શમર જોસેફનો વર્લ્ડ રેકોર્ડ: 4 વિકેટ અને 4 કેચ

કોલકાતાના ઐતિહાસિક ઈડન ગાર્ડન્સ મેદાન પર રમાયેલી T20 વર્લ્ડ કપ 2026ની રોમાંચક મેચમાં વેસ્ટ ઈન્ડિઝે ઈટાલીને 42 રનથી હરાવીને સતત ચોથી જીત હાંસલ કરી છે. આ જીત સાથે જ વેસ્ટ ઈન્ડિઝની ટીમે સુપર-8માં પણ પોતાની જગ્યા પાકી કરી લીધી છે. જોકે, આ મેચ વેસ્ટ ઈન્ડિઝના ફાસ્ટ બોલર શમર જોસેફના નામે રહી હતી, જેણે ફિલ્ડિંગ અને બોલિંગ બંનેમાં અદભૂત પ્રદર્શન કરીને વિશ્વ વિક્રમ સ્થાપ્યો છે.

શાઈ હોપની કેપ્ટન ઇનિંગ્સ : 

ટોસ હાર્યા બાદ પ્રથમ બેટિંગ કરવા ઉતરેલી વેસ્ટ ઈન્ડિઝની શરૂઆત નબળી રહી હતી. ઈટાલીના બોલરોએ પાવરપ્લેમાં જ બ્રેડન કિંગ અને હેટમાયરને આઉટ કરીને દબાણ સર્જ્યું હતું. આ મુશ્કેલ સમયમાં કેપ્ટન શાઈ હોપે મોરચો સંભાળ્યો હતો. હોપે 46 બોલમાં 74 રનની શાનદાર ઇનિંગ રમીને ટીમને 165 રનના સન્માનજનક સ્કોર સુધી પહોંચાડી હતી. ઈટાલી તરફથી બેન મેનેન્ટી અને કાલુગામાગેએ બે-બે વિકેટ ઝડપી હતી.

શમર જોસેફનો ઐતિહાસિક 'ઓલરાઉન્ડ' દેખાવ : 

165 રનના લક્ષ્યનો પીછો કરવા ઉતરેલી ઈટાલીની ટીમ શરૂઆતમાં આક્રમક દેખાઈ હતી, પરંતુ શમર જોસેફની બોલિંગ સામે તેઓ લાંબુ ટકી શક્યા નહીં. જોસેફે 30 રન આપીને 4 મહત્વની વિકેટો ઝડપી હતી. આ ઉપરાંત, તેણે ફિલ્ડિંગમાં પણ કમાલ કરતા 4 શાનદાર કેચ પકડ્યા હતા. આ સાથે જ શમર જોસેફ દુનિયાનો પ્રથમ એવો ખેલાડી બન્યો છે જેણે એક જ T20 ઈન્ટરનેશનલ મેચમાં 4 વિકેટ અને 4 કેચ લેવાની સિદ્ધિ મેળવી હોય.

ઈટાલીની સન્માનજનક લડત : 

પોતાનો પ્રથમ વર્લ્ડ કપ રમી રહેલી ઈટાલીની ટીમે અનુભવી વેસ્ટ ઈન્ડિઝ સામે સારો સંઘર્ષ કર્યો હતો. જોકે, મેથ્યુ ફોર્ડે 3 વિકેટ ઝડપીને જોસેફને સાથ આપતા ઈટાલીની આખી ટીમ 18મી ઓવરમાં ઓલઆઉટ થઈ ગઈ હતી. ઈટાલી તરફથી મોસ્કા ભાઈઓએ થોડો સમય પ્રતિકાર કર્યો હતો, પરંતુ તે જીત માટે પૂરતો નહોતો.