CT 2025: ટીમ ઈન્ડિયાનું ટેન્શન વધ્યું, સ્ટાર ખેલાડીની તબિયત લથડી

ટીમ ઈન્ડિયાનો આગામી લીગ મેચ ન્યુઝીલેન્ડ સાથે હશે. જોકે, આ બંને ટીમો પહેલાથી જ સેમિફાઇનલ માટે ક્વોલિફાય થઈ ગઈ છે અને આ મેચ પોઈન્ટ ટેબલમાં નંબર-1 સ્થાન માટેની લડાઈ માટે હશે. ટીમ ઈન્ડિયા આ મેચ માટે સખત પ્રેક્ટિસ કરી રહી છે. તે જ સમયે, શુભમન ગિલની ખરાબ તબિયતને કારણે મેચ પહેલા ટીમ ઈન્ડિયાનું ટેન્શન વધી ગયું છે. ભારતીય ટીમનો આગામી મુકાબલો 2 માર્ચે ન્યુઝીલેન્ડ સાથે થશે.

શુભમન ગિલની તબિયત લથડી
બુધવારે પ્રેક્ટિસ સત્ર દરમિયાન કેપ્ટન રોહિત શર્મા અને ઉપ-કેપ્ટન શુભમન ગિલ બંને ગેરહાજર હતા. ચેમ્પિયન્સ ટ્રોફીમાં પાકિસ્તાન સામેની મેચ દરમિયાન હિટમેનને હેમસ્ટ્રિંગમાં ઈજા થઈ હતી. આ દરમિયાન, ગિલની તબિયત બગડી ગઈ જેના કારણે તેણે બુધવારે પ્રેક્ટિસમાં ભાગ લીધો ન હતો.

ક્રિકબઝના એક અહેવાલ મુજબ, શુભમન ગિલ ખરાબ તબિયતને કારણે પ્રેક્ટિસ સત્રમાં ભાગ લઈ શક્યો ન હતો. જોકે, ન્યૂઝીલેન્ડ સામેની મેચ પહેલા ગિલ સ્વસ્થ થઈ જશે તેવી અપેક્ષા છે. બીજી તરફ, બીમાર ઋષભ પંતે પણ બુધવારે પ્રેક્ટિસ સેશનમાં પરસેવો પાડ્યો હતો. આ ઉપરાંત, મોહમ્મદ શમીએ બેટ્સમેનોને જોરદાર બોલિંગ કરી.

શુભમન ગિલ ચેમ્પિયન્સ ટ્રોફી 2025માં શાનદાર ફોર્મમાં છે. અત્યાર સુધીમાં ગિલના બેટમાંથી એક સદી આવી છે, જે તેણે બાંગ્લાદેશ સાથે રમાયેલી મેચમાં ફટકારી હતી. આ મેચમાં ગિલે 101 રનની અણનમ ઇનિંગ રમી હતી.