ધ હન્ડ્રેડ 2026: પાકિસ્તાની ખેલાડીઓ થશે અનસોલ્ડ?

ક્રિકેટ જગતમાં હાલ 'ધ હન્ડ્રેડ' (The Hundred) ની ૨૦૨૬ની સીઝન માટેની હરાજીની તૈયારીઓ ચાલી રહી છે. જોકે, આ હરાજી પહેલા પાકિસ્તાની ક્રિકેટરોને લઈને ચિંતાજનક સમાચાર સામે આવ્યા છે. અહેવાલો મુજબ, ઈન્ડિયન પ્રીમિયર લીગ (IPL) સાથે જોડાયેલા માલિકો ધરાવતી ફ્રેન્ચાઇઝીઓ પાકિસ્તાની ખેલાડીઓને ટીમમાં ન લેવાની નીતિ અપનાવી શકે છે.

આઈપીએલ સંલગ્ન ચાર ટીમો પર નજર : 

તાજેતરમાં થયેલા રોકાણો બાદ મેન્ચેસ્ટર સુપર જાયન્ટ્સ, એમઆઈ લંડન, સધર્ન બ્રેવ અને સનરાઈઝર્સ લીડ્સ જેવી ટીમોમાં આઈપીએલ ફ્રેન્ચાઇઝીના માલિકોનો હિસ્સો છે. એવું માનવામાં આવે છે કે ભારત-પાકિસ્તાન વચ્ચેના રાજકીય તણાવને જોતા, આ માલિકો પાકિસ્તાની ખેલાડીઓ માટે બોલી લગાવવાથી દૂર રહી શકે છે. આ જ પ્રકારનું વલણ અગાઉ અન્ય આંતરરાષ્ટ્રીય લીગોમાં પણ જોવા મળ્યું છે.

માર્ચમાં યોજાશે ખેલાડીઓની હરાજી : 

આગામી ૧૧ અને ૧૨ માર્ચે લંડનમાં મહિલા અને પુરુષ વર્ગ માટે હરાજી યોજાવાની છે. જેમાં અંદાજે ૧,૦૦૦ ખેલાડીઓ સામેલ છે. પાકિસ્તાનના સ્ટાર ખેલાડીઓ પણ આ પૂલનો ભાગ છે, પરંતુ ટીમોની બદલાયેલી વ્યૂહરચનાને કારણે તેઓ વેચાયા વગર રહે તેવી પ્રબળ શક્યતા છે. આઈપીએલમાં ૨૦૦૮ પછી પાકિસ્તાની ખેલાડીઓ પર પ્રતિબંધ છે, જેની અસર હવે વિદેશી લીગમાં પણ દેખાઈ રહી છે.

ઈસીબીની ભૂમિકા અને જૂનો રેકોર્ડ : 

ઈંગ્લેન્ડ અને વેલ્સ ક્રિકેટ બોર્ડ (ECB) એ સ્પષ્ટ કર્યું છે કે લીગમાં કોઈ પણ દેશના ખેલાડી સાથે ભેદભાવ કરવામાં આવશે નહીં. ભૂતકાળમાં મોહમ્મદ આમીર, શાદાબ ખાન અને શાહીન આફ્રિદી જેવા ખેલાડીઓ આ લીગમાં રમી ચૂક્યા છે. જોકે, ફ્રેન્ચાઇઝીના માલિકી હક્કો બદલાતા આ વર્ષે સ્થિતિ બદલાઈ શકે છે. હવે જોવાનું એ રહેશે કે ૧૨ માર્ચે કયા પાકિસ્તાની ખેલાડીઓ પર બોલી લાગે છે.