T20 વર્લ્ડ કપ: ભારત-નામિબિયા મેચ પહેલા મોટો વિવાદ

ટી-20 વર્લ્ડ કપ 2026 માં ભારત અને નામિબિયા વચ્ચે રમાનારી મહત્વની મેચ પહેલા વાતાવરણ ગરમાયું છે. નામિબિયાની ટીમના સુકાની ગેરહાર્ડ ઇરાસ્મસે આયોજકો દ્વારા પ્રેક્ટિસ સેશનના સમયની ફાળવણીમાં ભેદભાવ કરવામાં આવ્યો હોવાના ગંભીર આરોપો લગાવ્યા છે. આ વિવાદને કારણે મેદાન બહારની ગરમી મેદાન પર પણ જોવા મળી શકે છે.

પ્રેક્ટિસ સેશનના સમય અંગે મુખ્ય વાંધો : 

નામિબિયાએ તેની અગાઉની મેચ દિવસના સમયે રમી હતી, પરંતુ ભારત સામેની મેચ ફ્લડ લાઈટ્સમાં રમાવાની છે. કેપ્ટન ઇરાસ્મસના જણાવ્યા અનુસાર, તેમને રાત્રિના સમયે પ્રેક્ટિસ કરવાની મંજૂરી આપવામાં આવી નથી. નામિબિયાને ટ્રેનિંગ માટે બપોરનો સમય ફાળવવામાં આવ્યો હતો, જ્યારે ભારતીય ટીમને રાત્રિના સમયે પ્રેક્ટિસ કરવા માટેનો મુખ્ય સ્લોટ મળ્યો હતો.

કેનેડાને મળી તક પણ નામિબિયાને અન્યાય : 

નામિબિયાના કેપ્ટને આશ્ચર્ય વ્યક્ત કરતા જણાવ્યું હતું કે, જે ટીમની મેચ આગામી દિવસે બપોરે છે તેવી કેનેડાની ટીમને પણ રાત્રે લાઈટ્સ હેઠળ પ્રેક્ટિસ કરવાની સુવિધા મળી હતી. આ જોઈને નામિબિયન ટીમમાં ભારે નારાજગી જોવા મળી રહી છે. તેઓનું માનવું છે કે રાત્રિની મેચ માટે રાત્રે જ તૈયારી કરવી જરૂરી હોય છે, જેની તક તેમને છીનવી લેવામાં આવી છે.

નામિબિયન ટીમ માટે મોટો પડકાર : 

નામિબિયામાં ફ્લડ લાઈટ્સ વાળા સ્ટેડિયમની સુવિધા ન હોવાથી તેમના ખેલાડીઓ માટે લાઈટ્સ નીચે અનુકૂલન સાધવું ખૂબ જરૂરી છે. આઈપીએલ જેવા મોટા પ્લેટફોર્મ પર ન રમનારા ખેલાડીઓ માટે સીધા જ રાત્રે મેદાન પર ઉતરવું મુશ્કેલ બની શકે છે. આમ છતાં, કેપ્ટને સ્પષ્ટ કર્યું છે કે તેઓ આ પડકારનો સામનો પૂરી તાકાતથી કરશે અને મેદાન પર પોતાની લડાયક શક્તિ બતાવશે.

મેચની સ્થિતિ : 

ભારત અને નામિબિયા વચ્ચેની આ મેચ ગુરુવારે સાંજે રમાવાની છે. એક તરફ ભારત મજબૂત સ્થિતિમાં છે, તો બીજી તરફ પ્રેક્ટિસના અભાવે નામિબિયા માટે આ મેચ વધુ કઠિન સાબિત થઈ શકે છે. હવે જોવાનું એ રહેશે કે આ માનસિક દબાણ વચ્ચે નામિબિયા કેવું પ્રદર્શન કરે છે.