દક્ષિણ આફ્રિકાના કોચનો વિવાદાસ્પદ 'ગ્રોવેલ' શબ્દ

ભારત સામેની બીજી ટેસ્ટમાં ૫૪૯ રનના વિશાળ લક્ષ્યનો પીછો કરી રહેલી ભારતીય ટીમ પર સિરીઝ હારવાનું જોખમ તોળાઈ રહ્યું છે, ત્યારે દક્ષિણ આફ્રિકાના મુખ્ય કોચ શુક્રી કોનરાડના એક નિવેદને ક્રિકેટ જગતમાં મોટો વિવાદ જગાવ્યો છે. કોનરાડે પોતાની વિલંબિત ઈનિંગ્સ ડિક્લેરેશનની રણનીતિને યોગ્ય ઠેરવતા વિરોધી ભારતીય ટીમ માટે વાંધાજનક શબ્દનો ઉપયોગ કર્યો હતો.

'ગ્રોવેલ' શબ્દનો ઇતિહાસ

ચોથા દિવસની રમતના અંતે પ્રેસ કોન્ફરન્સમાં, કોચ કોનરાડે કહ્યું, "અમે ઇચ્છતા હતા કે ભારતીય ટીમ મેદાન પર વધુમાં વધુ સમય વિતાવે. અમે તેમને 'ઘૂંટણિયે પાડી દેવા' (Grovel) માંગતા હતા અને મેચને તેમની પહોંચની બિલકુલ બહાર લઈ જવા માંગતા હતા."

'ગ્રોવેલ' (Grovel) શબ્દનો અર્થ થાય છે 'જમીન પર સુવડાવવું' કે 'ઘસડાવું'. આ એ જ અપમાનજનક શબ્દ છે જેનો ઉપયોગ ૧૯૭૬માં દક્ષિણ આફ્રિકાના મૂળના શ્વેત ક્રિકેટર અને ઈંગ્લેન્ડના પૂર્વ કેપ્ટન ટોની ગ્રેગે વેસ્ટ ઈન્ડિઝની ટીમ માટે કર્યો હતો, જેનો સંદર્ભ રંગભેદ અને ગુલામીના પીડાદાયક ઇતિહાસ સાથે જોડાયેલો છે. કોચ કોનરાડ પોતે અશ્વેત હોવા છતાં વિરોધી ટીમ માટે આ અપમાનજનક શબ્દનો ઉપયોગ કરવા બદલ ક્રિકેટ દક્ષિણ આફ્રિકા (CSA) શું પગલાં લે છે તે જોવું રહ્યું.

ડિક્લેરેશનમાં વિલંબ પાછળનું કારણ

ઈનિંગ્સ ડિક્લેર કરવામાં વિલંબ અંગેના પ્રશ્નનો જવાબ આપતા કોનરાડે પોતાની રણનીતિનો બચાવ કર્યો હતો. તેમણે કહ્યું કે વિલંબનો મુખ્ય હેતુ સવારે નવા અને સખત બોલનો શ્રેષ્ઠ ઉપયોગ કરવાનો હતો.

"અમે નવા બોલનો શ્રેષ્ઠ ઉપયોગ કેવી રીતે કરવો તે વિચારી રહ્યા હતા, જેથી સવારે અમને નવો અને સખત બોલ મળી શકે. અમે જોયું કે સાંજે જ્યારે પિચ પર છાંયો આવે છે, ત્યારે ઝડપી બોલરોને મદદ મળે છે. તેથી અમે બહુ જલદી ઈનિંગ્સ ડિક્લેર કરવા માંગતા ન હતા."

તેમણે ભારપૂર્વક કહ્યું કે તેઓ ઈચ્છતા હતા કે ભારત મેદાનમાં પોતાના પગ પર વધુ સમય વિતાવે. જોકે, કોનરાડ એ પણ સ્વીકારે છે કે ભારત ૮મા નંબર સુધી મજબૂત બેટિંગ ધરાવે છે અને તેઓ સહેલાઈથી હાર માનશે નહીં.

ક્રિકેટ પંડિતોના મતે, કોનરાડની આ લાંબી બેટિંગની રણનીતિ એક ભૂલ સાબિત થઈ શકે છે, જો ભારત આ મેચ ડ્રો કરાવવામાં સફળ રહે તો તેમનો આ 'ઘમંડ' ભારે પડી શકે છે.