ભારત-પાક મહામુકાબલા માટે ટીમ ઇન્ડિયા તૈયાર

ક્રિકેટ જગતનો સૌથી મોટો રોમાંચ એટલે કે ભારત-પાકિસ્તાન જંગ હવે ગણતરીના કલાકો દૂર છે. શ્રીલંકાના કોલંબોમાં રમાનારા આ મુકાબલા પહેલા ભારતીય કેપ્ટન સૂર્યકુમાર યાદવે રણનીતિ અને પ્લેઈંગ-11 ને લઈને અનેક ખુલાસા કર્યા છે.

ટી૨૦ વર્લ્ડકપ ૨૦૨૬માં ૧૫ ફેબ્રુઆરીનો દિવસ ક્રિકેટ પ્રેમીઓ માટે ઐતિહાસિક બનવા જઈ રહ્યો છે. શ્રીલંકાના કોલંબો સ્થિત આર. પ્રેમદાસા સ્ટેડિયમમાં ભારત અને પાકિસ્તાન વચ્ચે હાઈવોલ્ટેજ મુકાબલો રમાશે. આ મેચ પહેલા પાકિસ્તાન ક્રિકેટ બોર્ડ (PCB) દ્વારા ઘણો રાજકીય અને ખેલ જગતનો ડ્રામા જોવા મળ્યો હતો. શરૂઆતમાં ભારત સામે ન રમવાની અને બૉયકોટ કરવાની ધમકી આપનાર પાકિસ્તાન આખરે આંતરરાષ્ટ્રીય દબાણ હેઠળ નમ્યું છે અને હવે મેદાનમાં ભારતનો સામનો કરવા તૈયાર છે.

અભિષેક શર્માની ફિટનેસ અને કેપ્ટનનું નિવેદન

ભારતીય ટીમ માટે સૌથી મોટા રાહતના સમાચાર એ છે કે વિસ્ફોટક ઓપનર અભિષેક શર્મા હવે સંપૂર્ણપણે ફિટ છે. અમેરિકા સામેની મેચ પહેલા બીમાર પડ્યા બાદ તેને હોસ્પિટલમાં દાખલ કરવો પડ્યો હતો અને નામીબિયા સામેની મેચમાં તેને આરામ આપવામાં આવ્યો હતો. જોકે, પાકિસ્તાન સામેની મહત્વની મેચ પહેલા સૂર્યકુમાર યાદવે પત્રકાર પરિષદમાં સ્પષ્ટ કર્યું કે અભિષેક શર્મા પ્લેઈંગ-૧૧ માં પરત ફરશે.

સૂર્યાએ પાકિસ્તાની કેપ્ટન સલમાન અલી આગાના નિવેદન પર કટાક્ષ કરતા કહ્યું કે, "જો પાકિસ્તાનનો કેપ્ટન ઈચ્છતો હોય કે અભિષેક રમે, તો તે ચોક્કસપણે રમશે." નોંધનીય છે કે સલમાન અલી આગાએ અભિષેકના વખાણ કરતા તેને બેસ્ટ ખેલાડી ગણાવ્યો હતો અને તે ભારતની મજબૂત ટીમ સામે રમવા ઉત્સુક હોવાનું જણાવ્યું હતું.

હાથ મિલાવવાના સવાલ પર સૂર્યાનો રમૂજી અંદાજ

મેચ પહેલા ભારત અને પાકિસ્તાનના ખેલાડીઓ વચ્ચેના મેદાન પરના સંબંધો હંમેશા ચર્ચામાં રહે છે. જ્યારે સૂર્યકુમારને પૂછવામાં આવ્યું કે શું ભારતીય ખેલાડીઓ પાકિસ્તાનીઓ સાથે હાથ મિલાવશે? ત્યારે તેણે સ્મિત સાથે જવાબ આપ્યો, "તમે ૨૪ કલાક રાહ જુઓ. અત્યારે ડિનર કરો અને આરામથી ઊંઘી જાઓ. અમે પહેલા મેદાન પર સારું પ્રદર્શન કરીશું અને પછી નક્કી કરીશું કે શું કરવું."

પ્લેઈંગ-૧૧ અને કુલદીપ યાદવ અંગે સ્પષ્ટતા

સ્પિનર કુલદીપ યાદવના સ્થાન અંગે પૂછવામાં આવતા સૂર્યાએ સ્પષ્ટ કર્યું કે આ આંતરરાષ્ટ્રીય ક્રિકેટ છે, કોઈ ફ્રેન્ચાઈઝી લીગ નથી. અહીં ટીમ કોમ્બિનેશન પિચ અને વિરોધી ટીમની તાકાતના આધારે નક્કી થાય છે. ભારતીય કેપ્ટને સંકેત આપ્યા કે ટીમ એશિયા કપ જેવી જ વ્યૂહરચના સાથે ઉતરી શકે છે. કોલંબોની પિચ દુબઈ કરતા સારી હોવાનું જણાઈ રહ્યું છે, છતાં ટીમ પોતાની તાકાત પર ધ્યાન કેન્દ્રિત કરશે.

દબાણ અને બુમરાહની ભૂમિકા

જસપ્રીત બુમરાહ પાવરપ્લેમાં ઓછી ઓવરો નાખે છે તેવા સવાલ પર કેપ્ટને બચાવ કરતા કહ્યું કે દરેક મેચ માટે અલગ રણનીતિ હોય છે. તે એક મજબૂત બોલિંગ યુનિટ બનાવવા માંગે છે જ્યાં દરેક બોલરની ચોક્કસ ભૂમિકા હોય. મેચના પ્રેશર વિશે વાત કરતા સૂર્યાએ હિંમતપૂર્વક કહ્યું, "જ્યાં દબાણ નથી હોતું ત્યાં મજા નથી હોતી. પાકિસ્તાનનું બોલિંગ અને બેટિંગ કોમ્બિનેશન સારું છે, પરંતુ અમે અમારી લય જાળવી રાખવા માંગીએ છીએ."

ભારત અત્યાર સુધી ટૂર્નામેન્ટમાં શાનદાર લયમાં છે. પાકિસ્તાન શ્રીલંકાની પરિસ્થિતિઓથી વધુ પરિચિત હોવાનો તેને ફાયદો મળી શકે છે, પરંતુ ટીમ ઇન્ડિયાના આત્મવિશ્વાસ સામે પાર પાડવું તેમના માટે પડકારજનક રહેશે. આવતીકાલની મેચ માત્ર રમત નથી, પણ કરોડો ચાહકોની લાગણીઓનો સંગમ છે.