ભારત અને દક્ષિણ આફ્રિકા વચ્ચે રમાનારી હાઈ-વોલ્ટેજ ટી20 મેચ પહેલા ક્રિકેટ જગતમાં ગરમાવો આવી ગયો છે. ખાસ કરીને ભારતીય સ્પિનર વરુણ ચક્રવર્તી જે રીતે દક્ષિણ આફ્રિકાના બેટ્સમેનો માટે માથાનો દુખાવો બન્યા છે, તેને જોતા આફ્રિકન કેમ્પમાં વ્યૂહરચનાઓ ઘડાઈ રહી છે. આ દરમિયાન દક્ષિણ આફ્રિકાના વરિષ્ઠ વિકેટકીપર બેટ્સમેન ક્વિન્ટન ડી કોકે પોતાની ટીમના યુવા ખેલાડીઓનો આત્મવિશ્વાસ વધાર્યો છે.
વરુણ ચક્રવર્તીનો આફ્રિકા સામે દબદબો :&nbsp;
વરુણ ચક્રવર્તી હાલમાં શાનદાર ફોર્મમાં છે. આંકડા સાક્ષી પૂરે છે કે દક્ષિણ આફ્રિકા સામેની છેલ્લી આઠ ટી20 મેચોમાં તેમણે કુલ 22 વિકેટ ઝડપી છે. ગત ડિસેમ્બરમાં રમાયેલી દ્વિપક્ષીય શ્રેણીમાં તો તેમણે એકલા હાથે 10 વિકેટો ખેરવીને આફ્રિકન બેટિંગ લાઇનઅપને વેરવિખેર કરી નાખી હતી.
ડી કોકની યુવા ખેલાડીઓને વિશેષ સલાહ :&nbsp;
સુપર-8 મેચ પહેલા મીડિયા સાથે વાત કરતા ક્વિન્ટન ડી કોકે જણાવ્યું કે દરેક ખેલાડીની રમવાની પદ્ધતિ અલગ હોય છે. વરુણ જેવા ગુણવત્તાયુક્ત બોલરનો સામનો કરવા માટે પ્રયોગો કરવાને બદલે બેટ્સમેનોએ પોતાની કુદરતી રમત પર ભરોસો રાખવો જોઈએ. તેમણે આશા વ્યક્ત કરી હતી કે ટીમમાં સામેલ યુવા ખેલાડીઓએ વરુણની બોલિંગનું યોગ્ય વિશ્લેષણ કર્યું હશે અને તે મુજબ હોમવર્ક પણ કરી લીધું હશે. ડી કોકના મતે, જો ખેલાડીઓ રણનીતિ મુજબ રમશે તો પરિણામ સકારાત્મક આવશે.
અભિષેક શર્માના ફોર્મ અંગે પ્રતિક્રિયા : 
ભારતીય ઓપનર અભિષેક શર્મા ભલે છેલ્લી ત્રણ મેચોમાં અપેક્ષિત દેખાવ કરી શક્યા ન હોય, પરંતુ ડી કોક તેમને હળવાશથી લેવા માંગતા નથી. તેમણે અભિષેકને વિશ્વના ટોચના ટી20 બેટ્સમેનોમાં ગણાવતા કહ્યું કે તે ઘણો યુવાન છે અને દરેક ખેલાડીના જીવનમાં ઉતાર-ચઢાવ આવે છે. તેમને ખાતરી છે કે આ મહત્વની ટૂર્નામેન્ટમાં અભિષેક મોટી ઇનિંગ રમી શકે છે.
બંને ટીમોની સંભવિત સ્ક્વોડ :&nbsp;
ભારતીય ટીમ: સૂર્યકુમાર યાદવ (કેપ્ટન), અભિષેક શર્મા, ઈશાન કિશન, તિલક વર્મા, શિવમ દુબે, હાર્દિક પંડ્યા, રિંકુ સિંહ, વોશિંગ્ટન સુંદર, અર્શદીપ સિંહ, જસપ્રીત બુમરાહ, વરુણ ચક્રવર્તી, સંજુ સેમસન, કુલદીપ યાદવ, અક્ષર પટેલ, મોહમ્મદ સિરાજ.
દક્ષિણ આફ્રિકાની ટીમ: એડન માર્કરામ (કેપ્ટન), ક્વિન્ટન ડી કોક, રયાન રિકલ્ટન, ડેવાલ્ડ બ્રેવિસ, ટ્રિસ્ટન સ્ટબ્સ, જેસન સ્મિથ, જ્યોર્જ લિન્ડે, કોર્બિન બોશ, કગીસો રબાડા, એનરિક નોર્ટ્ઝે, ક્વેના મફાકા, ડેવિડ મિલર, લુન્ગી એન્ગિડી, કેશવ મહારાજ, માર્કો જેન્સેન.

ટી20 વર્લ્ડ કપ સુપર-8: ભારત સામેની ટક્કર પહેલા દક્ષિણ આફ્રિકાના દિગ્ગજ ખેલાડીનું નિવેદન

February 22, 2026 | 15:00 IST