્રામ' હેઠળ આ દેશમાં મોટા પાયે રોકાણ કરનાર વ્યક્તિને નાગરિકતા આપવામાં આવે છે. ખાસ વાત એ છે કે વનુઆતુનો ભારત સહિત મોટાભાગના દેશો સાથે પ્રત્યાર્પણ સંધિ નથી, જેના કારણે કાનૂની મુશ્કેલીઓમાં ફસાયેલા લોકો અહીં સરળતાથી આશ્રય લઈ શકે છે.

શું ભારત લલિત મોદીને પાછા લાવી શકશે?
ભારત સરકાર માટે મોદીને પાછા લાવવાનું સરળ નહીં હોય, પરંતુ કેટલાક રાજદ્વારી અને કાનૂની પગલાં લઈ શકાય છે.આગળ જતાં, ભારત સરકાર ઇન્ટરપોલને રેડ કોર્નર નોટિસ જારી કરવા વિનંતી કરી શકે છે. વધુમાં, વનુઆતુ સરકાર પર રાજદ્વારી દબાણ લાવી શકાય છે. આ ઉપરાંત, આંતરરાષ્ટ્રીય મની લોન્ડરિંગ કાયદા હેઠળ કાર્યવાહી કરવાનો પ્રયાસ પણ કરી શકાય છે. હાલમાં, એવું લાગે છે કે લલિત મોદીએ ભારતીય ન્યાયિક વ્યવસ્થાથી બચવા માટે ખૂબ જ ચાલાકીપૂર્વક પોતાના પત્તા રમ્યા છે. હવે જોવાનું એ રહે છે કે ભારત સરકાર તેમની સામે શું રણનીતિ બનાવે છે અને તેમને પાછા લાવવામાં સફળ થાય છે કે નહીં.