વિરાટ કોહલીના 28,000 રન પૂરા, રચ્યો ઈતિહાસ

વડોદરાના કોટંબી સ્ટેડિયમમાં રમાઈ રહેલી ભારત અને ન્યૂઝીલેન્ડ વચ્ચેની પ્રથમ વનડે મેચ વિરાટ કોહલી માટે યાદગાર સાબિત થઈ છે. કિંગ કોહલીએ મેચમાં માત્ર 25 રન બનાવતાની સાથે જ આંતરરાષ્ટ્રીય ક્રિકેટમાં 28,000 રન પૂરા કરવાની ઐતિહાસિક સિદ્ધિ હાંસલ કરી છે. આ આંકડા સુધી પહોંચનારો તે વિશ્વનો માત્ર ત્રીજો ખેલાડી બન્યો છે.

સચિન અને સંગાકારાની ક્લબમાં વિરાટની એન્ટ્રી : 

વિરાટ કોહલીએ આ માઇલસ્ટોન માત્ર 557 મેચની 624 ઇનિંગ્સમાં હાંસલ કર્યો છે. અગાઉ માત્ર સચિન તેંડુલકર અને કુમાર સંગાકારા જ આ પરાક્રમ કરી શક્યા છે. રેકોર્ડની સાથે વિરાટે પોતાની વનડે કરિયરની 77મી અડધી સદી પણ ફટકારી છે. તેણે માત્ર 44 બોલમાં પોતાની ફિફ્ટી પૂર્ણ કરી મેદાન પર ચોગ્ગા-છગ્ગાની રમઝટ બોલાવી છે.

ન્યૂઝીલેન્ડનો પડકારજનક સ્કોર : 

પ્રથમ બેટિંગ કરતા ન્યૂઝીલેન્ડની ટીમે 50 ઓવરમાં 8 વિકેટ ગુમાવીને 300 રન બનાવ્યા હતા. ન્યૂઝીલેન્ડ તરફથી ડેરીલ મિશેલે શાનદાર બેટિંગ કરતા 84 રનની ઈનિંગ રમી હતી. ઓપનિંગમાં ડેવોન કોન્વેએ 56 અને હેનરી નિકોલ્સે 62 રન બનાવીને ટીમને મજબૂત શરૂઆત અપાવી હતી. ભારત તરફથી હર્ષિત રાણાએ મહત્વની સફળતા મેળવી હતી

ઐતિહાસિક કોટંબી સ્ટેડિયમ : 

વડોદરાનું કોટંબી સ્ટેડિયમ આ મેચ સાથે ઈતિહાસ રચી રહ્યું છે કારણ કે અહીં પ્રથમ વખત મેન્સ ઇન્ટરનેશનલ મેચ રમાઈ રહી છે. નવા વર્ષની પ્રથમ મેચમાં ભારતીય ટીમ 301 રનના ટાર્ગેટનો પીછો કરી રહી છે. રોહિત શર્મા 26 રન બનાવી આઉટ થયા બાદ શુભમન ગિલ અને વિરાટ કોહલી ભારતની ઇનિંગને મજબૂતીથી આગળ વધારી રહ્યા છે.

મેચનું ટૂંકું સ્કોરકાર્ડ : 

ન્યૂઝીલેન્ડ: 300/8 (50 ઓવર) - મિશેલ 84, નિકોલ્સ 62, કોન્વે 56

ભારતની બોલિંગ: હર્ષિત રાણા અને મોહમ્મદ સિરાજની શાનદાર લાઈન-લેન્થ

ભારતની બેટિંગ: 22 ઓવર બાદ 131/1 (ગિલ અને કોહલી ક્રીઝ પર)